Jeremia 23 - Iaai Bible 1901 (New Caledonia)

¹ EKÖLÖ ge tavat tuö mamoe, tavat adre me ohia me oveseâ je mamoe oge me hat! haingö Iehova.

² Anyin a wale walang hna ha hnö Iehova Khongu Isaraela ge tavat tuö mamoe tavat adre me tuö lakeik, ka habe, Öbun e hia but oveseâ halek je mamoe, me obʼ ödra, me ca senʼ ödra; wâ bi, oge me he ka bi hwaban ûkongon anyibun ta je huliwa, haingö Iehova.

³ Ke oge me he ka hawâ kolon halek ta je mamoe ûnyi hnyi ta je hnyei hia waleji oge obʼ ödra ka hnyin, me ohmetu ödra ka hnyi hnyeuledra; ke adre me he ka hnokoâ sehia me ti sehia.

⁴ Ke oge me he ka otilâ hudrin tavat tuö mamoe, he ka ha ö ʼdra: ke adre me ca he hmetu ka ot, me hlohlo, me hia, haingö Iehova.

⁵ Wâ bi, ame he ka o je bong, haingö Iehova, ke oge me he ka oâ kö Davita? Khûen ae wisa, ke e ame he ka than me; musi me so, me ânyâ ûnyi ae wisa me ûnyi ae ûcû hnyi hnyei.

⁶ Hnyi bonginy je bong, ame he ka mot Juda, kʼ ame he Isaraela ka laba khotkic: ke walang ien adre me he ka hawâ, ka habe, Iehova wisaita.

⁷ Anyin a wale, wâ bi, ame he ka o je bong, haingö Iehova ke adre me ca he hmetu bi ka ha, ka habe, Kia inya Iehova at ame hom lakon Isaraela ûnyi hnyi hnyei Aigupito;

⁸ ke so bi, Kia inya Iehova at ame su je mâtrâniny lap anyû Isaraela ûnyi hnyi hnyei hnyi hwadro, me ûnyi hnyi je hnyei waleji oge obʼ dra ka hnyin: me adre me he ka labā idra bi.

⁹ Ge ta je perofeta. Ame vec eû hnyekuk me öbubuny hia je jeiok, oge me helâ me at ame monu ge grâk, me helâ me at ame ngâ ge waina; can ga Iehova me hwan hofuc ae kap.

¹⁰ Anyin a unöngötö hnyei ge tavat bi ûnyi monu; anyin ame tenge hnyei can hna hângâ: e atgec dö je dok a je sajilat hnyi hnyebuba: ke kong dedra je gethen, ke ca wisa tang hwegiödra.

¹¹ Anyin ame bi gan je perofeta me tavat bihut, eke, oge hia but wâ anyidra hulo hnyi umök uma, haingö Iehova.

¹² Anyin a wale ame he dedra je gethen ka helâ me dok ae haûhaû hnyi menekholom kodra, adre me he ka alin ödra mʼ adre me ta hnyin: anyin oge me he ka oâ kodra ûnyi ae kong, wale hunainy bi hwaban kodra, haingö Iehova.

¹³ Ke oge hia but wâ hwen monu unyin je perofetainy Samaria: adre me perofeta me haiö Baala, me omonoâ lakeik a at Isaraela.

¹⁴ Ke oge hia but wâ ûnyi ae ikiki unyin je perofeta hnyi Jerusalema; adre me bi ûnyi monu me vheno thoi, ke adre me ohwegiâ je hnyamen tavat ae kong, me me ca ve ödra hmetu hnyi anyidra hulo: ödra hia thithö adre me helâ me at Sodoma könya, ke haba tavat adre me labā e, ödra helâ me Gomora.

¹⁵ Anyin a wale, walang hna ha hnö Iehova tuhan sabaoth ge je perofeta, ka habe, Wâ bi, oge me he ka ha ö ʼdra ge khöhlöng me habelidra ge köiö hnân mekiny: anyin ame o but bi gan ka hnyi hnyei hia ûnyi ge je perofeta hnyi Jerusalema.

¹⁶ Walang hna ha hnö Iehova tuhan sabaoth, ka habe, Ca long ta je hofuc hwan ta je perofeta adre me perofeta köbun; adre me ûnö köbun ta je ûnyi baû bi; adre me ha hna omanenâ ûnyi eû hnyi hnyekudra bi, ke ca ûnyi bi hnyi hnyimö Iehova.

¹⁷ Adre me ha bala bi ka tavat adre me hûkötiö nya, ka habe, Iehova ame ha, ka habe, Öbun e he ka hnahic: ke adre me ha kodra hia thithö tavat adre me hnu hoton hwegien je hnyekudra bi, ka habe, E ba hulo ame he ka o köbun.

¹⁸ Anyin a ie at a mwi hnyi ûhnenamö anyi Iehova me me khana me long hwan hofuc? ie at ame hia but tevehlöng me long hnok hna ha?

