Jeremia 13 - Iaai Bible 1901 (New Caledonia)

¹ WALANG hna ha hnö Iehova könya, ka habe, He thö me ûco hobi köu bi wen hnyekom a lino, ke oweikâ ju hnyâm, ke ca he ka hneû e hnyi köiö.

² Me oge me ûco wen hoton hofuc ho Iehova, me oweikâ hnyik.

³ Me ame olo o hofuc ho Iehova könya ame ha, ka habe,

⁴ Hom dö wen u je ûco, wale hnyi hnyâm, ke todrö, he thö Euferate ai, me ikhâlâ e hnyi esopiny kic.

⁵ Me oge me he me ikhâlâ e hnyi Euferate hoton hna hûna könya ga Iehova.

⁶ Ke hwaban je bong ae se hia, haba Iehova ame ha könya, ka habe, Todrö, he thö Euferate ai, me hom ûheny e wen waleji oge hûna köu he ka ikhâlâ eling.

⁷ Me oge me he Euferate ai, me hiny, me hom wen ûnyi hnyi dok oge ikhâlâ e hnyin: ke wâ bi, e kong ut wen, ke ûnyi baû but.

⁸ Me ame o but könya hofuc ho Iehova ame ha, ka habe,

⁹ Walang hna ha hn Iehova, ka habe, Helâe oge me he ka okongoâ hnyok bi gan anyi Juda, me hnyok bi gan ae gan hmâ anyin Jerusalema.

¹⁰ Haba hnyei ang ae kong, tavat adre me höcö long hok je hofuc, tavat adre me hnu hoton hwegien hnyekudra bi, me he hoton ke je khong bi he ka bi athnyaba ködrin, me khudrung ködrin, adre me he ka ûcû me wen ang, ae ûnyi baû but.

¹¹ Anyin ame kece wen ka hnyi hnyin at, helâe oge hia but okeceâ könya lap hia anyi Isaraela, me lap hia anyi Juda, haingö Iehova; mʼ adre me he ka hnân lakeik, me iök, me ogânâ, me hmanenang: ke adre me höcö long.

¹² Anyin a wale, u me he ka ha kodra hofuc ang, ka habe, Walang hna ha hnö Iehova Khongu Isaraela, ka habe, Ame he ka unö-ngöt ta je kaia hia ge waina: ke adre me he ka ha köu, ka habe, Hawa, e ca khanʼ ohmun a gʼ ame he ka unöngöt dö ta je kaia ge waina?

¹³ Me u me he ka ha kodra, ka habe, Walang hna ha hnö Iehova, ka habe, Wâ bi, oge me he ka öunöngötâ tavat aten hnyei ang hia, wale je than a tavat adre me tabâ theron anyi Davita, me tavat bi hut, me ta je perofeta, ma aten Jerusalema hia, mʼ adre me he ka monu ge grâk.

¹⁴ Ke oge me he ka öûsetuödraköu ödra, a je kamen me lakon, haingö Iehova: oge me ca he ka menyik, me hokhnyok, me betenge, ke oge me he ka ohiʼ ödra.

¹⁵ Long ju öbun, ke tevehlöng ju: ca hnyok bi gan: anyin a hia but ha Iehova.

¹⁶ Hna but kö Iehova Khongubun hna ogânâ, e me tiga ca omenekhulumâ, ke e me tiga ca haû je cabun hon je bucen ae lit; ke öbun ka tiga halubahingen melam me e ame wia bi ka hnyi hmenon mok, me lit ae gan.

¹⁷ Ke öbun e ca long, ame he hnyekuk ka tenge hnyi dok ae iyong can anyibun bigan; ke ame he li emakök ka ti tenge, me lup ge deköiök, anyin adre hom bâ hna hat mamoe hale Iehova.

¹⁸ Ha thö ka than me momo than, ka habe, Öhnyikönʼ öbun ju, ke laba ju: anyin a kolu but anyibu li korona ae mec, wale koronainy anyibun hmanenang.

¹⁹ Adre hlöng ut je taun hnyi hwaiöu, ke ba at ame he ka khong: a hom hwenbâ Juda hia; adre me tha hwenbâ hia.

²⁰ Bwela thö goranyai me wâ tavat adre me o ûhedra hnyi hwadro: ewa hna hat meno adre ham köu, hna hat halem ae kese?

²¹ Ieû u me he ka ha, e ka he ka otilâ je waem hom hnân bâm, anyin a u je hia but nʼ ödra he ka musi u? hawa, ame ca he ka kot u ge je vec, helâ me momo ame he kahnokoâ?

²² Ke u je ne ha eû hnyi hnyekom, ka habe, Can ieû ame o könya ta je ûnyi ang? can ûganiny hwakecâm ae kong adre hai obiny ânyâm ûkhaû, me adre me okongoâ ohmâiny li cam.

²³ Hawa, e khana at Aithiop he ka wia unen unyin, me lepad, hna bi hnahlimen unen? awe, e khanʼ öbun he ka ânyâ so, wale tavat adre me khenen he ka ânyâ hulo.

²⁴ Anyin a wale, oge me he ka ovesei ödra, helâ me thatûnyi ame oû ang dö ûnyi hnyi hnyebuba.

²⁵ Walang hna khenâ köu, jekhom adre tuluto köu ûnyi gak, haingö Iehova; anyin a u je hnying nya me labageju ka hnyi thoi.

²⁶ Anyin a wale oge me he ka hai obiny ânyâm ûkhaû ka hnyi hnyimâkâm, me e me manen hnân ohmehmai a.

²⁷ Oge hia but wâ hwakecâm ae ikiki, wale hnâm je hna bi ûnyi monu, me hwâm hwakuku helâ me hors, me ûganiny hnâm hna bi ûnyi monu hon je dok ae hut hnyi ta hnyei. Ekölö gam Jerusalema! u me ca he ka bo so; ke ne o but kehö?