Jeremia 18 - Iaai Bible 1901 (New Caledonia)

¹ HOFUC ame o kö Jeremia ûnyi ga Iehova ame ha, ka habe,

² Todrö, he thö ka hnyi uma umen at ame up kaia ke oge me he ka ölöngi u e ge hok hofuc.

³ Me oge me he ka hnyi uma umen at ame up kaia, ka wâ bi, e ame ânyâ anyin huliwa hon li waengen.

⁴ Ke ame kong ut kaia hnyi hnyamen at ame up kaia waleji e ame op, me e ame op hmetu e, me me ke kaia, helâ me weny at ame up kaia he ka ânyâ.

⁵ Me ame o but könya hofuc ho Iehova ame ha, ka habe.

⁶ Lap anyi Isaraela lö, hawa, e ca khanö nya he ka ânyâ köbun helâ me man at ang ame up kaia? haingö Iehova. Lap anyi Isaraela lö, wâ bi, öbun ûcû hnyi hnyamok me kânâ ae kece hnyi hnyamen at ame up kaia.

⁷ Hnyi ûen oge me he ka fuc ge ke hnyei me ke dokhu, he; ka oc ut, me hagutâ me ohia e;

⁸ ame ne he hnyei eling wale oge me fuc gan he ka hmetu ûnyi hnyi anyidra hulo, awe, oge me he ka ietra ûnyi ae kong waleji oge ûnykûme he ka ânyâ kodra.

⁹ Ke haba hnyi ûen oge me he ka fuc ge ke hnyei, me ke dokhu he ka otilâ me tā e;

¹⁰ ame ne ânyâ hulo hnyi hnyimakök, me ca löng ifucik, awe, oge me he ka ietra so, waleji oge ha he ka ohnahici ödra hnyin.

¹¹ Ke walang ang, he thö ka ha ka at Juda me aten Jerusalema, ka habe, Walang hna ha hnö Iehova, ka habe, Wâ bi, oge me he ka penapena ûnyi ae kong hobi köbun, me ûnykûme hna ûnykûme he ka ânyâ köbun: ve hmetu ju öbun walang ang ûnyi hnyi debun ta je gethen ae kong, ke osoâ but debun je gethen me anyibun ta je huliwa.

¹² Ke adre me ha, ka habe, E ûnyi baû bi: anyin ohmun e he ka hnu hoton anyihmun ta je bihihwakecin, me ve ânyâ hoton ihwegien je hnyekuhmun ae kong.

¹³ Anyin a wale, walang hna ha hnö Iehova, ka habe, Hnö thʼ öbun unyin ta je hnyei, ie at ame löng je ûnyi a helâe a hia but ânyâ ûnyi ae ti kong hnen hluiny Isaraela.

¹⁴ Hawa, ame he kionainy Lebanona ka kolu ûnyi hnyi hon kicin utkânâ? ame he ka hme köiö katebu wale ame hingölö ûheny hnyi dok ae sâkâû?

¹⁵ Anyin adre hnying nya lakeik, adre hia? but leû utö ae bo so ka ûnyi ae ba onyen; ke adre hia but ohaû ödra bi hnyi dedra je gethen, a je gethen kâû adrem, he ka he hnyi je ong gethen, adre ca okhibö goranyai;

¹⁶ me adre me wia idra hnyei hnân lâiâ, me jû nyiele balua; ame he tavat hia adre me gethen unyin ka lâiâ me nyinyikâ je bödra.

¹⁷ Oge me he ka ovesei ödra hnyi hnyimakan iwahnaihmiony helâ me hnen ang hwei; oge me he ka hotuk me ca hnyimakök bi kodra, hnyi bonginy anyidra vec.

¹⁸ Me adre me ha, ka habe, Ai öbun mʼ ate me he ka ânyâ je bihihwakecin kö Jeremia; anyin ame ca he ka hia hnanyibu unyin at bihut, me ûhnenamö unyin at ae metâ, me hofuc ûnyi ge perofeta. Ai öbun, ate me he ka kot e ge bohmen, ke ca he bi öta ka tevehlöng bi hwan ta je hofuc.

¹⁹ Iehova lö, tevehlöng ju könya, ke löng ju ifucin tavat adre me ivino mönya.

²⁰ Hawa, adre me he ka bi hwaban so ge kong? anyin adre hia but hiny thop, me inye he ka mok. Ûnykûme ju waleji hnök hna tot hnyi hnyimâkâm he ka khöûâ so hobi kodra, me ohavâ ânyâm hmonyin gadra.

²¹ Anyin a wale hna but lakudra ka hnyi hmiâ, ke hnʼ ödra but ka hnyi maniny hele vat, ke ame he ka ba but lakon laöiödra, me je safac bi, ke ame he mok ka hlingâ obaga, adre me he ka hlingâ anyidra wahidröu ge hele vat hnyi vat.

²² E so adre me long tenge hnyi umödra je uma, hnyi ûen u me he ka ie oâ kodra deo vat; anyin adre hia but hiny thop hnân odili nya, me ikhâlâ je hnewe hnân li cak.

²³ Ke so bi, Iehova lö, e khanö u hia anyidra ûhnenamö gak hnân he ka hlingö nya; ca he ka hna hwakecidra ae kong, ke ca he ka kot degecâ anyidra monu unyi hnyi hnyimâkâm: ke so he ka hagutʼ ödra but hnyi hnyimâkâm; ke ânyâ thö kodra hnen ânyâm hmonyin.