¹⁹ Wâ bi, ame o but weneû anyi Iehova, wale anyin hmönyin, eke, weneû ame khenyo: e ame he hwege hon ban tavat ae kong.

²⁰ Ame ca he ka hmetu hmonyin anyi Iehova, ke ne o but e ame hia but ânyâ, ke ne o but e ame ohwâdâ je ûnykûmenen hnyekon: öbun e he ka ti wâhmakhmeto e hnyi je bong a biliny.

²¹ Oge ca kunâ je perofeta e, ke so bi, adre me wadring: oge ca fuc kodra, ke so bi, adre me perofeta.

²² Ke so bi adre ne hia but mwi hnyi anyik ûhnenamö, awe, adre me he ka olöngâ lakeik ge hok ta je hofuc, me ohmetu ödra ûnyi hnyi dedra je gethen ae kong, me ûkonginy anyidra ta je huliwa.

²³ Hawa, inya ang Khong hnyi dok ae hakekeny, haingö Iehova, ke ca Khong hnyi dok ae sâkâû?

²⁴ E hu at ama ikhölö hnyi dok ae iyong ke oge me ca he ka wâ? haingö Iehova. Hawa, e ca unöngöt drany me hmeledrany gak? haingö Iehova.

²⁵ Oge hia but long waleji ge hna ha hnen ta je perofeta, tavat adre me perofeta thoi hnyi iök me ha, ka habe, Oge hia but bwo, oge hia but bwo.

²⁶ Ame he ka e bi ke ne o but kehö eû hnyi hnyekon ta je perofeta tavat adre me perofeta thoi: wale tavat adre me perofeta iyawöâ je hnyekudra?

²⁷ Tavat adre me ûnykûme he ka ohnyingâ lakeik wale ge iök hnen je bwidra, wale adre me ve ha ka lahanödra, helâji me hnen lakamödra hna hnying iök ga Baala.

²⁸ Haba perofeta ae hu bwi, me hamen bi he ka ha bwi; ke haba at ae hu gan hok hofuc, hamen he ka ha hnathoâ hok hofuc. Hawa, e ûcû thatûnyin hwit me je wan? haingö Iehova.

²⁹ Hawa, e ûcû hok hofuc me meic? haingö Iehova, ke helâ me hama at ame kot omomono kic?

³⁰ Anyin a wale, wâ bi, ûcûk ta je perofeta, haingö Iehova, tavat adre me ivenâuköuâ hok ta je hofuc.

³¹ Wâ bi, ûcûk ta je perofeta, haingö Iehova, tavat adre me fuc ge bohmödra me ha, ka habe, E ame ha.

³² Wâ bi, ûcûk ta je perofeta tavat adre me bwi thoi, haingö Iehova, wale tavat adre me ha bi me omono lakeik hnen anyidra ta je thoi, me hwakecidra ae hop: ke oge me ca kunʼ ödra me hûna kodra; ke ame he ka ba troban ka hnyei ang ûnyi gadra, haingö Iehova.

³³ Ke e ka he ka hnei u hnen tavat ang, ame ne perofeta, ame ne at bihut me ha, ka habe, Ieû hok ûnyi ga Iehova? me u me he ka thu kodra, ka habe, Ie hok? Oge me he ka hna degeci öbun, haingö Iehova.

³⁴ Ke haba perofeta, me at bihut, a tavat adre me he ka ha, ka habe, Walang hok ûnyi ga Iehova, awe, oge me he ka bi hwaban ka at eling me anyin lap.

³⁵ Walang ûnyi öbun e he bi ka ûhaköuâ, a ke at me ke at, ka habe, Ieû hna thu hnö Iehova? ke ieû hna ha hnö Iehova.

³⁶ Ke ca he hmetu öbun ka ha hok ûnyi ga Iehova: anyin a haba ve ifucin tavat wale honödra bi je hok; anyin a öbun e hia but ohavâ hofuc hwan Khong ae mot, Iehova tuhan sabaoth Khonguta.

³⁷ U me he ka ha helâng ka je perofeta, Ra habe, Ieû hna thu hnö Iehova köu? ke ieû hnen hna ha?

³⁸ Ke öbun e ha, ka habe, Hok ûnyi ga Iehova; awe, walang hna ha hnö Iehova, ka habe, Can hnobun hna ha hofuc ang, ka habe, Hok ûnyi ga Iehova, ke so bi, oge ûkhûnöng köbun mʼ öbun e ca he ka ha, ka habe, Hok ûnyi ga Iehova:

³⁹ anyin a wale oge me he ka ti hnying öbun, ke oge me he ka obâ degeci öbun ûnyik, öbun, me taun, waleji oge ham köbun me lakamöbun:

⁴⁰ ke oge me he ka wiʼ öbun hnân haikongoâ nyiele balua, me hnân hmehma nyiele balua, a ca hnân he ka hnying.