Jeremia 27 - Iaai Bible 1901 (New Caledonia)

¹ HABA hnyi hna hwân musi a Jehoiakima nöku Josea, than Juda, ame o but hofuc ang ûnyi ga Iehova kö Jeremia, ka habe,

² Walang hna ha könya hnö Iehova, ka habe, Anyâ thö hobi köu je tö me je hna ûhûkâlâköuâ, me ip hon nyem:

³ ke kunâ thö ta je ûnyi e ka than Edoma, me than Moaba, me thaniny je laku Amona, me thaniny Turo, me thaniny Zidona, a deny je ûthumetu tavat adre me o hnyi Jerusalema kö Zedekia than Juda;

⁴ ke hûna thö ka je tuhödra, ka habe, Walang hna ha hnö Iehova tuhan sabaoth Khongu Isaraela, ka habe: Walang hofuc öbun e he ka ha ka ta je tuhöbun;

⁵ ka habe, Oge hia but op hmeledrany, wale at me meno hon hmeledrany hnen manik man ae gan hmâ me benyik ae lau; ke oge me ham e ka at ae ûcû könya.

⁶ Ke walang ang oge hia but ham je hnyei ang kö Nebukaneza than Babulona, athnyabaik; ke haba khaca oge hia but ham kâu je menoiny hnyot hnân bi athnyabainy.

⁷ Ke ame he je hnyei hia thithö ka bi athnyabainy, me lakon, me laöbiny, ke ne o but ame o but ûen iny hnyei bi: ke ame he bi je hnyei ae se hia, me je than ae gan ka thaluâ e.

⁸ Ke haba hnyei me dokhu ame ca bi athnyabai Nebukaneza eling than Babulona me ca hna je nyidra ka hnyi hna ûhûkâlâköuâ anyin than Babulona, me oge me he ka kot hnyei eling, haingö Iehova, ge hele vat, me hmiâ, me mok ae cap, ke ne o but oge hia but oaûʼ ödra a deny hnyamen.

⁹ Ke haba Öbun ca löng bi ka anyibun je perofeta, me anyibun tavat bi khong, me anyibun tavat bwi, me anyibun tavat bihihwakecin, me anyibun tavat tren khong, tavat adre me fuc köbun me ha, ka habe, Ca he öbun ka bi athnyabainy than Babulona:

¹⁰ anyin adre me perofeta thoi köbun, mʼ adre me he ka oûsâkâûʼ öbun me ibun hnyei; me oge me he ka obʼ öbun me öbun e he ka mok.

¹¹ Ke haba hnyei tavat adre me hna je nyidra ka hnyi hna ûhûkâlâköuâ anyin than Babulona, me bi athnyabainy, me oge me he ka ip tavat eling ka laba bi hnyi idra, haingö Iehova; ke adre me he ka belökâ me labā e.

¹² Me oge me ha kö Zedekia than Juda helâ me ta je hofuc hia eling, ka habe, Hna but je nyibun ka hnyi hna ûhûkâlâköuâ anyin than Babulona, me bi athnyabainy, me iny hnyei me öbun e mot.

¹³ Anyin a ieû öbun e he ka mok, u me lakem ge hele vat, me hmiâ, me mok ae cap, helâji me hna ha ga Iehova ka hnyei ame höcö bi athnyabainy than Babulona?

¹⁴ Ke ca löng bi hofuc hwan je perofeta, tavat adre me fuc köbun me ha, ka habe, Öbun e ca he ka bi athnyabainy than Babulona: anyin a ödra adre me perofeta thoi köbun.

¹⁵ Anyin oge ca kunʼ ödra, haingö Iehova, ke adre me perofeta thoi hnyi iök; waleling me inye he ka obʼ öbun, mʼ öbun e he ka mok, öbun me je perofeta tavat adre me perofeta köbun.

¹⁶ Ke oge me fuc minya ka tavat bihut, me tavat hia eang, ka habe, Walang hna ha hnö Iehova, ka habe, Ca löng bi je hofuc hwan anyibun je perofeta, tavat adre me perofeta köbun me ha, ka habe, Wâ bi, adre me he ka ie hom hmetu je kaiainy uma umö Iehova ûheny Babulona: anyin a ödra adre me perofeta thoi köbun.

¹⁷ Ca ling ödra bi; bi athnyaba thö ka than Babulona me öbun e mot: anyin a ieû ame he ka ba wan taun ang?

¹⁸ Ke adre ne je perofeta, ke a ne e bi unyidra hofuc ho Iehova, e so adre me he walang ang ka khöû kö Iehova tuhan sabaoth, mʼ adre me ca hom Babulona ai ta je kaia a kolon biju a e biju hnyi uma umö Iehova, me hnyi uma umen than Juda me Jerusalema.

¹⁹ Anyin a walang hna ha hnö Iehova tuhan sabaoth ge li hmolom, me taben köiö ae gan, me je taben, me je kolon ta je ûnyi a hnen biju hnyi taun ang,

²⁰ waleji a ca hom Nebukaneza than Babulona waleji hnyi hnen hna hum Jekonia nöku Jehoiakima than Juda ûheny Jerusalema Babulona ai, me je taben hia hnyi Juda me Jerusalema:

²¹ eke, walang hna ha hnö Iehova tuhan sabaoth Khongu Isaraela ge ta je ûnyi a hnen biju hnyi uma umö Iehova me uma umen than Juda me Jerusalema, ka habe,

²² adre me he ka hom ta je ûnyi e Babulona ai, ke ame he ka hnen ling ke ne o but hnyi bong oge me he ka senʼ ödra hnyin, haingö Iehova; me oge me he ka hom ta je ûnyi e me ohmeto ka hnyi dok ang.