Jeremia 25 - Iaai Bible 1901 (New Caledonia)

¹ HOFUC ame o kö Jeremia ge tavat Juda hia hnyi huna a vaki Jehoiakima nöku Josea, than Juda; wale huna a bâni Nebukaneaz than Babulona;

² waleji hofuc a ha Jeremia perofeta ka tavat hia hnyi Juda, me tavat hia adre me laba hnyi Jerusalema, ka habe,

³ Hwân hnyi huna a thötini Josea nöku Amona than Juda, ke ne o but hnyi bong ang, wale hnyi huna a twente theri, ame o but könya hofuc ho Iehova, me oge hia but ha köbun, me labö vesâ kong me ha, ke öbun e ca löng bi öbun.

⁴ Ke a hia but Iehova kunâ köbun je perofeta hia a je athnyabainy, ame vesâ kong me ûkhûnöng: ke öbun e ca hia but löng, me ca tâ je hnyikönyöbun he ka löng;

⁵ Haingodra, ka habe, Ve hmetu ju öbun ûnyi hnyi debun ta je gethen ae kong, me ûkonginy anyibun ta je huliwa, me öbun e he ka labā hnyei a ham köbun Iehova, me lakamöbun kâû ehac, ke ne o but nyiele balua:

⁶ ke ca hnu hoton ke je khong he ka bi athnyaba ködrin, me khudrung ködrin, ke ca he bi ka ohmönyini nya ge ta je huliwa anyin je hnyamöbun; ke oge me ca he ka okongu öbun.

⁷ Ke so bi, öbun e ca hia but ling nya, haingö Iehova; me öbun e he ka ohmönyini nya ge ta je huliwa anyin je hnyamöbun me öbun e he ka kong.

⁸ Anyin a wale, walang hna ha hnö Iehova tuhan sabaoth, ka habe, Anyin a öbun e ca long hok ta je hofuc.

⁹ Wâ bi, oge me be ka kunâ me hom je lap hia hnyi hwadro, haingö Iehova, me Nebukaneza than Babulona athnyabaik, me oi ödra ûcûdrin hnyei ang, me tavat adre me laba hnyin, me ta je hnyei hia igigilo e; ke oge me he ka ti ohiʼ ödra, me wiʼ ödra hnân kuko me jû, me ba wan nyiele balua.

¹⁰ Ke oge me he ka ohia gadra hwan senyin me hwan hobâ, me ifucin li at ödre tep faipoipo, me meainy li veto hnân omomono, me melaminy lamepa.

¹¹ Ke ame he ka ba wan hnyei ang hia, me hnân lâiâ, ke ame he ta je hnyei eling ka bi athnyabainy than Babulona hnyi sevente ta je huna.

¹² Ke e ka bekhötö ta je huna a sevente, me oge me he ka bi hwaban ka than Babulona ke tavat eling can hwakecidra ae kong, haingö Iehova, ke hnyei Kaledaia: ke oge me he ka wia e me me ba wan nyiele balua.

¹³ Ke oge me he ka oâ ka hnyei eling ta je hofuc hia oge hia but ha gan, wale hna sihnalimen hia hnyi tusi ang, waleji hnö Jeremia perofeta ge ta je hnyei hia.

¹⁴ Anyin ame he je hnyei ae se hia me je than ka thaluʼ ödra, ke oge me he ka bi hwaban kodra helâ me hwakecidra, me helâ me hna ânyâ hnen je hnyamödra.

¹⁵ Anyin a walang hna ha hnö Iehova Khongu Isaraela könya, ka habe, Hom dö tap wainainy hmonyin ang ûnyi hnyi hnyamok, me habelen je hnyei hia waleji oge me he ka kunö u ka hnyin.

¹⁶ Ke adre me he ka ic me ta tot, me ti hmonyin, can hele vat oge me he ka kunâ kodra.

