Jeremia 28 - Iaai Bible 1901 (New Caledonia)

¹ KE haba hnyi huna eling, hnyi hwâniny musi a Zedekia than Juda, hnyi huna a vakiny, hnyi tehi a thabûnginy, me ame fuc könya Hanania nöku Azura perofeta at ûheny Gibeona, hnyi uma umö Iehova hnyi hnyimakan tavat bihut me tavat hia, ka habe,

² Walang hna ha hnö Iehova tuhan sabaoth, Khongu Isaraela, ka habe, Oge hia but thamuâ hna ûhûkâlâköuâ anyin than Babulona.

³ E ka tiga ca um bi li huna oge me he ka ohmeto ka hnyi dok ang ta je omjehen hia uma umö Iehova, waleji hnö Nebukaneza than Babulona hna hom ûheny ang, me hom Babulona ai:

⁴ ke oge me he ka ohmetu Jekonia nöku Jehoiakima, than Juda ka hnyi dok ang, me ta je bâ hia anyin at Juda, tavat adre me he Babulona ai, haingö Iehova: anyin oge me he ka thamuâ hna ûhûkâlâköuâ anyin than Babulona.

⁵ Me haba Jeremia perofeta ame ha kö Hanania perofeta hnyi hnyimakan tavat bihut, me tavat hia adre me ûtitilen hnyi uma umö Iehova,

⁶ haingö Jeremia perofeta, ka habe, Amen: e na ânyâ helâ ju e Iehova: e na ohwâdâ ju Iehova hwan hofuc, waleji u je perofeta, he ka ohmeto ka hnyi dok ang ta je omjehen uma umö Iehova, me ta je bâ hia ûheny Babulona.

⁷ Ke so bi, walang ang long ju hofuc ang wale oge me he ka ha ka hnyi li hnyikönyâm, me li hnyikonyen tavat hia, ka habe,

⁸ Haba je perofeta a bödra ehac, ke a bilik bi möu, adre me perofeta ge ta je hnyei ae se hia, me ta je dokhu ae gan, he ka vat, me monu, me mok ae cap.

⁹ Haba perofeta at ame perofeta hnahic, ke e ka hwâdâ thö hofuc hwan perefota eling, adre me he ka wâhmakhmeto perofeta e a ga kunâ Iehova.

¹⁰ Me haba perofeta Hanania ame hom hna ûhûkâlâköuâ ûnyi hnyi hon nyi Jeremia perofeta me thamuâ e.

¹¹ Ke haba Hanania ame ha hnyi hnyimakan tavat hia, ka habe, Walang hna ha hnö Iehova, ka habe, Helâe oge me he ka thamuâ hna ûhûkâlâköuâ anyi Nebukaneza than Babulona ûnyi hnyi hon nyin ta je hnyei hia, ke tiga ca um bi li huna. Ke haba Jeremia perofeta ame he but.

¹² Me ame o but hofuc ho Iehova kö Jeremia, hwaban hnö Hanania perofeta hna thamuâ hna ûhûkâlâköuâ ûnyi hnyi hon nyi Jeremia perofeta, me ha, ka habe,

¹³ He thö ka ha kö Hanania perofeta, ke habe, Walang hna ha hnö Iehova, ka habe, U je hia but thamuâ hna ûhûkâlâköuâ a utö, ke u me he ka ânyâ ke je hna ûhûkâlâköuâ a fao me hnân hwaban.

¹⁴ Anyin a walang hna ha hnö Iehova tuhan sabaoth, Khongu Isaraela, ka habe, Oge hia but ip hna ûhûkâlâköuâ a fao hon nyin ta je hnyei hia eling, mʼ adre me he ka bi athnyabai Nebukaneza than Babulona: ke adre me he bi ka bi athnyabainy: ke oge hia but ham kâu minya je menoiny hnyot.

¹⁵ Me haba Jeremia perofeta ame ha kö Hanania perofeta, ka habe, Hanania lö, long ju walang ang; a ca kunö u Iehova; ke u je olabagejo tavat ang ka hnyi thoi.

¹⁶ Anyin a wale, walang hna ha hnö Iehova, ka habe, Wâ bi, oge me he ka obö u ûnyi eang hmeledrany; u me he ka mok hnyi huna eang, anyin a u je hia but fuc ûkhin fuc me Iehova.

¹⁷ Me ame mokcu Hanania perofeta hnyi huna eling, hnyi tehi a seveniny.