Jeremia 29 - Iaai Bible 1901 (New Caledonia)

¹ WALANG onyen tusi wale a kunâ Jeremia perofeta ûheny Jerusalema ka ta je kolon wale a wahingatiny je bâ, me tavat bihut, me ta je perofeta, me tavat hia, waleji hnö Nebukaneza hna hom ûheny Jerusalema Babulona ai:

² (hwaban hna he hnö Jekonia than, me momo than, me je eûnuka, me je taben Juda me Jerusalema, me tavat ae metâ huliwa, me tavat leû fao ûhedra Jerusalema;)

³ a deny Elasa nöku Safana, me Gemaria nöku Helekia, (waleji hnö Zedekia than Juda hna kunâ Babulona ai kö Nebukaneza than Babulona) me ha, ka habe,

⁴ Walang hna ha hnö Iehova tuhan sabaoth, Khongu Isaraela, ka ta je bâ hia, waleji oge ûkhûmöng he ka hom ûheny Jerusalema Babulona ai, ka habe,

⁵ Bi umöbun dö uma me labā ju; ke bi ibun dö me an ju wan;

⁶ hok öiöbun dö me bi lakubun da me in; ke heleû âiân dö lakubun obaga, ke ûham-köuâ thö lakubun wahlu ka je baga, mʼ adre me he ka hnokoâ obaga me wahlu; me öbun e he ka se hia eling, me ca he bi ka wakhalet.

⁷ Ke elâm dö hnahicin taun waleji oge ûkhûnöng he ka hum öbun ka hnyin, ke hic dö kö Iehova hobi kâu e: anyin a hnyi hnahicin e, öbun e he ka hnyi hnahic.

⁸ Anyin a walang hna ha hnö Iehova tuhan sabaoth, Khongu Isaraela, ka habe, E so he ka ca omonu öbun ge anyibun je perofeta a ödra unyibun, me anyibun tavat bi khong, ke ca long öbun ka ta je bwi, waleji adre bwo hobi köbun.

⁹ Anyin adre me perofeta thoi köbun hnyi iök: oge ca kunʼ ödra, haingö Iehova.

¹⁰ Anyin a walang hna ha hnö Iehova, ka habe, E ka bekhot dö ta je huna a sevente hnyi Babulona, oge me he ka senʼ öbun, me ohwâdâ köbun hok hofuc ae so, mʼ adre me ohmetu öbun ka hnyi dok ang.

¹¹ Anyin ae khanö nya bi ta je ûnykûme, oge me ûnykûme köbun, haingö Iehova, je hna ûnykûme ae hnahic, ke ba kong hnyin, me me he ka hu gejon hnyi obiny.

¹² Ke öbun e he ka hao nya, me öbun e he ka he me hic könya, me oge me he ka ling öbun.

¹³ Ke öbun e he ka elom nya me ō nya, j öbun ka he ka elom nya hnen je hnyekubun ae bekhot.

¹⁴ Ke öbun e he ka ō nya, haingö Iehova, ke oge me he ka ohmetu öbun ûnyi hnyi hna hwenbâ, ke oge me he ka ûkhacaköu Öbun ûnyi hnyi ta je hnyei hia, me je dok hia, waleji oge obʼ öbun ka hnyin, haingö Iehova; ke oge me he ka ohmetu öbun ka hnyi dok waleji oge hwenbʼ öbun hnyin.

¹⁵ Anyin a öbun e hia but ha, ka habe, Haba Iehova ame hia but oâ hobi köta hnyi Babulona ta je perofeta.

¹⁶ Anyin a walang hna ha hnö Iehova ge than at ame tabâ theron anyi Davita me tavat hia, tavat adre me labā taun ang, a je liamekeiny möbun adre ca hnyi he möbun ka hnyi bâ;

¹⁷ walang hna ha hnö Iehova tuhan sabaoth, ka habe, Wâ bi, oge me he ka kunâ kodra hele vat, me hmiâ, me mok ae cap, ke oge me he ka wiʼ ödra, mʼ adre me ûcû me wan meta ae kong ke ca hnân bi han, anyin ae kong.

