Jeremia 32 - Iaai Bible 1901 (New Caledonia)

¹ WALANG hofuc ame o kö Jeremia ûnyi ga Iehova hnyi huna a teni Zedekia than Juda, waleji huna a eitini Nebukaneza.

² Haba hnyi ûen eling ame igigilo Jerusalema hnen vat anyin than Babulona: ke adre me ip Jeremia perofeta hnyi hnyeuleny uma ceat, ae hnyi uma umen than Juda.

³ Anyin ame ip e Zedekia than Juda hnyi uma ceat me ha, ka habe, Ieû gam u me perofeta me ha, ka habe, Walang hna ha hnö Iehova, ka habe, Wâ bi, oge me he ka hna taun ang ka hnyi hnyamen than Babulona, ke e ame he ka hûgûnâ e;

⁴ ke ame ca he bi Zedekia than Juda ka kec ge at Kaledaia, ke e hnathu adre me he ka hna e ka hnyi hnyamen than Babulona, ke ödru me he ka ifucköu me iohnyimak;

⁵ ke e ame he ka lili Zedekia Babulona ai, ke e ame he ka laba eling ke ne o but hnyi ûen oge me he ka senâ e, haingö Iehova: eja ke ne öbun e ne vat me at Kaledaia, öbun e ca he ka hwege.

⁶ Haba Jeremia ame ha, ka habe, Ame o könya hofuc ho Iehova ame ha, ka habe,

⁷ Wâ bi, ame he ka he but köu Hanamela nöku Saluma a ke kâmâm he ka ha, ka habe, Ûco thö utkânâ a ik hnyi Anathoth: anyin ae hu musi gam he ka ûco hmetu e.

⁸ Me ame o könya Hanamela nöku cica hoton hofuc ho Iehova hnyi hnyeuleny uma ceat, me ha könya, ka habe, Ö u ûco thö utkânâ a ik hnyi Anathoth hnyi hnyei Beniamina: anyin ae ûcû köu he ka hu, ke hu musi gam he ka ûco hmetu; ûco thö me hobi köu. Me oge me wâhmakhmeto a hofuc e ho Iehova.

⁹ Me oge me ûco utkânâ me Hanamela nöku cica hnyi Anathoth, me tuluto kâu mone, a seventin je sekel sileva.

¹⁰ Me oge me set iök hnyi hna ûhihinyköu, me okeceâ haten, me hawâ tavat ohnatho, me tuluto mone hnyi tulut.

¹¹ Me oge me hom hna set ûhihinyköu ge hna ûco, waleji at adre okeceâ haten hoton hnanyibu me hwakecin, me tusi minya adre ca ohmâ:

¹² Me oge me ham tusiny ûcû kö Baruka nöku Neria, nöku Maseia, me hnyi hnyimakö Hanamela nöku cica, me hnyi hnyimakan tavat ohnatho tavat adre set iödra hnyi hna ûhihinyköu ge hna ûco, me hnyi hnyimakan tavat Juda hia tavat adre me laba hnyi hnyeuleny uma ceat.

¹³ Ke oge me hûna kö Baruka hnyi hnyimakodra, ka habe,

¹⁴ Walang hna ha hnö Iehova tuhan sabaoth, Khongu Isaraela, ka habe, Hom dö li tusi ang, wale ûhihinyköu ge hna ûco, wale tusi adre okeceâ haten, me tusi minya adre ca ohmâ, me hitöng ödru hnyi kaia kânâ; me me e bala bi hnyi ta je bong ae se hia.

¹⁵ Anyin a walang hna ha hnö Iehova tuhan sabaoth, Khongu Isaraela, ka habe, Adre me he ka he hmetu bi ka ûco je uma, me je utkânâ, me je hnyei vine hnyi hnyei ang.

¹⁶ Ke iny ka hia but ham tusiny ûcû kö Baruka nöku Neria, me oge me hic kö Iehova, me ha, ka habe,

¹⁷ Ekölö Than Iehova! wâ bi, u je hia but op drany me hmeledrany ge manâm man ae gan hmâ me benyâm adre hai; ke ba ûnyi ae hmak köu:

¹⁸ at ame omanenâ tang betenge ka ta je dö a thauzan, me bi hwaban hulo anyin je kamen ka hnyi ûlainy ta je lakudra hwabödra: Khong ae gan hmâ me man. Iehova tuhan sabaoth ien:

¹⁹ e beönua hnyi ûhnenamö, me maniny huliwa: at ame wâ ge li emakan ta je gethen hia deny tavat; me me ve ham ka tavat ûnyi ae ûcû me dedra ta je gethen me hoton wan anyidra ta je huliwa:

²⁰ at ame ip je haten me je ûnyi hnân lâiâ hnyi hnyei Aigupito, ke ne o but hnyi bong ang, hnyi wanben at Isaraela me ke je tavat; me bi iâm, helâ me hnyi bong ang;

²¹ ke u je hom lakem a Isaraela ûnyi hnyi hnyei Aigupito ge je haten, me je ûnyi hnân lâiâ, me hnyam ae hwege, me beny adre hai, me ûnyi hnân ot ae gan hmâ;

²² ke u je ham kodra hnyei ang, waleji u je khemanyinâ ka lakamödra he ka ham kodra, hnyei ame di hnyin debai me hani;

²³ ke adre me o ka hnyin, me labā e; ke so bi, adre me ca löng hwâm hofuc, ke adre me ca vheno bi ânyâm je hnanyibu; ke adre ca ânyâ ke ûnyi hnyi je ûnyi hia thithö u je hûna kodra: anyin a wale, u me oâ kodra ta je ûnyi hia eang ae kong:

²⁴ wâ bi je kânâ adre hlu goranyai, adre me o but hnyi taun he ka hûgûnâ e; ke adre me hna taun ka at Kaledaia, tavat adre me vat më, can hele vat, me hmiâ, me mok ae cap: ke ame hwâdâ thö hnâm hna ha; ke, wâ bi, u je wâ.

