Jeremia 31 - Iaai Bible 1901 (New Caledonia)

¹ HAINGÖ Iehova, ka habe, hnyi ûen eling, oge me he ka Khongon je lap hia anyin at Isaraela, ke adre me he ka lakeik.

² Walang hna ha hnö Iehova, ka habe, Adre wâ betenge hnyi hnyebuba hnen ta je lakon ûnyi ge hele vat; waleji a Isaraela hnyi hnok hna he ka omenʼ ödra.

³ Haba Iehova ame manen dut könya ehac me ha, ka habe, Inya oge me betenge gam ge betenge a nyiele balua: anyin a wale oge hia but lili u ge betenge baû.

⁴ Hluiny Isaraela lö, oge me he ka up u hmetu, me adre me he ka up u; adre me he ka ohmanenangi u ge ânyâm je bwinybet, ke u me he ka he hnyi bibiâ anyin tavat adre me senyin.

⁵ U me he hmetu ka tä ta je vine hon je bucen hnyi Samaria: ame he tavat belök ka tä me ijem ta je wan hnyi senyin.

⁶ Anyin ame he ka hu ûen hongot ge tavat tue hnyi bucen Eferaima, ka habe, Todrö, ate me he Ziona ai kö Iehova Khonguta.

⁷ Anyin a walang hna ha bnç Iehova, ka habe, Khumöng senyin dö ga Jekob, me hongot dö ge hnyei ae beönua: haimemenâ thö, ogânâ thö, me ha, ka habe, Iehova löomelö thö lakem, a je kolon hnyi Isaraela.

⁸ Wâ bi, oge me he ka hum ödra ûnyi hnyi hnyei hnyi hwadro, me ûkhacaköu ödra ûnyi hnyi je can hmeledrany, tha e mödra je wadröu, me tavat ae kong cadra, me erkin, me momo ame he ka hnokoâ: adre me he ka hmetu kââng, a bunyen ae gan.

⁹ Adre me he ka o me tenge tot, ke oge me he ka lili ödra ge khöû: oge me he ka hum ödra ka hnyi je wagewe, hnyi gethen ae wisa, wale adre me ca he ka haû hnyin: anyin a inya ang kâmâm Isaraela, ke haba Eferaima, me, nokuk a bân.

¹⁰ Je hnyēi lö, löng ju hofuc ho Iehova, ke haimemenâ thö e hnyi je bomene ae sâkâû: me ha, ka habe, Haba at ame ovesei Isaraela ame he ka ûkhacaköu ödra hmetu, me tuʼ ödra, helâ me at ame tuö haleny hnahat mamoe.

¹¹ Anyin a Iehova ame hia but omeli Jekob, me hûgûnâ e ûnyi hnyi hnyamen at ae hwege hon.

¹² Ke adre me he ka o me khumöng hnyi dok ae gorany hnyi Ziona, me tha he ka hnyi soi Iehova, ka hnyi hwit, me waina, me wakaco, me je nokon mamoe, me kau: ke ame he je hnyekudra ka helâ me hna belök adre hû; ke adre me ca he balua hmetu he ka tenge.

¹³ Me ame he ka senyin hlu hnyi bibiâ, me wahidröu eang me wahingat; anyin oge me he ka wia anyidra tenge me me hnân bi senyin, ke oge me he ka otubweli Ödra, me osenyini ödra ûnyi hnyi tenge.

¹⁴ Ke oge me he ka osekunâ tavat bihut ge pipikhenya, ke oge me he ka osekunâ lakeik ge soik, haingö Iehova.

¹⁵ Walang hna ha hnö Iehova, ka habe, Adre me long hnyi Rama, hwa tenge thungaû, me tenge hwege, Rakela ame tenge ge lakon; kʼ ame ca tubet bala bi ge lakon, anyin adre aû but.

¹⁶ Walang hna ha hnö Iehova, ka habe, Soju hwâm hwatenge, me khula a li deköiâm: anyin adre me he ka bi troban ânyâm huliwa, haingö Iehova; ke adre me he ka hmetu ûnyi hnyi hnyei iny je iwahnaihmiony.

¹⁷ Ke e hu hnân gejon hnyi ânyâm obiny, haingö Iehova; ke ame he lakom ka hmetu ka hnyi hnyigöulödra.

¹⁸ E hnathu oge hia but ling Eferaima ame mâng me ha, ka habe, U je hia but kuc nya, me adre me kuc nya, helâ me bolok ae ca khenenâ hna ûhûkâlâköuâ; ohmetu nya ju, me oge me he ka hmetu: anyin a u Iehova Khonguk.

¹⁹ Ke hwaban e, e hnathu oge me hmetu, me oge me ietra; ke hwaban hnödra hna nö nya, me oge me khaû jevak: iny hmehma but, eke, iny hlohlo, anyin oge me hokhnyokâ hna haikongu nya kʼ iny tiga hidröu.