¹⁸ Ke oge me he ka hnu ödra ge hele vat, me hmiâ, me mok ae cap; ke oge me he ka hnödra ka he monu hnyi je dokhu hia eang hmeledrany, me me hnân hangâ, me kuku, me jû, me hnân haikongoâ hnyi ta je hnyei hia thithö waleji oge me he ka obʼ ödra ka hnyin:

¹⁹ anyin adre me ca hia but löng hok hofuc, haingö Iehova, waleji oge kunâ kodra a deny je athnyabaik a je perofeta, ke vesâkong, me ûkhûnöng, ke öbun e höcö löng, haingö Iehova.

²⁰ Anyin a wale, löng ju öbun hofuc ho Iehova, öbun hia thithö je bâ waleji oge kunâ Babulona ai ûhebun Jerusalema.

²¹ Walang hna ha hnö Iehova tuhan sabaoth, Khongu Isaraela, ga Ahaba nöku Kolaia, me Zedekia nöku Maseia li at ödru me perofeta thoi köbun hnyi iök, ka habe, Wâ bi, oge me he ka hnʼ ödru ka hnyi hnyamö Nebukaneza than Babulona, ke e ame he ka hlingʼ ödru hnyi hnyimaköbun.

²² Ke adre me he ka hom bongon hangâ gadru hnen ta je bâ hia thithö anyin at Juda a ödra hnyi Babulona me ha, ka habe, Ame be Iehova ka wiö u helâ me Zedekia, ke helâ me Ahaba, waleji a thong hnen than Babulona hnyi meic:

²³ can anyin ödre hia but ânyâ hwen monu hnyi Isaraela, ke ödre hia but bi ûnyi monu me laâiân lawaedru, ke ödre hia but ha je hofuc ae thoi hnyi iök, waleji oge ca hûna ködru; ke inya at ae khana e, me ohnatho, haingö Iehova.

²⁴ Ke u me he ka fuc ga Semaia at Nehelami me ha, ka habe,

²⁵ Walang hna ha hnö Iehova tuhan sabaoth, Khongu Isaraela, ka habe, Anyin a u je ûkhûnöng me je tusi hnyi iâm ka tavat hia a ödra hnyi Jerusalema, me kö Zefania nöku Maseia at bihut, me ka tavat bihut hia me ha, ka habe,

²⁶ A hia but Iehova otilö u hnân at bihut hwabö Jehoiada at bihut, mʼ öbun e he ka musi hnyi uma umö Iehova, ka tavat ae monu, me tavat adre me wiʼ ödra hnân perofeta, mʼ adre me hnʼ ödra ka hnyi utö hnân ce at hnyin, me je tö a fao.

²⁷ Ke walang ang anyin a ieû u je ca thao Jeremia at Anathoth, at ame wia e bi hnân perofeta köbun,

²⁸ Anyin a hnyi ûnyi e e ame kunâ kohmun ka hnyi Babulona me ha, ka habe, E tiga bec hna bâ: bi umöbun dö uma me labā ju, me bi ibun dö, me an ju wan?

²⁹ Ke haba Zefania at bihut ame aû tusi eling, ke ame löng Jeremia perofeta.

³⁰ Me ame o but hofuc ho Iehova kö Jeremia perofeta me ha, ka habe,

³¹ Ûkhûnöng dö ka je bâ hia me ha, ka habe, Walang hna ha hnö Iehova ge Semaia at Nehelami, ka habe, Anyin a Semaia ame perofeta köbun, ke oge ca kunâ, ke e ame olabageju öbun ka hnyi thoi;

³² anyin a wale, walang hna ha hnö Iehova, ka habe, Wâ bi, oge me he ka bi hwaban kö Semaia, me je mâtrâniny; ame ca he ka hu aten ame he ka laba unyin tavat ang, ke haba khaca e ame ca he ka hnyi wâ so, wale oge me he ka ânyâ ka lakeik, haingö Iehova, anyin a e ame hia but ha he ka ûkhin fuc me Iehova.