Jeremia 2 - Iaai Bible 1901 (New Caledonia)

¹ KE ame o but könya hofuc ho Iehova, ame ha, ka habe,

² He thö, hongot dö hnyi je hnyikonyen Jerusalema, ka habe, Walang hna ha hnö Iehova, ka habe, Inya oge me ûnykûmi u wale ge hwakecâm ae menyik ku tiga hlu, me ânyâm betenge waleji hnyi hnâm hna ûköcö: waleji hnyi hnâm hna he hotuk hnyi hnyebuba, hnyi hnyei adre ca belökâ.

³ E kap Isaraela kö Iehova, wan a bân hnyi troban hnyei: adre me ha hnaûhangöâ tavat adre me utâ e; ame he ka o ûnyi ae kong kodra, haingö Iehova.

⁴ Lap anyi Jekob lö, long ju hofuc ho Iehova, me öbun je lap hia hnyi lap anyi Isaraela:

⁵ Walang hna ha hnö Iehova, ka habe, Ieû ke ûnyi ae ca wisa a wa lakamöbun unyik, mʼ adre me oûsâkâû ödra mönya, me hnu hoton unyi ae ba onyen, me bibi hop?

⁶ Ke haba khaca, adre me ca ha ka habe, Ewa Iehova at ame suʼ öta ûnyi hnyei Aigupito; at ame hum öta hnyi hnyebuba, wanben hnyei a hnyei baga me hu je uthankong, hnyi hnyei ae hwahwacit me hmenon mok, hnyi hnyei ame ca vheno hnen at, ke ba at ame labā e?

⁷ Ke oge me hum öbun ka hnyi hnyei ae hu jeûiuy, he ka an wan me soiny; ke öbun e o but me oikikiâ ik hnyei, me wia lakeik me me ûnyi ae ikiki.

⁸ Haba tavat bihut adre me ca ha ka habe, Ewa Iehova? ke haba tavat adre me huliwan hnanyibu, me ca khanʼ ödra inya; ke haba tavat musi adre me ûkhin fuc mönya, ke haba je perofeta adre me perofeta ga Baala, me hnu hoton ta je ûnyi ae ba troban.

⁹ Anyin a wale, oge ma he hmetu ka ivino möbun, haingö Iehova, ke oge me he ka ivino me laöbibun.

¹⁰ Ke he thʼ öbun ka hnyi je bomeneiny Kitim, me wâ; me ûkhûnöng dö Kedara ai me ûnykûme wia; mʼ adre me wâ ame ne hu ûnyi helâe ehac.

¹¹ Hawa, e hu hnyei ame wia je khongon, ke ca je khong bi? ke so bi, a hia but lakeik wia anyidra hmanenang, mʼ adre me hom bi ûnyi ae ba troban.

¹² Drany lo, lâiâ ju ge ûnyi ang, ot gan hmâ ju, me hlöuhlöu ju, haingö Iehova.

¹³ Anyin a lo li monu a ânyâ lakeik; a gʼ adre hia but hna degeci nya köiöiny möt ame pupua, me thö hobi kodra bi je an, a je an ae hmouca, ame ca hom behânâ köiö.

¹⁴ Hawa, athnyaba bi Isaraela? hawa, e bi athnyaba adre ûco kʼ adre hnokoâ hnyi hnyaba? can ieû adre söh e?

¹⁵ Ame hia but kuku je nak liona, me fuc hwege goranyai: ke adre hia but öba wan iny hnyei; adre me thong anyin je taun, me ba at ame labā e.

¹⁶ Haba je lakon Nofi, me Tapenes adre hia but thö koronainy bâm.

¹⁷ Hawa, u je ca ânyâ hobi köu bi, hnyi hnâm hna digic Iehova a Khongom, waleji hnyi ûen e ame su u eû hnyi gethen?

¹⁸ Ke walang ang ieû u me ânyâ hnyi gethen ûheny Aigupito, he ka ijem köiöiny Sihora? ke ieû u me ânyâ hnyi gethen ûheny Asuria, he ka ijem köiöiny Wagewe?

¹⁹ Ame he ka thao u hnen bi ânyâm hulo, ke ame he ka û u hnen bi hnâm je hna kolu: anyin a wale khanö u thö me wâ ûnyi ae hiny me kong, wale ge hnâm hna digic Iehova a Khongom, ke u je outö nya, haingen Than Iehova tuhan sabaoth.

