Jeremia 3 - Iaai Bible 1901 (New Caledonia)

¹ HAINGODRA, ka habe, A ne ke at ame degec âiân, ke ame he gan me ame âiân ke baga bi, hawa, e ame be ka hmetu ka momo? Ame ca he ka ti kong hnyei eling? Ke u je hia but bi ûnyi monu me tavat ae se hia; ke so bi, hmetu ju könya, haingö Iehova.

² Bwele thö ka hnyi je dok ae ba leûnen ethö, me wâ: ewa dok adre ca tha mokut möu hnyin? U je laba halubahingʼ ödra eû hnyi je gethen, helâ me at Arabia hnyi hnyebuba; ke u je hia but oikikiâ hnyei ge hnâm hna bi ûnyi monu, me hwakecâm ae kong.

³ Anyin a wale adre behânâ je uth we, ke ba but we a biliny; ke hu gam bariny momo hnyi gethen, u je ca hmehma bi

⁴ Hawa, u me ca he ka hao nya hwân walang ang, Cica, u at ame su nya kʼ iny tiga ûhnyûkong?

⁵ Hawa, e ame he bala ka hmonyin? me tuö e ke ne o but obiny? Wâ bi, u je hia but ha me ânyâ ta je ûnyi ae kong me ânyâ wem bi.

⁶ Ke haba Iehova ame ha könya hnyi je bong bongu Josea than, ka habe, Hawa, u je wâ but hnö Isaraela, at ame labö kolu, hna ânyâ? E ame ölö ka hnyi je bucen hia ae beû goranyai ke he hmelen je ûö hia ae hât, me bi ûnyi monu eling.

⁷ Ke oge me ha hwaban hnen hna ânyâ ta je ûnyi eling, ka habe, E ame he ka hmetu könya; ke e ame ca hmetu: ke a wâ but ûnyi e hnen liamekeiny më, jia Juda at iyawo.

⁸ Ke oge me wâ but, anyin a hnyi hna bi ûnyi monu hnö Isaraela, at ame labö kolu, me oge me degec e, me ham kâu tusiny thang hna faipoipo, ke so bi, ame ca ot bi Juda at iyawo a liamekeiny më; ke e ame he minya bi, me bi ûnyi monu.

⁹ Ke can ame hâhâ kâu he ka bi ûnyi monu, me ame ikiki but hnyei, ke e ame bi ûnyi monu me je veto, me hnyiban je utö.

¹⁰ Ke so bi, hnyi ta je ûnyi e hia, haba liamekeiny më, jia Juda at iyawo, ame ca hmetu könya me hnyekon ae bekhot, ke ame thoi, haingö Iehova.

¹¹ Ke haba Iehova ame ha könya, ka habe, E hu omi wisa ge Isaraela, at ame labö kolu, hon Juda at iyawo.

¹² He thö me ha ta je hofuc ang hnyi ke keihen hnyi hwadro, ka habe, Hmetu ju u Isaraela, at ame labö kolu, haingö Iehova; oge me ca he ka ōʼ bun hnyi hmonyin; anyin a inya at ibetengiö, haingö Iehova; oge me ca he ka ip hmonyin nyiele balua.

¹³ Ke so bi, ogâ thö ânyâm hulo, a u je ânyâ hwakecin ae ikiki kö Iehova Khongom, me he monu unyin je atkanyua hmelen ta je ûö hia ae hât: ke öbun e ca long hok hofuc haingö Iehova.

¹⁴ Öbun na hmetu ju, öbun tavat labö kolu, haingö Iehova; anyin a iny helâ me âiân köbun: ke oge me he ka hum öbun, ûsa khaca ûnyi hnyi taun, ke ûsa lo ûnyi hnyi lap, me hum öbun Ziona ai:

¹⁵ ke oge me he ka ham köbun tavat tuö mamoe hoton hnyekuk bi, tavat adre me he ka ha öʼbun ge metâ me wâhmakhmeto.

¹⁶ Ke öbun ka se hia but, me ti osehia hnyei, hnyi je bong eling, haingö Iehova, adre me ca he hmetu ka ha, ka habe, Tangen ûhihinyköu anyi Iehova: ke adre me ca he ka ûnykûme ka hnyin; ke adre me ca he ka ûnykûme gan; ke adre me ca he ka senâ e; ke adre me ca he ka ânyâ hmetu.

¹⁷ Hnyi ûen eling adre me he ka hâiâ Jerusalema, ka habe, theron anyi Iehova: ke adre me he ka ûkhacaköu ka hnyin je hnyei hia thithö, ka iö Iehova hnyi Jerusalema: ke adre me ca he hmetu ka hnu hoton je hnyekudra ae ûjöng me kong.

¹⁸ Hnyi je bong eling ame he lap anyi Juda ka tha he me lap anyi Isaraela, ke adre me he ka tha o ûnyi hnyi hnyei hnyi hwadro ka hnyi hnyei waleji oge ham ka lakamöbun me hnân ibun.

¹⁹ Ke oge me ba, ka habe, Oge me he ka kâmâu ka ip u unyin je lakon, me ham köu hnyei ae so, a jekhom ae so unyin je döiny ta je hnyei? ke oge me ha, ka habe, Öbun e he ka hao nya, ka habe, Cica; me ca he ka hwio hmetu gak.

²⁰ E hnathu, öbun e hia but ânyâ hwakecin ae iyawo könya lap anyi Isaraela, helâ me momo ame degec âiân ge hwakecin iyawo, haingö Iehova.

²¹ Adre me long hofuc hon je dok ae ba leûnen ethö gorany, wale tenge me khöû anyin lakon Isaraela; anyin adre hia but omono dedra je gethen, me hnying Iehova Khongudrin.

²² Hmetu ju öbun tavat öbun e labö kolu, oge me he ka ometo hnobun je hna kolu. Wâ ju, öhmun e o but köu; anyin a u Iehova Khonguhmun.

²³ E hnathu, e ûnyi baû ûhadruo ûnyi hnyi je hut, wale imonumonuny hon je bucen: e hnathu, e unyi Iehova Khonguta ûhomeli anyi Isaraela.

²⁴ Ke haba hna hmehman ame ohia huliwa anyin lakamöta hwân kʼ öta tiga hidröu; wale haledra je hnahat mamoe me kau, je lakudra obaga me wahlu.

²⁵ E so ate me mokut hnyi anyita hmehma, ke so ame tubi öta hnen anyita hlohlo: anyin ate hia but ânyâ hwakecin ae kong kö Iehova Khonguta, öta me lakamöta, hwân kʼ öta tiga ûhnyûkong ke ne o but hnyi bong ang; ke ate me ca hia but long hofuc ho Iehova Khonguta.