²⁵ Ke haba u Than Iehova u je hia but ha könya, ka habe, Ûcû em ju hwaban mone, me hawâ tavat ohnatho; ke so bi, adre hia but hna taun ka at Kaledaia.

²⁶ Me ame o but hofuc ho Iehova kö Jeremia me ha, ka habe,

²⁷ Wâ bi, Inya Iehova Khongon tavat hia thithö: hawa, e hu ke ûnyi ae ca khanö nya he ka ânyâ?

²⁸ Anyin a wale, walang hna ha hnö Iehova, ka habe, Wâ bi, oge me he ka ham taun ang ka hnyi hnyamen at Kaledaia me hnyamö Nebukaneza than Babulona, me e ame he ka hûgûnâ e:

²⁹ ke ame he ka o at Kaledaia tavat adre me vat me taun ang, me thong taun ang ge meic me me hlâ, tha e me je uma wale adre me leû utö ae bo so hon kö Baala, me hingâlâ hudiny ic ka ke je khong, me adre me ohmönyini nya.

³⁰ Anyin a haba lakon Isaraela me lakon Juda, adre me ânyâ thibi ûnyi ae kong hnyi hnyimakök, hwân kʼ ödra tiga hidröu: anyin a lakon Isaraela adre me labö ohmönyini nya ge ta je huliwa anyin je hnyamödra, haingö Iehova.

³¹ Anyin a hnân okûâ hmonyin me wathethot könya taun ang hwân hnyi bong adre op e hnyin ke ne o but hnyi bong ang; me oge me beohia e hnyi hnyimakök:

³² can ta je hulo hia anyin lakon Isaraela, me lakon Juda, waleji adre me mâdrâ he ka ohmönyini nya, ödra, me latuhödra, me anyidra je taben, me anyidra tavat bihut, me anyidra je perofeta, me at Juda, me aten Jerusalema.

³³ Ke adre me hia but wia könya hotudra, me ca hnyimakodra bi: eja ke ne oge ne nʼ ödra, me vesâ kong me ûne, me adre me ca he ka löng me kap hna ûnö.

³⁴ Ke adre me otilâ je ûnyi ae ikiki hnyi uma waleji adre wenyö kâu iök, me adre me okongoâ e.

³⁵ Ke adre me otilâ je dok ae gorany anyi Baala, hnyigöulen bucen anyin nöku Hinom, me kunâ je lakudra obaga me wahlu ka he hnyi wanben meic kö Moleka; waleji a oge ca ûkhûnöng, ke oge ca ûnykûme, agʼ adre me he ka ânyâ ûnyi eling ae ikiki; he ka oâ hulo ge at Juda.

³⁶ Anyin a wale, walang hna ha hnö Iehova Khongu Isaraela ge taun ang, waleji öbun e ha gan, ka habe, adre hia but ham e ka hnyi hnyamen than Babulona, ge hele vat, me hmiâ, me mok ae cap:

³⁷ haingen, ka habe, Wâ bi, oge me he ka hlu ödra ûnyi hnyi ta je hnyei hia, waleji oge obʼ ödra ka hnyin hnyi anyik hmonyin, me anyik wathethot, me hmonyin ae gan hmâ; ke oge me he ka ohmetu ödra ka hnyi dok ang, me olaba khötkici ödra:

³⁸ ke adre me he ka lakeik, ke oge me he ka Khongudrin:

³⁹ ke oge me he ka ham kodra hnyok a khaca, me gethen a khaca, mʼ adre me he ka outö nya balua; mʼ adre me he ka so, me je lakudra hwabödra:

⁴⁰ ke oge me he ka ânyâ mödra ûhihinyköu a nyiele balua, a oge me ca he ka hwiö gadra, wale he ka ânyâ kodra so; ke oge me he ka ip eû hnyi hnyekudra he ka ot könya, mʼ adre me ca he ka digic nya.

⁴¹ Eke, oge me he ka senyin ködra, he ka mâdrâ kodra so, ke e hnathu oge me he ka te ödra hnyi hnyei ang, hnyekuk ae bekhot me hanuk ae bekhot.

⁴² Anyin a walang hna ha hnö Iehova, ka habe, Oge me he ka oâ ködra ta je so hia oge hia but ha bânâ ködra, helâji me hnok hna oâ ta je ûnyi hia eang ae kong ka tavat ang.

⁴³ Ke adre me he ka ûco je utkânâ hnyi hnyei ang, waleji öbun e ha gan, ka habe, E ba wan, ke ba minya at me meno; ke adre hia but hna e ka hnyamen at Kaledaia.

⁴⁴ Ame he bi tavat ka ûco je utkânâ hwaban mone, me set iödra hnyi ûhihinyköu, me okeceâ haten, me hawâ tavat ohnatho, wale hnyi hnyei Beniamina, me hnyi je dok igigilo Jerusalema, me je tauniny Juda, me je tauniny je bucen, me je tauniny hnyei ae hnyikânâ, me je taun hnyi Hwaiöu: anyin oge me he ka ohmetu ödra a ta je bâ, haingö Iehova.