²⁰ Anyin a hwân ehac oge hia but thu degecâ ânyâm hna ûhûkâlâköuâ, me thamuâ hna cö u; ke haingâm, ka habe, Oge me ca he ka bi athnyaba; anyin a u me mokut hon je bucen hia ae beû, ke hmelen je ûö hia ae hât, he ka bi ûnyi monu.

²¹ Ke haba u, me oge me tä helâ me vine ame khulelau, hatong ae so: ieû gam u me hwio gak, ke u vine but ae monu me atkanyua?

²² Eja ke ne u je ne söû soda, me hom gânâ sop, e bala bi hnyi hnyimakök ânyâm hulo, haingen Than Iehova.

²³ U ma kâmâu he ka ha, ka habe, Iny ca monu, kʼ oge me ca hnu hoton ta je Baala? wâ ju dem gethen hnyi hnyigöulen bucen, khanö u thö hnâm hna ânyâ: u nak kamela ame he logot, ame he monu hnyi dem gethen:

²⁴ asinainy hnyot at ame khenenâ hnyebuba, ame bubune ang hnyi weny hnyekon; ie at ame he ka ohmeto e hnyi weny? ame ca he ka osēnyini ödra bi tavat adre me elâm e, adre me he ka wâ e hnyi anyin tehi.

²⁵ Tuö ju li cam wâ e nye ba tangen hnyeûcam, me jeköwem wâ e nye beic: ke u je ha, ka habe, E ûnyi baû: e ba; anyin oge hia but betenge ge ta je atkanyua, ke oge me he bala ka hnu hotudra.

²⁶ Ame hmehma at venöu at ka wâ e, helâe ame he ka hmehma lap anyi Isaraela; walödra e ta je than, me ta je taben, me tavat bihut, me ta je perofeta;

²⁷ wale tavat adre me ha ka hnyiban utö, ka habe, Kamök u; me ka veto, U je hnöku nya: anyin adre me hotudra könya, me ca hnyimakodra bi; ke hnyi ûen anyidra vec, adre me he ka ha, ka habe, Todrö me omeli ohmun.

²⁸ Ke ewa je khongom waleji u je ânyâ hobi köu? Hamödrin he ka tot, a ne khanʼ ödrin he ka omeli u hnyi ûen u me vec hnyin: anyin ae ûcû ûseiny ânyâm je khong, Juda, me ânyâm je lap.

²⁹ Geû öbun e ivino mönya? öbun hia öbun e hia but ûkhin fuc mönya, haingö Iehova.

³⁰ Oge kot je lakubun ke ûnyi baû bi; adre me ca kap hna nʼ ödra; hnen anyibun hele vat hna an anyibun je perofeta, helâ me liona at ame ohia.

³¹ Do lö, wâ ju hofuc ho Iehova. Hawa, oge hia but helâ me hnyebuba ka at Isaraela? ame ne hnyei ae khömet? anyin a ieû ame ha lakeik, ka habe, Ohmun e monu, ohmun e ca he hmetu köu?

³² Hawa, ame he hlu ka hnying je hna theibâ e, ke hlu ame tep faipoipo ka hnying bi ûkhaûen? ke haba lakeik adre me hnying nya hnyi je bong a ca hnân bi aû.

³³ U je ti theibi u bi he ka ûköcö! anyin a wale u je nâ je momo ae kong ge je hwakecâm.

³⁴ Ke adre me wâ minya hnyi obiny ânyâm je ûkhaû dren tavat ae theduoc ae ba hnyikongudrin; oge ca wâ e hnyi dek adre thu ka hnyin, ke hon je ûnyi e hia.

³⁵ Ke so bi, u je ha, ka habe, E ba monu gak; e hnathu, e ame ohmeto anyin hmonyin gak, wâ bi, oge me he ka ivino möu, anyin a u je ha, ka habe, Oge ca ânyâ hulo.

³⁶ Anyin a ieû u me labö ngenu monu gan me wia dem je gethen? u me he ka hmehma ge Aigupito, helâji me hnâm hna hmehma ge Asuria.

³⁷ Ke u me he ka he ûhem e me li hnyamâm hon bâm: anyin a Iehova ame hna degecâ ta je ûnyi u me geju kâu, ke u me ca he ka sot gadra.