Jeremia 36 - Iaai Bible 1901 (New Caledonia)

¹ KE haba hnyi huna a vaki Jehoiakima nöku Josea than Juda, me ame o but hofuc ang kö Jeremia ûnyi ga Iehova, ka habe,

² Hom dö tusi adre vhec, me sihnalimen hnyin e ta je hofuc hia waleji oge ha köu ge Isaraela, me Juda, me je hnyei hia, hwân hnyi bong waleji oge fuc hnyin köu, hwân hnyi ta je bong bongu Josea, ke ne o but hnyi bong ang.

³ Ame ne he la lap anyi Juda ka löng ge ta je ûnyi hia ae kong waleji oge me ûnykûme he ka ânyâ ködra; mʼ adre me he ka ve hmetu ûnyi hnyi dedra ta je gethen ae kong; mʼ oge me he ka hna anyidra monu me hulo.

⁴ Haba Jeremia ame hao Baruka nöku Neria; ke haba Baruka ame sihnalimen hia ûnyi hnyi hnyimö Jeremia ta je hofuc ho Iehova waleji e ame ha kâu, hnyi tusi adre vhec.

⁵ Ke haba Jeremia ame ha kö Baruka, ka habe, Inya ang at adre thawâ; e ca khanö nya he ka dit hnyi uma umö Iehova;

⁶ anyin a wale, he thö ka aû tusi waleji u je set ûnyi hnyi hnyimök, ta je hofuc ho Iehova ka hnyi je hnyikonyen tavat hnyi uma umö Iehova hnyi bonginy ca han: ke u me he minya ka aû ka hnyi hnyikonyen at Juda hia tavat adre me o ûnyi hnyi anyidra je taun.

⁷ Adre ne he ka he la ka ha hnödra hna khöû hnyi hnyimakö Iehova, me ve hmetu ûnyi hnyi dedra je gethen ae kong; anyin ae gan hmâ hmonyin me wathethot ame ha Iehova hon hnyei ang.

⁸ Ke haba Baruka nöku Neria ame ânyâ hia helâ me hna hûna kâu ga Jeremia perofeta, me e ame aû tusi wale ta je hofuc ho Iehova hnyi uma umö Iehova.

⁹ Ke haba hnyi huna a thabûngi Jehoiakima nöku Josea, than Juda, hnyi tehi a naininy, me ame haimemenâ he ka ânyâ ca han hnyi hnyimakö Iehova hnen tavat hia hnyi Jerusalema, me tavat hia tavat adre me he ûnyi hnyi je tauniny Juda Jerusalema ai.

¹⁰ Me Baruka ame aû tusi wale ta je hofuc ho Jeremia hnyi uma umö Iehova hnyi hnyeule anyi Gemaria nöku Safana at sihnalimen, hnyi hnyeule ethö, hnyi hna dit hnyi homagouleny ae teb ûnyi uma umö Iehova ka hnyi hnyikonyen tavat hia.

¹¹ Ke haba Mikaia nöku Gemaria, nöku Safana, ame löng ûnyi hnyi tusi ta je hofuc hia ho Iehova,

¹² me e ame utut ka hnyi uma umen than, ka hnyi hnyeuleny at sihnalimen: ke wâ bi, ta je taben hia adre me laba eling, wale Elisama at sihnalimen, me Delaia nöku Semaia, me Elenathana nöku Akebora, me Gemaria nöku Safana, me Zedekia nöku Hanania, me je taben hia.

¹³ Me haba Mikaia ame thumetu ödrin ge ta je hofuc hia waleji e ame löng, hnyi ûen Baruka ame aû tusi ka hnyi hnyikonyen tavat hia.

¹⁴ Anyin a wale haba je taben hia ödrin e kunö Jehudi, nöku Nethania, nöku Selemia, nöku Kusi kö Baruka, he ka ha, ka habe, haba tusi waleji u je aû ka hnyi hnyikonyen tavat hia, hamâm he ka hom jem. Me haba Baruka nöku Neria ame hom tusi hnyi hnyamen, me he ködrin.

¹⁵ Ke ödrin e ha kâu, ka habe, Laba ju ka aû kohmun. Me haba Baruka ame aû ködrin.