¹⁷ Me oge me hom kaia ûnyi hnyi hnyamö Iehova, me habelen je hnyei hia waleji ame kunö nya Iehova ka hnyin:

¹⁸ wale Jerusalema me je tauniny Juda, me je thaniny, me je taben, mʼ adre me wiʼ ödra he ka ba wan, me hnân kuko me jû, me hangâ helâ me hnyi bong ang;

¹⁹ kö Farao than Aigupito, me lathnyabainy, me anyin je taben, me je lakeiny hia;

²⁰ me ke je tavat bi ae ve bongon hia, me ta je than hia thithö hnyei Uza, me ta je than hia thithö hnyi hnyei Filisiti, me Asekelona, me Gaza, me Ekerona, me je kolon hnyi Asedoda;

²¹ me Edoma, me Moaba, me je laku Amona;

²² me ta je thaniny hia Turo, me ta je thaniny hia Sidona, me je thaniny bomene hnyi ke keihen hoton köiö;

²³ me Dedana me Tema, me Buza, me ödra hia thithö tavat adre me giâ ke keihen leûnödra;

²⁴ me je thaniny hia Arabia, me ta je thaniny hia ke je hnyat ae ve bongon bi adre me laba hnyi hnyebuba;

²⁵ me ta je thaniny hia Zimeri, me ta je thaniny hia Elama, me ta je thaniny hia Madai;

²⁶ me ta je than hia hnyi hwadro, tavat ae hakekeny me sâkâû, ke at me ke at, me ta je dökhuiny hia hmeledrany hnyi hon kânâ: ke ame he than Sesaka ka ic hnyi hwa-bödra.

²⁷ Ke u me he ka ha kodra, ka habe, Walang hna ha hnö Iehova tuhan sabaoth, Khongu Isaraela, ka habe, Ijem dʼöbun, ke monu thö, me hmita but, me ta ju, ke ca tot hmetu bi, can hele vat oge me he ka kunâ köbun.

²⁸ Ke adre ne höcö hom kaia ûnyi hnyi hnyamâm ke ic, u me he ka ha kodra, ka habe, Walang hna ha hnö Iehova tuhan sabaoth, ka habe, E hnathu öbun e he ka ijem.

²⁹ Anyin a wâ bi, inya oge me hwân he ka oaatâ ûnyi ae kong ka taun wale adre wenyö kâu iök, ke hawa, adre me ca he minya ka bi hwaban köbun? Öbun e ca he ka he baû: anyin oge me he ka hawâ hele vat hobi kâu tavat hia thithö adre me laba eang hmeledrany, haingö Iehova tuhan sabaoth.

³⁰ Anyin a wale, u me he ka perofeta kodra ta je hofuc ang hia me ha kodra, ka habe, Ame he Iehova ka kuku ethö, me fuc goranyai ûnyi hnyi hnyaban ae kap; e ame he ka kuku ûcon haleny haginy hnahat; e ame he ka kuku ûcon aten hmeledrany hia helâ me tavat adre me ututo wan vine.

³¹ Ame he ka o mede ke ne o but hnyi can hmeledrany: anyin ae hu ivino anyi Iehova me ta je hnyei, e ame he ka ûhnei me tavat hia: ke haba tavat ae kong, e ame he ka hnʼ ödra ka hnyi hele vat, haingö Iehova.

³² Walang hna ha hnö Iehova tuhan sabaoth, ka habe, Wâ bi, ame he ka he ûokonguny ûnyi hnyi ke hnyei ka hnyi ke hnyei, ke ame he ka o weneû ae gan ûnyi hnyi can hmeledrany.

³³ Ke haba hnyi bong eling ame he ka e bi ta je hani Iehova ka e hnyi ke can hmeledrany ke ne o but ka hnyi ke can hmeledrany: adre me ca he ka tenge gadra, me hlu ödra, me konâm; ke adre me he ka hnân tatet hon kânâ.

³⁴ Kuku tenge thö, öbun tavat tuö mamoe; ke tenge thö me seset hnyi kânâ öbun je homakan hnahat mamoe, anyin a hwâdâ thö je bong hnân he ka hlingʼ öbun, ke oge me he ka tha oamemʼ öbun, ke öbun e he ka kolu helâ me kaia ae so.

³⁵ Ke ame he ka ba gethen deny tavat tuö mamoe he ka kec hnyin, me hnân homakan hnahat mamoe he ka mot hnyin.

³⁶ E hu hwatenge ge tavat tuö mamoe, me kuku tenge ge homakan hnahat! anyin a hia but Iehova okongoâ hnödra hna han hnyin.

³⁷ Ke adre ohnyibö je haginy mamoe ae hnahic ge hmonyin anyi Iehova.

³⁸ A hia but hna degecâ umen uma helâ me liona: anyin adre hia but wia idra hnyei me hnân lâiâ hnen hwegien at ûöveci, me hnen anyin hmonyin ae hwege.