Jeremia 33 - Iaai Bible 1901 (New Caledonia)

¹ KE ame olo o hofuc ho Iehova kö Jeremia hnyi ûen e ame tiga laba hnyi hnyeuleny uma ceat, me ha, ka habe,

² Walang hna ha hnö Iehova at ame ânyâ, a Iehova at ame op e, me ohmâ e, Iehova ien;

³ ame ha, ka habe, Hongot dö könya, me oge me he ka thu köu, me omanenâ köu ta je ûnyi ae gan, me hmak, wale ae ca khanö u.

⁴ Anyin a walang hna ha hnö Iehova, Khongu Isaraela ge je umainy taun ang, me je uma umen je than Juda, wale adre kia hnân singidra ge je dok adre hlu goranyai me je hele vat, ame ha, ka habe,

⁵ Adre me o he ka vat me at Kaledaia, ke so bi, adre me he ka öunöngöti ödra ge je komok, waleji oge hlingâ hnyi anyik hmonyin me wathethot, ke oge hia but ikhâlâ hnyimakök ge taun ang can anyidra ta je hulo hia.

⁶ Wâ bi, oge me he ka hom kâe ûnyi hnân ometo me eny, ke oge me he ka ometu ödra; ke oge me he ka omanenâ gânâ kodra hnahic me hnathu.

⁷ Ke oge me he ka ohmeto at Juda me Isaraela ûhedra hnyi hna hwenbâ, me, up ödra hmetu goranyai helâ me hnyi hwân.

⁸ Ke oge me he ka osûʼ ödra ûnyi hnyi anyidra ta je hulo hia waleji adre ânyâ könya; ke oge me he ka hna hia anyidra ta je hulo waleji adre me ânyâ me monu könya.

⁹ Ke ame he taun ang he ka hnân ien adre senyinâ, me hnân ogânâ, me haisoâ hnyi hnyimakan ta je hnyei hia eang hmeledrany, tavat adre me he ka long ta je so hia thithö wale oge me he ka ânyâ kodra, ke adre me he ka ot me öbu-buny ge ta je so hia me ta je hnahic hia wale oge me he ka oâ kâu.

¹⁰ Walang hna ha hnö Iehova, ka habe, Adre me he hmetu ka long hnyi dok ang, waleji öbun e ha gan, ka habe, E ba wan, e ba at, ke ba meno, hnyi ta je tauniny Juda, me je getheniny Jerusalema wale ae ba wan, ke ba minya at he ka labā e, ke ba meno,

¹¹ me adre me he bi ka long hwan senyin me hwan hobâ, me ifucin li at ödre tep faipoipo, me ifucin tavat adre me ha, ka habe, Oganö Iehova thö tuhan sabaoth, anyin ae so Iehova, anyin a nyiele balua anyin ibe-tengiö: me hwan tavat adre me hom hudiny ole ka hnyi uma umö Iehova. Anyin oge me he ka ohmeto tavat adre bâ helâ me hnyi can, haingö Iehova.

¹² Walang hna ha hnö Iehova tuhan sabaoth, ka habe, Hnyi dok ang ae ba wan, ke ba minya at me meno, me hnyi ta je tauniny hia, ame he ka hu hnyaban tavat tuö mamoe, adre me mokulec haledra je hnahat mamoe.

¹³ Hnyi je tauniny hnyei ae hut me je tauniny hnyei ae hnyikânâ, me je taun hnyi Hwaiöu, me hnyi hnyei Beniamina, me je dok igigilo Jerusalema, me je tauniny Juda, ame he hmetu je hnahat mamoe ka he hmelen li hnyamen at ame tuʼ ödra, haingö Iehova.

¹⁴ Wâ bi, ame he ka o je bong, haingö Iehova, me oge me he ka ohwâdâ hofuc ae so waleji oge ha ge lap anyi Isaraela me lap anyi Juda.

¹⁵ Hnyi je bong eling, me ûen eling, oge me he ka oâ kö Davita Angin hwakecin ae wisa, ke e ame he ka ânyâ ûnyi ae wisa me ûnyi ae ûcû hnyi hnyei.

¹⁶ Hnyi je bong eling adre me he ka omeli Juda, ke ame he Jerusalema ka laba khötkic: ke walang ien adre me he ka hawâ, ka habe, Iehova wisaita.

¹⁷ Anyin a walang hna ha hnö Iehova, ka habe, Ame ca he ka ba hwabö Davita at ame he ka tabâ theroniny lap anyi Isaraela:

¹⁸ ke ame ca he ka hia hnyimakök ka tavat bihut a at Levi, at ame he ka hudo je hudiny leû, me le je hudiny han, me labö bi hut hnyi je bong.

¹⁹ Ke ame o but hofuc ho Iehova kö Jeremia ame ha, ka habe,

²⁰ Walang hna ha hnö Iehova, ha habe, A ne khanʼ öbun he ka thamuâ anyik ûhihinyköu a lany, me anyik ûhihinyköu a lit, be me ca he ka ve o but lany me lit hnyi ûen;

²¹ awe, adre me he minya ka thamuâ anyik ûhihinyköu me, Davita athnyabaik, me me ba mâtrâniny he ka musi hon anyin theron; me anyik ûhihinyköu me at Levi a tavat bihut, a lathnyabaik.

²² E ca khanʼ ödra he ka aû ta je ûnyi ethö hnyi drany, me tuluto je önyin köiö; ke helâe oge me he ka osehia je mâtrâni Davita athnyabaik, me at Levi a anyik tavat huliwa.

²³ Ke ame o but hofuc ho Iehova kö Jeremia, ka habe,

²⁴ Hawa, u me ca ûnykûme hofuc hwan tavat ang waleji a haingodra, ka habe, Haba li lap waleji a ûca Iehova, me e ame hna degecâ but? ke adre me hûkotiâ lakeik, me me ca hnyei hmetu bi hnyi hnyimakodra.

²⁵ Walang hna ha hnö Iehova, ka habe, A ne ca e bi anyik ûhihinyköu a lany me lit, ke oge ne ca hia but otilâ je hnanyibuiny drany me hmeledrany,

²⁶ awe, oge me he ka hna degecâ je mâtrâni Jekob, me Davita athnyabaik, mʼ oge me ca he ka hom unyin je mâtrâniny hnân muso je mâtrâni Aberahama, me Isaaka, me Jekob: anyin oge me he ka ohmetu ödra ûhedra hnyi hna bâ, me betenge gadra.