Jeremia 22 - Iaai Bible 1901 (New Caledonia)

¹ WALANG hna ha hnö Iehova, ka habe, He thö ka hnyi uma umen than Juda, me ha hofuc ang eling, ka habe,

² Than Juda lö, löng ju hofuc ho Iehova, u at ame tabâ theron anyi Davita, u, me je athnyabaem, me lakem, tavat adre me dit hnyi je homagöule ang.

³ Walang hna ha hnö Iehova, ka habe, Anyâ thö wisa me ûnyi ae ûcû, ke omelo thö at adre söh ûnyi hnyi hnyamen at ûöveci: ca he ka ânyâ monu, me ûokonguny ka atkanyua, me nakahme, me safac, ke ca hingâlâ dra ae ba hnyikongon hnyi dok ang.

⁴ Anyin a öbun e ne he ka ânyâ ûnyi e, me ame he ka dit hnyi je homagouleny uma ang je than tavat adre me tabâ theron anyi Davita, adre me laba hon je kariota me hors, e me je athnyabainy me je lakeiny.

⁵ Ke öbun e ne ca löng je hofuc ang, oge me khemanyin gak bi, haingö Iehova, a gʼ ame he ka ba wan uma eang.

⁶ Anyin a walang hna ha hnö Iehova ge uma umen than Juda, ka habe, U Gileada könya, ke ban Lebanona: ke so bi, e hnathu, a oge me he ka wiö u me hnân hnyebuba, je taun ae ba aten.

⁷ Ke oge me he ka penapena gam tavat ohia, ae ve hu ûnyi hnân vat: ke adre me he ka sö but ânyâm je arasi adre ûca, me khûâ ka hnyi meic.

⁸ Ke ame he je hnyei ae se hia ka gethen hnyi taun ang me ve ûhaköuâ, ha habe, Can ieû Iehova ame ânyâ helâng ka taun ang ae gan?

⁹ Ke adre me he ka thu, ka habe, Can hnödra hna degec ûhihinyköu anyi Iehova Khongudrin, me khudrung ka ke je khong, me bi athnyabaidrin.

¹⁰ Ca tenge bi can at a mokcu, ke ca mâng bi gan: ke tenge hwege bi thö ge at ame he; anyin a e ame ca he ka hmetu, me wâ hnyei adre hnokoâ e hnyin.

¹¹ Anyin a walang hna ha hnö Iehova ga Saluma nöku Josea than Juda, at ame hwo hwabö Josea a kamen, at ame he but ûnyi hnyi dok ang, ka habe, E ame ca he ka hmetu kââng;

¹² ke e ame he ka mokcu hnyi dok adre hom bâ e ka hnyin, ke ame ca he hmetu bi ka wâ hnyei ang.

¹³ Ekölö gan at ame op umen uma hnyi hwakecin ae ca wisa, me je hnyeuleny hnyi hwakecin ae ca ûcû: at ame kap huliwa ge tavat me ca bi hwaban bi, ke ame ca ham kâu troban;

¹⁴ at ame ha, ka habe, oge me he ka op umök uma ae lau, ke bwang je hnyeule, ke e ame kave anyin je mamalama; ke adre me tube ethö hnyin ge arasi, me botro ge botru ae dra.

¹⁵ Hawa, u me he ka musi, anyin a u me bebeönua hnyi arasi? hawa, a ca han kâmâm, me ic, me ânyâ wisa, me ûnyi ae ûcû? me e ame so but.

¹⁶ E ame owisa ivino anyin at ae theduoc me at ae vec; me ame so but e. Hawa, ame ca wâhmakhmetu nya e? haingö Iehova.

¹⁷ Ke haba li emâkâm me hnyekom hobi kâu hnâm hna behnyekon, me he ka hingâlâ dra ae ba hnyikongon, me hobi kâu hna okongâo, me ûokonguny, me me ânyâ thö.

¹⁸ Anyin a wale, walang hna ha hnö Iehova ga Jehoiakima nöku Josea, than Juda, ka habe, Adre me ca he ka tenge gan me ha, ka habe, Ekölö ge keik! Ke ekölö ge hanik! ke ekölö ge anyin hmanenang!

¹⁹ Adre me he ka konâm e helâ me hna konâm asina, adre me he ka lelö e me khûâ hnyi hoton je homagouleny Jerusalema.

²⁰ Ölö thö Lebanona ai me hongot; ke hongot dö goranyai hnyi Basana: me hongot hnyi Abarima; anyin adre hia but ohia je oûnykûmâm.

²¹ Oge fuc köu hnyi ânyâm sot, me u me ha, ka habe, Oge me ca he ka löng. Wale hwakecâm kʼ u tiga ûhnyûkong, ke u je ca löng ifucik.

²² Adre me he ka han tavat adre me tuö halem ta je mamoe ge ang, ke ame he je oûnykûmâm ka bâ; me u me he ka hmehma me hlohlo can ânyâm ta je monu hia thithö.

²³ At ame laba hnyi Lebanona lö, at ame bi umen uma hnyi je arasi, nakaem, e ka o vec köu, wale vec helâ me momo ame vec hnyekon e ka he ka hnokoâ.

²⁴ Kia inya haingö Iehova, eja ke ne a ne hnân okeceâ haten hnyi hnyam a metök könya jia Konia nöku Jehoiakima than Juda, oge me he ka oc degeci u e;

²⁵ me oge me he ka hnö u ka hnyi hnyamen tavat adre me elâm he ka hlingö u, me ka hnyi hnyamen tavat waleji u me outen, wale ka hnyi hnyamö Nebukaneza than Babulona, me ka hnyi hnyamen at Kaledaia.

²⁶ Ke oge me he ka obö u me hinyâm at a hnöku u ka hnyi ke hnyei bi, waleji adre ca hnöku öbun hnyin; ke öbun e he ka mok eling.

²⁷ Ke haba hnyei waleji adre me weny he ka hmetu ka hnyin, adre me ca he ka hmetu ka hnyin.

²⁸ Hawa, kaia kânâ ae hmouca adre me hûkotiâ at ang, wale a Konia? hawa, e kaia a ca hnân senyinâ? anyin a ieû adre digic ödra, e me je mâtrâniny, ke adre obʼ ödra ka hnyi hnyei ae ca khanʼ ödra bi?

²⁹ Hmeledrany, hmeledrany, hmeledrany lö, löng ju hofuc ho Iehova.

³⁰ Walang hna ha hnö Iehova, ka habe, Sihnalimen ju at ang a gʼ ame he ka ba nokon, ke ame ca he ka so bongon je bong: anyin ame ca he ka hnahic ke mâtrâniny, at ame he ka tabâ theron anyi Davita, me musi hmetu hnyi Juda.