Jeremia 26 - Iaai Bible 1901 (New Caledonia)

¹ HABA hnyi hwân musi a Jehoiakima nöku Josea than Juda, ame o but hofuc ang ûnyi ga Iehova, ka habe,

² Walang hna ha hnö Iehova, ka habe, He thö ka tot hnyi hnyeuleny uma umö Iehova, me ha ka ta je tauniny Juda hia, tavat adre me o he ka hnyi khudrung hnyi uma umö Iehova, ta je hofuc hia thithö wale oge hûna he ka ha kodra; ca ikhâlâ bi ke hofuc.

³ Adre me ne he ka löng, me ve hmetu ûnyi hnyi dedra ta je gethen ae kong: me oge me he ka ietra ûnyi ae kong waleji oge ûnykûme he ka ânyâ kodra can ûkongon anyidra ta je huliwa.

⁴ Ke u me he ka ha kodra, ka habe, Walang hna ha hnö Iehova, ka habe, Öbun e ne ca ling nya he ka vheno anyik hnanyibu, waleji oge ip hnyi hnyimaköbun,

⁵ me long ta je hofuc hwan lathnyabaik a je perofeta, waleji oge kunâ köbun, me vesâ kong me kunʼ Ödra, ke öbun e ca long bi;

⁶ awe, oge me he ka wia uma eang me me helâ me Silo, ke oge me he ka wia taun ang hnân hangâ hnen je hnyei hia eang hmelen.

⁷ Ke haba tavat bihut, me je perofeta, me tavat hia adre me ling Jeremia ame ha ta je hofuc eling hnyi uma umö Iehova.

⁸ Ke a hia but Jeremia ha hia hna hûna kâu hnö Iehova he ka ha ka tavat hia, me ame kât e hnen tavat bihut, me ta je perofeta, me tavat hia me ha, ka habe, U me he but ka mok.

⁹ Anyin a ieû, u je perofeta hnyi iö Iehova me ha, ka habe, Ame he Uma kap eang ka helâ me Silo, ke ame he ka hnyot taun ang, ke ama ba at ame he ka labā e? Ke ame ûkhacaköu tavat hia kö Jeremia hnyi uma umö Iehova.

¹⁰ Ke a long ut ta je hofuc eling hnen je taben hnyi Juda, me ödrin e he ûhedrin hnyi uma umen than ka hnyi uma umö Iehova, ke ödrin e laba hnyi homagöule ae teb ûnyi gethen ame he ka hnyi uma umö Iehova.

¹¹ Me haba tavat bihut, me je perofeta, adre me ha ka je taben me tavat hia, ka habe, E ûcû but at ang he ka mok, anyin a e ame perofeta ûcon taun ang, helâ me hna long hnen je hnyikönyöbun.

¹² Me Jeremia ame ha ka ta je taben hia, me tavat hia, ka habe, Iehova ame kunö nya he ka perofeta ûnyi ae kong ka uma eang me taun eang a ta je hofuc waleji öbun e long.

¹³ Ke walang ang ânyâwia thö debun je gethen, me je hwakecibun, ke long ju ifuci Iehova Khongubun; me me he Iehova ka ietra ûnyi ae kong waleji e ame ha gabun.

¹⁴ Ke haba inya, wâ bi, inya but hnyi hnyamöbun: ânyâ thö könya helâ me ûnyi ae so me ûcû könya.

¹⁵ Ke so bi, wâhmakhmeto ju öbun, öbun e ne he ka hlingö nya, öbun e he ka ohwâdâ dra ae ba hnyikongon hubun, me hon taun ang me tavat adre me labā e: anyin ae hnathu Iehova ame kunö nya köbun he ka ha ka hnyi je hnyikönyöbun ta je hofuc ang.

¹⁶ Me ame ha hnen je taben me tavat hia ka tavat bihut me ta je perofeta, ka habe, E ca ûcû bi at ang he ka mok, anyin a e ame fuc köta hnyi iö Iehova Khonguta.

¹⁷ Me ame tot ke je hingatiny hnyei me ha ka tavat hia adre me ûkhacaköu, ka habe,

¹⁸ Haba Mika at Moresa ame perofeta hnyi bong bongu Hezekia than Juda; ke e ame ha ka tavat hia, ka habe, Walang hna ha hnö Iehova tuhan sabaoth, ka habe, Adre me he ka seû Ziona helâ me utkânâ, ke adre me he ka wia Jerusalema me me hna digic thatûnyi, me buceniny uma ka helâ me je dok ae gorany hnyi hnyot.

¹⁹ Hawa ga Hezekia than Juda me at Juda hia, adre me hlingâ e? hawa, e ame ca outö Iehova, me khöû kö Iehova, ke haba Iehova ame ietra hulo waleji e ame ha gadra? Ate me ne ânyâ hulo ae gan hmâ köta bi.

²⁰ Ke hu minya ke at ame perofeta hnyi iö Iehova jia Uria nöku Semaia at Kiriatha-jarim, ke e ame perofeta ûnyi ae kong hon taun ang me hnyei ang, helâ me ta je hofuc ho Jeremia:

²¹ Ke haba Jehoiakima than, me anyin tavat hia ae hwege, me anyin je taben hia, adre me long hwan, haba than ame elâm he ka hlingâ e; ke e khanö Uria but, me e ame ot, me kec, me he Aigupito ai:

²² ke haba Jehoiakima than ame ûkhûnöng Aigupito ai, jia Elemathana nöku Akebora, me keihen a tha ödra më Aigupito ai:

²³ ke adre me hum Uria ûheny Aigupito me hom e kö Jehoiakima than, me e ame hlingâ e ge hele vat me khûâ unyin ka hnyi erkemok anyin houmonu.

²⁴ Ke so bi, haba Ahikama nöku Sefana ame hadruo Jeremia, mʼ adre me ca hna e ka tavat he ka hlingâ.