Jeremia 16 - Iaai Bible 1901 (New Caledonia)

¹ AME o minya but könya hofuc ho Iehova ame ha, ka habe,

² U me ca he ka hok momo me hu nokom baga me hlu hnyi dok ang.

³ Anyin a walang hna ha hnö Iehova ge ta je da me in adre hnokoâ eang, me je lahinyödra adre hnöku ödra, me je lakamödra adre hnöku ödra hnyi hnyei ang, ka habe,

⁴ Adre me he ka mok ge je mok ae kong; adre me ca he ka tenge gadra, ke adre me ca he ka konim ödra; adre me he ka hnân tatet hon kânâ; ke ame he ka ön ödra hnen hele vat me hmiâ, ke ame be je unyidra ka hnân an ta je meno ame gâ ethö, me je menoiny hnyot.

⁵ Anyin a walang hna ha hnö Iehova, ka habe, Ca didro ka hnyi uma tenge, ka ca he bi ka hnyi tenge thungaû, ke ca mâng gadra; anyin oge hia but hom anyik hnahicʼ ûnyi ge hnyei ang, wale ibetengiö me betenge vec, haingö Iehova.

⁶ Ke ame he tavat ae gan me tavat ae ûhnyûkong ka mok hnyi hnyei ang: adre me ca he ka konim ödra; ke ame ca he tavat ka tenge gadra, ke adre me ca he ka thamuö hwadrak ny, me ohadreûâ, adre me ânyâ hnyi hnyamok;

⁷ ke ame ca he tavat ka tha subö areto hnyi tenge gadra wale hnân otubweli ödra ge je komok; kʼ ame ca he tavat ka ham kodra kaia ka habelidra hnân otubwelâ ge kamödra me hinyödra a mokcu.

⁸ Ke u me ca he ka dit hnyin uma bijeû he ka tha laba mödra, me hnyi han me ic.

⁹ Anyin a walang hna ha hnö Iehova tuhan sabaoth, Khongu Isaraela, ka habe, Wâ bi, oge me he ka bi obiny hnyi dok ang hnyi hnyimaköbun hnyi bongubun ta je bong hwan senyin me hwan hobâ, me hwan li at ödre tep faipoipo.

¹⁰ Ke hnyi ûen u me he ka haimemenâ ta je hofuc hia ang ka tavat ang, me adre me he ka ha köu, ka habe, Anyin a ieû Iehova ame ha gahmun ta je ûnyi ae kong hia thithö ae gan hmâ? ke ieû hwakecihmun ae kong? ke ieû hnöh-mun hna ânyâ kö Iehova Khonguhmun?

¹¹ me u me he bi ka ha kodra, ka habe, Can lakamöbun ödrin e hna degeci nya, haingö Iehova, me hnu hoton je khong, me bi athnyaba ködrin, me khudrung ködrin, ke adre me hna degeci nya bi, me ca tuö bi anyik hnanyibu;

¹² ke öbun e hia but ânyâ hulo ae gan hmâ hon je lakamöbun; anyin a, wâ bi, öbun e ve hnu hoton ihwegien je hnyekubun ae kong, me öbun e ca ling nya bi:

¹³ anyin a wale oge me he ka obʼ öbun hnyi hnyei ang ka hnyi hnyei ae ca khanʼ öbun, öbun, me je lakamöbun; ke öbun e he ka bi athnyaba eling ka ke je khong hnyi lany me lit; ke oge me ca he ca betenge gabun.

¹⁴ Anyin a wale, wâ bi, ame he ka o je bong, haingö Iehova, ke adre me ca he ka ha, ka habe, Kia inya Iehova, at ame hom je lakon Isaraela ûnyi hnyi hnyei Aigupito;

¹⁵ ke so bi, Kia inya Iehova at ame hom lakon Isaraela ûnyi hnyi hnyei hnyi hwadro, me ûnyi hnyi je hnyei hia waleji e ame obʼ ödra ka hnyin: ke oge me he ka ohmetu ödra ka hnyi idra hnyei, waleji oge ham ka lakamödra.

¹⁶ Wâ bi, oge me ho ka hawâ tavat thut ae se hia, haingö Iehova, mʼ adre me he ka nuc ödra; ke hwaban e, oge me he ka hawâ tavat hnu meno ae se hia, ke adre me he ka hnu ödra ûnyi hnyi je bucen hia, me je hut hia, me ûnyi hnyi je hmakaniny je kic.

¹⁷ Anyin a e hnyi hon dedra je gethen hia li emakök: ödra ca iyong hnyi hnyimakök, ke adre ca ikhâlâ gak hwakecidra ae kong.

¹⁸ Ke oge me he ka bok ka olo bi hwaban hwakecidra ae kong me anyidra hulo; anyin adre hia but oikikiâ ik hnyei hnen unyin anyidra ta je ûnyi ae bon a gʼ adre mokcu, ke adre hia but öunöngötâ ik hnyei ge anyidra ta je ûnyi ae ikiki.

¹⁹ Iehova lö, tang hwegiök, me hnok hnabâ, me hnok hna lubaduöng hnyi bonginy vec, ame he ka o köu ta je hnyei ûnyi hnyi je can hmeledrany me ha, ka habe, e ba jekhon je lakamöbun, ke so bi, thoi, wale je ûnyi baû me ba troban hnyin.

²⁰ Hawa, ame he ke at ka ânyâ je khong hobi kâu, ke ca je khong bi thö?

²¹ Anyin a wale, wâ bi, oge me he ka owâhmakhmeto ödra, hnyi ûen ang oge me he ka owâhmakhmeto ödra ge hnyamok, me manik man; ke ame he ka khanʼ ödra a iök Iehova.