Jeremia 12 - Iaai Bible 1901 (New Caledonia)

¹ IEHOVA lö, u thibi at ae wisa, iny ka he ka ivino möu: ke so bi, oge me beûhnenamö möu ge hna owisa: ieû can ame sot gan gethen deny tavat ae kong? adre me laba so geû ödra hia adre me ti iyawo?

² U je hia but te ödra, eke, e hu iwân gadra; adre me kû, eke, adre me wa wan; u hakekeny hnyi je hnyimödra, ke sâkâû hnyi je ûnykûmenödra.

³ Ke haba u Iehova lö, u je wâhmakhmetu nya: u je ö nya, me cubec hnyekuk gam: lili ödra but helâ me je mamoe hnân he ka hlingâ, me penapenʼ ödra hobi kâu bong he ka hlingâ hnyin.

⁴ Ame he hnyei he ka tenge ke ne o but kehö, me meleca je ûöiny hnyot hia ae ometu? can hulo anyin tavat adre me labā e, adre hia but ohia je meno a vak can, me ta je meno ame gâ; anyin a haingodra, ka habe, E ame ca be ka wâ obiny köta.

⁵ U je ne hia but tha wadring me tavat adre me he hon kânâ, ke u sënyin dut unyidra, u me he ka kâmâu ka ûö wadring me ta je hors? ke u je ne laba khötkic hnyi hnyeiny ûsoköu, ieû u me he ka ânyâ hnyi hmanenanginy Joridano?

⁶ Anyin a hia but iyawo u hnen je liamekeiny möu, ke hnen minya lap anyin kâmâm; ke adre me hao u hwegiö u: eja ke ne adre ne ha so köu, ca kop ödra bi.

⁷ Oge hia but hna umök uma, oge hia but hna degecâ ik hnyei; oge hia but hna oûnykûmik ka hnyi hnyamen je iwahnaihmiony më.

⁸ Haba ik hnyei me helâ me lioüa hnyi hnyot: e ame fuc hwege könya; anyin a wale, oge hia but hûkotiâ e.

⁹ Hawa, helâ me meno ame gâ ame seset ke at ae ûhûlû, ik hnyei könya? ame o but kâu ta je meno ame gâ ae ûhûlû wale a igigilo but? he thʼ öbun, ûkhacaköuâ thö je menoiny hnyot hia thithö, hum ödra ju he ka ûhûlû.

¹⁰ Haba tavat tuö mamoe ae se hia, adre hia but ohia ik hnyei vine, adre hia but ututo jekhöûk, me wia jekhöûk ae kese hnân hnyebuba ae ba wan.

¹¹ Adre hia but öba wan e; e ame tenge könya ke ba but wan; adre öba wan hnyei hia, anyin ae ba at ame ûnykûme eû hnyi hnyekon.

¹² Ame he but tavat sei hon je dok hia ae gorany hnyi hnyebuba: anyin a hele vat anyi Iehova ame han, hwân hnyi ke obiny hnyei ke ne o but hnyi ke obiny, ke ba bi hnahic ka ke at.

¹³ Adre hia but belökâ hwit, me meno iwadekong; adre hia but oveci ödra bi, ke ba troban: ke öbun e he ka hmehman je jeûiny ibun hnyei, can hmonyin ae gan hmâ anyi Iehova.

¹⁴ Walang hna ha hnö Iehova ge tavat hia ae kong adre me laba hakekenyi nya, tavat adre me kâlâ hnyei waleji oge ham ka lakeik a Isaraela, haingen, ka habe, Wâ bi, oge me he ka uk ödra ûnyi hnyi idra hnyei, me oc lap anyi Juda ûnyi hnyi wanbödra.

¹⁵ Ke iny ka hia but uk ödra oge me he ka hmetu me betenge gadra; ke oge me he ka ve ohmetu ödra ka hnyi je idra, me idra ta hnyei.

¹⁶ Ke ödra ka he ka ti nâ je gethen deny lakeik, me khemanyin hnyi iök, ka habe, Kia inya Iehova; helâji me hnödra hna nâ lakeik he ka khemanyin ga Baala; awe, adre me he ka up ödra goranyai wanben ik hnyei.

¹⁷ Ke adre ne ca he ka löng, me oge me he ka oc degecâ, me ohia hnyei eling haingö Iehova.