Jeremia 24 - Iaai Bible 1901 (New Caledonia)

¹ HABA Iehova ame omanenâ könya, ke wâ bi, li tang meta adre ip hnyi hnyimakan uma umö Iehova: hnyi ûen Nebukaneza than Babulona ame hia but hum Jekonia nöku Jehoiakima than Juda, me je taben hnyi Juda, me tavat huliwa me tavat leû fao, ûhedra Jerusalema, me hum ödra Babulona ai.

² Haba ke tang meta, me, ti so helâ me je wan meta a bân: ke haba ke tang meta, me kong, ke ca hnân han, anyin ae kong.

³ Haba Iehova ame ha könya, ka habe, Jeremia lö, ieû u je wâ? ke haingök, ka habe, Je wan meta: haba je wan meta ae so, me e ka ti so, ke haba je wan ae kong, me e ka ti kong, ke ca hnân han anyin ae kong.

⁴ Me ame o but könya hofuc ho Iehova, ka habe,

⁵ Walang hna ba hnö Iehova Khongu Isaraela, ka habe, Oge me be ka wâhmakhmeto je bâ anyin at Juda, waleji oge kunʼ ödra ûhedra ang ka hnyi hnyei Kaledaia, mʼ adre me so, helâ me je wan meta eang ae so.

⁶ Ke oge me he ka wâ hmʼ ödra, mʼ adre me so, ke oge me he ka ohmetu ödra ka hnyi hnyei ang: ke oge me he ka up ödra goranyai, ke adre me ca he ka hagut ödra; ke oge me he ka te ödra, me ca he ka oc.

⁷ Ke oge me he ka ham kodra hnyok he ka wâhmakhmetu nya, a inya Iehova: ke adre me he ka bi lakeik, ke oge me he ka Khongudrin, anyin adre me he ka hmetu könya ge hnyok ae bekhot.

⁸ Ke haba je wan meta ae kong, ke ca hnân han anyin ae kong: E hnathu, haingö Iehova, oge me he ka hnö Zedekia than Juda helâe, me anyin je taben, me je kolon hnyi Jerusalema, je kolon tavat aten hnyei ang me tavat adre me laba hnyi Aigupito:

⁹ ke oge me be ka hnʼ ödra mʼ adre me he ka lili ödra monu ödra hnen ta je dokhu hia eang hmeledrany; mʼ adre me he ka hnân haikongoâ, me taben ûhiö me hlumâ, me hangâ hnyi ta je dok hia thithö oge me he ka obʼ ödra ka hnyin.

¹⁰ Ke oge me he ka kunâ kodra hele vat, me hmiâ, me mok ae cap, ke ne o but adre me oaûʼ ödra ûnyi hnyi hnyei oge ham kodra me lakamödra.