¹⁶ Ke ödrin e hia but löng ta je hofuc hia, me ödrin e tha ot, me ha kö Baruka, ka habe, Ohmun e he ka thumeto than ge ta je hofuc e.

¹⁷ Ke ödrin e hnei Baruka me ha, ka habe, Më thumetu ohmun dö, u je kâmâu ka sihnalimen ta je hofuc hia e ûnyi hnyi hnyimen?

¹⁸ Me ame ha ködrin Baruka, ka habe, E ame ha könya ge hnyimen ta je hofuc hia e, me oge me sihnalimen hnyi tusi ge köiö sisit.

¹⁹ Me haba je taben ödrin e ha kö Baruka, ka habe, He thö ka ikhölö, u me Jeremia, me me ca wâ hnöbu hnen ke at.

²⁰ Ke ödrin e didro ka than hnyi hnyeule; kʼ ödrin e ip biju tusi hnyi hnyeule anyi Elisama at sihnalimen; ke ödrin e thumeto than ge ta je hofuc hia thithö

²¹ Me haba than ame kunö Jehudi he ka hom tusi; me e ame hom e ûnyi hnyi hnyeule anyi Elisama at sihnalimen. Ke haba Jehudi ame aû e ka hnyi li hnyikonyen than, me je taben hia tavat ödrin e tot unyin than.

²² Ke ame laba than hnyi uma honivakeny hnyi tehi a naininy; ke ame hlâ meic hnyi taben meic hnyi hnyimakan.

²³ Ke a hia but Jehudi aû je ke keihen ame ne kun ame ne vak, me e ame kave e ge hele delö pen, me khûâ ka hnyi meic wale hnyi taben, ke ne o but ame an dut tusi meic.

²⁴ Ke ödrin e ca ot bi, me kia anyidrin je ûkhaû, wale than me je athnyabainy hia, tavat ödrin e löng ta je hofuc hia eling.

²⁵ Ke haba khaca, ame khöû ka than ga Elenathana, me Delaia, me Gemaria, me me ca thong tusi, ke ame ca ling ödrin.

²⁶ Ke haba than ame hûna kö Jeramela nokon than, me Seraia nöku Azeriela, me Selemia nöku Abedela he ka hum Baruka at sihnalimen me Jeremia perofeta: ke haba Iehova ame ikhölʼ ödru.

²⁷ Me ame o but hofuc ho Iehova kö Jeremia, hwaban hna thong tusi ge than, me ta je hofuc waleji a sihnalimen Baruka ûnyi hnyi hnyimö Jeremia, ka habe,

²⁸ U me he hmetu ka hom ke tusi me sihnalimen hnyin e ta je hofuc hia a bân waleji a e hnyi tusi a bân, wale a thong degecâ Jehoiakima than Juda.

²⁹ Ke u me he ka ha ga Jehoiakama than Juda, ka habe, Walang hna ha hnö Iehova, ka habe, U je hia but thong tusi ang, haingâm, Anyin a ieû u je sihnalimen hnyin e, ka habe, Ame he ka o than Babulona me okongoâ hnyei ang, me ohia hnyin e at me meno?

³⁰ Anyin a wale walang hna ha hnö Iehova ga Jehoiakima than Juda, ka habe, Ame he ka ba hwaban hnân tabâ theron anyi Davita: ke adre me he ka khûâ unyin ae mok ka hnyi kahwa hnyi lany me megic hnyi hnyinghet.

³¹ Ke oge me he ka bi hwaban kâu, me je mâtrâniny, me je athynabainy, can hwakecidra ae kong: ke oge me he ka oâ kodra me aten Jerusalema, me at Juda ta je ûnyi hia ae kong waleji oge ha gadra, ke adre me ca löng bi.

³² Me Jeremia ame hom ke tusi me ham e kö Baruka at sihnalimen, nöku Neria; me e ame sihnalimen hnyin e ûnyi hnyi hnyimö Jeremia ta je hofucin tusi hia waleji a thong degecâ Jehoiakima than Juda hnyi meic: ke adre me bi hanen ke je hofuc ae se minya ka hnyin a helâe.