Jeremia 15 - Iaai Bible 1901 (New Caledonia)

¹ HABA Iehova ame ha könya, ka habe, Eja ke ne a ne tot Mose me Samuela hnyi hnyimakök, oge me ca he ka hnyok ka tavat ang: obʼ ödra but gak, mʼ adre me he but.

² Ke adre me ne he ka ha köu, ka habe, Ohmun a he kâ? u me he ka ha kodra, ka habe, Walang hna ha hnö Iehova, ka habe, Haba at hobi kâu mok, me ame ka he bi ka hnyi mok; ke haba at hobi kâu hele vat, me ame ka he bi ka hnyi hele vat; ke haba at hobi kâu hmiâ, me ame ka he bi ka hnyi hmiâ; ke haba at hobi kâu bâ, me ame ka he bi ka bâ.

³ Ke oge me he ka otilâ kodra vak ta ûnyi, haingö Iehova: wale hele vat he ka hlingâ, me je kuli he ka oloû kia, me ta je meno ame gâ, me ta je menoiny hnyot he ka an me ohia.

⁴ Ke oge me he ka hnʼ ödra ka hnyi hlohlo hnyi ta je dökhu hia eang hmeledrany, jöni Manase nöku Hezekia than Juda, can hnen hna ânyâ hnyi Jerusalema.

⁵ Anyin a ie at ame he ka betenge gam Jerusalema? ke ie at ame he ka mâng gam ke ie at ame he ka saû me me hnö bongom?

⁶ Haingö Iehova, ka habe, U je hia but hna degeci nya, ke u je hmetuhmetu: anyin a wale oge hia but hai hnyamok gam, me ohiö u; oge sënyin dut ge ietra.

⁷ Ke oge hia but ulic ödra ge ut hnyi je homagouleny hnyei; oge hia but öba lakudra, oge hia but öba lakeik; adre me ca hmetu ûnyi hnyi dedra je gethen.

⁸ Adre ose hia je safac unyidra hnyi hnyimakök hon je waönyin köiö: oge hia but hom kodra ûcon hinyen wahidröu, at ame söh hnyi jebigo: oge hia but ie oâ kodra ot me öbubuny.

⁹ E sënyin dut momo ame hnöku ödrin seven; e ame mokcu; ame didrut anyin seûno, ke tiga lany bi; e ame hia but hmehma me hlohlo: ke oge me he ka hna je koluidra ka hnyi hele vat hnyi hnyimakan je iwahnaihmiony mödra, haingö Iehova.

¹⁰ Ekölö gak, bai lö, anyin a u je hnokoâ at ae iwatretra, ke at ivino me hmeledrany hia! oge ca hia but më ham mone hnân troban, ke haba khaca adre ca më ham mone könya hnân troban; ke so bi, ödra hia adre me hangö nya.

¹¹ Haingö Iehova, ka habe, E hnathu, oge me he ka sihwegiö u hnyi so; e hnathu, oge me he ka kunâ iwahnaihmiony he ka khöû köu hnyi ûen ae kong me ûen ae vec.

¹² Hawa, e khana at he ka thu fao wale fao ûheny hnyi hwadro, me bras?

¹³ Oge me he ka ham manâm man me tang omjehem hnân söh ke ca ge hwaban, ke can bi ânyâm je hulo hia hnyi je hnyigöulâm hia.

¹⁴ Ke oge me he ka tha ohei ödra me je iwahnaihmiony möu ka hnyi hnyei ae ca khanö u: anyin ame ubâhlâ meic hnyi anyik hmonyin, ke ame he ka thong hubun.

¹⁵ Iehova lö, u je wâ but: ûnykûmi nya ju, me senö nya, me bi hwaban ka tavat cak, ka tavat adre me sedö nya, ca hom digic nya hnyi hnâm hna ling vec ae beûhmâ: khanö u thö a adre hia but haikongu nya can iâm.

¹⁶ Adre me wâ hwâm je hofuc, me oge me an e; ke hnân senyin me hnân hobâ hwâm je hofuc hnyi hnyekuk: anyin adre me hwenyi iök ge iâm, Iehova Khongon sabaoth.

¹⁷ Oge me ca laba hnyi ûkhacaköu anyin tavat adre me walak me hop: oge me hake laba can hnyamâm; anyin a u je hia but öunöngöti nya ge hmonyin.

¹⁸ Anyin a ieû a e bala bi anyik vec, ke ba eny hnok aat, ke ame ca bemetu? hawa, u me he ka helâ me wagewe ame iyawo, a köiö ame hme?

¹⁹ Anyin a wale, walang hna ha hnö Iehova, ka habe, U je ne he ka hmetu, me oge me he ka hum u, ke u me he ka tot hnyi hnyimakök: ke u je ne he ka oc ut ûnyi ae ûnyi hnathu ûnyi hnyi ûnyi ae ikiki, u me he ka helâ me hnyimök: adre me he ka hmetu köu, ke u me ca he ka hmetu kodra.

²⁰ Ke oge me he ka wiö u ka tavat ang hnân hak bras ae hwege; ke adre me he ka vat möu, ke ame ca he ka tudra: anyin a tha inya möu he ka tuö u, me omeli u, haingö Iehova.

²¹ Ke oge me he ka hûgûnö u ûnyi hnyi hnyamen tavat ae kong, ke oge, me he ka ûco melam ûnyi hnyi hnyamen tavat a ödra wathethot.