Jeremia 19 - Iaai Bible 1901 (New Caledonia)

¹ WALANG hna ha hnö Iehova, ka habe, He thö ka ûco kaia kânâ adre op me hom ke je hingatiny tavat, me ke je hingatiny tavat bihut;

² ke he thö ka hnyi hnyigöulen bucen anyin nöku Hinom, ae hnyi homagouleny Harsith, ke khetâ thö eling ta je hofuc oge me he ka ha köu:

³ me ha, ka habe, Long ju öbun hofuc ho Iehova je than Juda, me aten Jerusalema; walang hna ha hnö Iehova tuhan sabaoth, Khongu Isaraela, ka habe, Wâ bi, oge me he ka oâ ûnyâ ae kong ka hnyi hon dok ang ke ame he ka tenge met hnyi hnyikonyen tavat adre me löng.

⁴ Anyin adre hia but hna degeci nya me okebongonâ bi dok ang, me leû utö eang ae bo so ka ke je khong, waleji ae ca khanʼ ödra, ödra me je lakamödra me je than Juda; ke adre hia but öunöngötâ dok ang ge dra dren tavat ae ba hnyikongudrin:

⁵ me op je dok ae gorany anyi Baala, he ka thong je lakudra ge meic hnân hudiny leû kö Baala; waleji oge ca hûna, ke oge ca ha, ke oge ca ûnykûme;

⁶ anyin a wale, wâ bi, ame he ka o je bong, haingö Iehova, ke adre me ca he hmetu ka ha ka dok ang Tofet me hnyigöulen bucen anyin nöku Hinom, ke so bi, Thopiny hlingö at.

⁷ Ke oge me he ka oûnyibaûâ ûhnenamö anyin Juda me Jerusalema hnyi dok ang; ke oge me he ka otai ödra ge hele vat hnyi hnyimakan je iwahnaihmiony mödra, me hnen hnyamen tavat adre me elâm he ka hlingʼ ödra: ke oge me he ka hom ta je unyidra hnân an ta je meno ame gâ ethö, me je menoiny hnyot.

⁸ Ke oge me he ka wia taun ang hnân kuko me jû; ame he tavat adre me gethen hnyin ka lâiâ me jû, can ta je mok hnyin.

⁹ Ke oge me he ka hnʼ ödra he ka an viny lakudra obaga, me viny lakudra wahlu, ke adre me he ka ve an viny je lawaedra, hnyi hna igigilo, me hna thelöng, wale ame he ka oveci ödra hnyin hnen je iwahnaihmiony mödra, me tavat adre me elâm he ka hlingʼ ödra.

¹⁰ Me u me he ka thö kaia hnyi hnyimakan tavat adre me tha he möu.

¹¹ Ke u me he ka ha ködrin, ka habe, Walang hna ha hnö Iehova tuhan sabaoth, ka habe, Oge me he ka ohmouca hnyei ang helâ me hna thö kaia kânâ, wale ae ca khanʼ ödra he ka obekhötâ hmetu: ke adre me he ka khon komok hnyi Tofet, ke ne o but ame ba but dok hnân khon komok hnyin.

¹² Haingö Iehova, ka habe, Oge me he ka ânyâ helâe ka dok ang, me tavat adre me labā e, me wia taun ang me me helâ me Tofet:

¹³ ke haba ta je uma hnyi Jerusalema, me ta je uma umen je than Juda, a je uma adre oikikiâ, ame he ka helâ me Tofet, wale je uma hia thithö waleji adre me leû utö ae bo so ka hnyi hon ka ta je ûnyi hia hnyi drany, me hingâlâ hudiny ic ka ke je khong.

¹⁴ Me ame o thö Jeremia ûheny Tofet, waleji hnyi hnö Iehova hna kunâ he ka perofeta; me e ame tot hnyi hnyeuleny uma umö Iehova, me ha ka tavat hia thithö, ka habe,

¹⁵ Walang hna ha hnö Iehova tuhan sabaoth, Khongu Isaraela, ka habe, Wâ bi, oge me he ka oâ ka taun ang me ta je tauniny hia je ûnyi ae kong hia thithö, waleji oge ha gan: anyin adre hia but ohwegiâ je nyidra, me ca löng bi ta je ifucik.