Jeremia 20 - Iaai Bible 1901 (New Caledonia)

¹ KE haba Pasur, nöku Imer at bihut, ke at musi ae beönua hnyi uma umö Iehova, ame ling Jeremia ame perofeta ta je ûnyi eling.

² Me haba Pasur ame fuc kö Jeremia perofeta, me ca e, a ohmâ hnyi utö ae hnyi homagouleny Beniamina ethö, waleji hnyi uma umö Iehova.

³ Ke haba nyi Pasur ame hum Jeremia ûnyi hnyi utö adre ce at hnyin. Me Jeremia ame ha kâu, ka habe, Ame ca he Iehova ka ha hmetu iâm me Pasur, ke jia bi a Magora-misabibi.

⁴ Anyin a walang hna ha hnö Iehova, ka habe. Wâ bi, oge me he ka wiö u bi hnân ooti u bi me la waem hia: ke adre me he ka ta ge hele vat anyin je iwahnaihmiony mödra, ke ame he li emâkâm ka wâ e: ke oge me he ka hna at Juda hia ka hnyi hnyamen than Babulona, ke ame he ka hum ödra Babulona ai, me hlingʼ ödra ge hele vat.

⁵ Ke haba khaca oge me he ka hna tang omjeûiny taun ang, me ta je troban gan, me ta je ûnyi ae ûnyi hnathu hnyin, eke, ta je omjeû anyin je than Juda hia, oge me he ka ham ka hnyi hnyamen ta je iwahnaihmiony mödra, ke adre me he ka sei ödra, me hum ödra, me tha he mödra Babulona ai.

⁶ Ke haba u Pasur, me tavat hia adre me tha laba möu, öbun e he ka bâ: ke u me he ka o hnyi Babulona, me mokcu eling, me konim u eling, u me lahânâm hia, waleji u je perofeta thoi kodra.

⁷ Iehova lö, u je hia but cubic nya, me oge me hmehmela: u hwege huk, me ame tom: iny taben ûhiö hnyi je bong hia, ame hlumö nya hnen ke at me ke at hnyi ta je bong hia.

⁸ Anyin a hnyi ûen oge me fuc, oge me kuku; oge me hongot, ka habe, Ûokonguny me söh: anyin adre wia hofuc ho Iehova, me hnân haikongu nya, me ûhiö hnyi je bong hia.

⁹ Ke oge me ha, ka habe, Oge me ca he ka hâiâ e, me fuc hmetu hnyi ien, ke haba, e bi û hnyi hnyekuk helâ me meic ae mot, adre hlöng hnyi hnyin je jeiok, ke iny sënyin dut anyin hokhnyok, ke pason.

¹⁰ Anyin a oge hia but long hna ûhaikonguny hnen tavat ae se hia, me hna öbubuny hnyi je ke keihen hia. Haingödrin a je hing waek, tavat adre me tuö hnok hna haûhaû, ka habe, Haikongoâ ju e, mʼ ohmun e he ka hnyi haikongoâ; ame ne he ka hmehmela mʼ ate me he ka hwege hon, mʼ ate me he ka bi hwaban kâu.

¹¹ Ke e bi Iehova unyik helâ me taben vat ae hwege: anyin a wale ame he ka haûhaû but tavat adre me hnu nya, me ca tudra bi: adre me he ka hmehma gan hmâ, anyin a ca tudra bi, adre me ca he ka hnying anyidra hmehma nyiele balua.

¹² Iehova tuhan sabaoth lö, at ame cubec tavat ae wisa at ame wâhmakhmeto je hna ûnykûme me je hnyok, e so oge me he ka wâ hnâm hna bi hwaban kodra; anyin oge hia but omanenâ köu hok hofuc.

¹³ Khumöng dö kö Iehova, oganö Iehova thö: anyin a e ame hia but hûgûnâ hanon at ae theduoc ûnyi hnyi hnyamen tavat ae kong.

¹⁴ Eka mok bong adre hnöku nya hnyin: e so adre me ca haisoâ bong a hnöku nya hnyin bai

¹⁵ Eka mok at ama thumetu cica, ka habe, A o but nokom da, ame osenyinâ e.

¹⁶ E so ame he at e ka helâ me je taun waleji a hagutâ Iehova, me ca ietra bi: ke so e ame long hwakuku hnyi hnyomakatu, me hwahongot hnyi jebigo;

¹⁷ anyin a e ame ca hlingö nya ûnyi eû hnyi hnyok: me me erkemok könya hnyeku bai me erkin bala thibut hnyekon.

¹⁸ Anyin a ieû oge me o but ûhek hnyi hnyok he ka wâ vec me hlöuhlöu, me me he ka um dö bonguk je bong hnyi hmehma?