²⁰ Hawa, nokuk a oûnykûmik Eferaima? hawa, e wanakat ae kese? anyin a iny ka hia but fuc gan, oge me ti ûnykûme bala hmetu gan; anyin a wale ame fuc hnyekuk gan; e hnathu oge me he ka betenge gan, haingö Iehova.

²¹ Otilâ thö hobi köu je haten gethen, konâm ju hobi köu je utö hnân kû gethen; hnyok ju ka hna cit gethen, waleji gethen u me he hnyin: hluiny Isaraela lö, hmetu ju, hmetu ju kââng ka hnyi ânyâm taun.

²² Ke ne o but kehö u me he ka he monu, u hlu ame labö kolu? anyin a Iehova ame hia but op ûnyi ae teb ûnyi hnyi hnyei, ame he momo ka ton ge baga.

²³ Walang hna ha hnö Iehova tuhan sabaoth, Khongu Isaraela, ka habe, Adre me he hmetu ka ha hofuc ang hnyi hnyei Juda, me je tauniny, iny ka he ka ohmetu ödra ûhedra hnyi hna bâ me ha, ka habe, Hnyaban hna owisa lö, me bucen ae kap, E so e he Iehova ka ohnahici u.

²⁴ Kʼ ame he Juda me je tauniny hia ka tha labā e; tavat belök, me tavat alin meno.

²⁵ Anyin oge hia but osekunâ tavat hia ae sënyin, me öunöngötâ tavat hia ae hloûhloû.

²⁶ Me oge me hmak me wâ, ke so könya hnok hna mokut.

²⁷ Wâ bi, ame he ka o je bong, haingö Iehova, me oge me he ka tû lap anyi Isaraela me lap anyi Juda, a je wan at, me wan meno.

²⁸ Ke helâ me hnok hna tuʼ ödra he ka oc, me kia, me hagutâ, me ohia, me ovecâ; helâe oge me he ka tuʼ ödra he ka op goranyai, me tä, haingö Iehova.

²⁹ Hnyi bong eling adre me ca he hmetu ka ha, ka habe, Haba je lakamöhmun adre hia but ijem wan vine ae but, me ame miminy bi nyon je lakon.

³⁰ Ke ame he ka ve mok tavat can hwakecidra ae kong; ke haba at ama ijem wan vine ae but, ame he bi ka miminy nyon.

³¹ Haingö Iehova, ka habe, Wâ bi, ame he ka o je bong me oge me he ka ânyâ ûhihinyköu a teb ûnyi me lap anyi Isaraela, me lap anyi Juda:

³² ca helâ me ûhihinyköu eji oge ânyâ me lakamödra, waleji hnyi bong oge hom hnyamödra he ka su Ödra ûnyi hnyi hnyei Aigupito; ke adre me thamuâ anyik ûhihinyköu eja ke ne oge ne helâ me âiân baga kodra, haingö Iehova.

³³ Ke walang ûhihinyköu oge me he ka ânyâ me lap anyi Isaraela, hwaban je bong eling, haingö Iehova; oge me he ka ip anyik hnanyibu eû hnyidra, me sihnalimen e hnyi je hnyekudra; ke oge me he ka Khongudrin, ke adre me he ka lakeik;

³⁴ ke adre me ca he hmetu ka ve nâ tavat ae hakekeny kodra, me je liamekeiny mödra, me ha, ka habe, Khanʼ öbun dö Iehova: anyin adre me he hia ka khanʼ ödra inya, hwâu ge ta je hoûmonu ke ne o but ka tavat ae beönua, haingö Iehova: anyin oge me he ka hna but hwakecidra ae kong, ke oge me ca be hmetu ka ûnykûme anyidra ta je hulo.

³⁵ Walang hna ha hnö Iehova at ame ham seûno hnân lany hnyi selany, me hnanyibuiny tehi me ta je okhû hnân melam hnyi lit, at ame bwebwelâ köiö me me û je waköiöiny; Iehova tuhan sabaoth ien:

³⁶ haingö Iehova, ka habe, a ne he ka hia hnyi hnyimakök je hnanyibu eling, me ame he ka ba hmetu hnyei hnyi hnyimakök mâtrâniny Isaraela nyiele balua.

³⁷ Walang hna ha hnö Iehova, ka habe, A ne khana he ka tuluto drany ethö, me elâm e taben hmeledrany, me oge me he minya ka degec hia je mâtrâniny Isaraela, can ta je ûnyi hia adre me ânyâ, haingö Iehova.

³⁸ Wâ bi, ame he ka o je bong, haingö Iehova, me adre me he ka op taun hobi kö Iehova, hwân hnyi tap ae beû goranyai tabô Hananel, ke ne o but hnyi homagouleny kop.

³⁹ Ke ame he ka he wisa tulut tö ka hnyi bucen Gareb, me ame he ka khenyi hnyi Goatha.

⁴⁰ Ke ame he ka kap kö Iehova hnyigöulen bucen hia anyin je komok, me je hnabadröu, me je utkânâ hia ke ne o but hnyi wagewe Kederon, ke ne o but hnyi kopiny homagouleny je hors e deiö; adre me ca he hmetu ka oc e, me kia nyiele balua.