Jeremia 35 - Iaai Bible 1901 (New Caledonia)

¹ WALANG hofuc ame o kö Jeremia hnyi je bong bongu Jehoiakima nöku Josea than Juda, ka habe,

² He thö ka hnyi lap anyi Rekaba, me ûhnenamö mödra, me hum ödra ka hnyi uma umö Iehova, ka hnyi ke hnyeule, me habelidra ge waina.

³ Me oge me hum Jazania nöku Jeremia, nöku Habazinia, me je liamekeiny mê, me je lakon hia, me lap hia anyi Rekaba;

⁴ me oge me hum ödra ka hnyi uma umö Iehova, ka hnyi hnyeuleny je laku Hanan, nöku Igedalia, a aten Khong, a hnyi baten hnyeuleny je taben, a hnyi bon hnyeule anyi Maseia nöku Saluma, at ame tuö hwanuma;

⁵ ke oge me ip hnyi hnyimakan je lakon lap anyi Rekaba je kaia ae lup ge waina, me je utkaia, me ha ködrin, ka habe, Ijem dö waina.

⁶ Ke haingodra, ka habe, Ohmun e ca he ka ic waina, anyin a Jonadaba nöku Rekaba a kamöhmun ame hûna kohmun, ka habe, Ca he öbun ka ijem waina, öbun, me je mâtrânibun nyiele balua:

⁷ ke öbun e ca he ka up uma, me belök, me te vine, me hu je ûnyi e: ke öbun e he ka labā je uma mano hnyi je bong hia thithö; mʼ öbun e he ka mot hnyi je bong ae se hia hon kânâ wale öbun e laba atkanyua hnyin.

⁸ Ko ohmun e hia but ânyâ hoton hofuc ho Jonadaba nöku Rekaba a kamöhmun hnyi hnen hna hûna hia kohmun, he ka ca ic waina hnyi bonguhmun ta je bong hia, ohmun, me laöiöhmun, me je lakuhmun obaga me wahlu;

⁹ me ca up umöhmun uma hnân labā; ke ba minya gahmun hnyei vine, me utkânâ, me hatunguhmun;

¹⁰ ke so bi, ohmun e hia but labā je uma mano, me löng me ânyâ hoton hia hna hûna kohmun ga Jonadaba a kamöhmun.

¹¹ Ke haba hnyi ûen eji ame o Nebukaneza than Babulona ka hnyi hnyei, me ohmun e ha, ka habe, Ai öbun, ate me he Jerusalema ai me kec ge utbavat a at Kaledaia, me utbavat a at Suria; me ohmun dut ang ohmun e laba hnyi Jerusalema.

¹² Me ame o but hofuc ho Iehova kö Jeremia ame ha, ka habe,

¹³ Walang hna ha hnö Iehova tuhan sabaoth, Khongu Isaraela, ka habe, He thö ka ha ka at Juda me tavat aten Jerusalema, ka habe, Hawa, öbun e ca he ka kap hna ûnö me löng hok hofuc? haingö Iehova.

¹⁴ A hwâdâ but hofuc bo Jonodaba nöku Rekaba waleji e ame hûna ka je lakon, mʼ ödrin e ca ic waina, ke ödrin e ca ic ke ne o but hnyi bong ang, anyin ödrin e löng hoton hna hûna hnen kamödrin: ke so bi, oge hia but fuc köbun me vesâkong me ha, ke öbun e ca ling nya bi.

¹⁵ Ke oge biâ but minya kunâ köbun je athnyabaik hia a je perofeta, me vesâkong me ûkhûnöng me ha, ka habe, Ve hmetu ju öbun walang ang ûnyi hnyi debun je gethen ae kong, me ânyâwia thö je hwakecibun, ke ca hnu hoton ke je khong he ka bi athnyabaidrin, me öbun e he ka laba hnyi hnyei waleji oge ham köbun me lakamöbun: ke so bi, öbun e ca tevehlöng me ling nya.

¹⁶ Ke anyin a je laku Jonadaba nöku Rekaba ödrin e hia but ohwâdâ hna hûna hnen kamödrin, ke haba bi tavat ang, adre me ca wen ling nya;

¹⁷ anyin a wale walang hna ha hnö Iehova Khongon sabaoth, Khongu Isaraela, ka habe, Wâ bi, oge me he ka oâ ka at Juda, me aten Jerusalema, hia ta je ûnyi ae kong waleji oge ha gadra: anyin a oge hia but fuc ködra ke adre me ca löng bi: ke oge hia but hongot ködra ke adre me ca ieû bi.

¹⁸ Ke haba Jeremia ame ha ka lap anyi Rekaba, ka habe. Walang hna ha hnö Iehova tuhan sabaoth, Khongu Isaraela, ka habe, Anyin öbun e hia but löng hoton hna hûna hnö Jonadaba a kamöbun, me tuö hia hnen je hna huna, me mâdrâ helâ me hnen hna hûna hia köbun;

¹⁹ anyin a wale, walang hna ha hnö Iehova tuhan sabaoth, Khongu Isaraela, ka habe, Ame ca he ka ba mâtrâni Jonadaba, nöku Rekaba, he ka tot hnyi hnyimakök nyiele balua.