Jeremia 11 - Iaai Bible 1901 (New Caledonia)

¹ WALANG hofuc ame o kö Jeremia ûnyi ga Iehova ame ha, ka habe,

² Long ju öbun je hofucin ûhihinyköu ang, me ha ka tavat Juda me aten Jerusalema;

³ ke ha thö kodra, ka habe, Walang hna ha hnö Iehova Khongu Isaraela, ka habe, Hna ûhangö at ame ca he ka long ta je hofucin ûhihinyköu ang,

⁴ waleji oge hûna ka lakamöbun, hnyi bong oge hum ödra hnyin ûnyi hnyi hnyei Aigupito, ûnyi hnyi hnyin meic fao me ha, ka habe, Long ju ifucik, me ânyâ thö hoton hnok hna hûna köbun; me öbun e he ka lakeik, ke oge me he inya ka Khongubun:

⁵ me inye he ka ohwâdâ ûhihinyköu oge khemanyinâ ka lakamöbun, he ka ham kodra hnyei ame di hnyin debai me hani, helâ me hnyi bong ang. Me oge me thu me ha, ka habe, Iehova lö, Amen.

⁶ Haba Iehova ame ha könya, ka habe, Khetâ thö ta je hofuc hia thithö ang hnyi ta je tauniny Juda, me je gethen hnyi Jerusalema me ha, ka habe, Löng ju öbun je hofucin ûhihinyköu ang, me ânyâ.

⁷ Anyin oge ha hwegiâ ka lakamöbun hnyi bong oge hum ödra hnyin ûnyi hnyi hnyei Aigupito, ke ne o but hnyi bong ang, me vesâkong me ha hwegiâ, ka habe, Löng ju ifucik.

⁸ Ke adre me ca löng me tevehlöng, ke so bi, adre me ve vheno hwegien je hnyekudra bi ae kong: anyin a wale, oge me oâ kodra ta je hofucin ûhihinyköu hia eang, waleji, oge hûna kodra he ka ânyâ, ke adre me ca ânyâ bi.

⁹ Ke haba Iehova ame ha könya, ka habe, Adre wâ hna ûhnehnamö duöng unyin at Juda, me aten Jerusalema.

¹⁰ Adre me hmetuhmetu but ka je hulo anyin lakamödra waleji adre me höcö long hok ta je hofuc; ke adre me hnu hoton ke je khong he ka bi athnyaba ködrin: a hia but lap anyi Isaraela me lap anyi Juda thamuâ ûhihinyköu, waleji oge khemanyinâ ka lakamödra.

¹¹ Anyin a wale walang hna ha hnö Iehova, ka habe, Wâ bi, oge me he ka oâ kodra ûnyi ae kong ae ca khanʼ ödra bi he ka kec gan; ke adre me he ka tenge könya, ke oge me ca he ka ling ödra.

¹² Me ame he ka he je lap anyi Juda me je aten Jerusalema, me tenge ka je khong, waleji adre leû utö ae bo so kâu: ke adre me ca he bi ka omeli ödra hnyi ûen anyidra vec.

¹³ Anyin ae ûcû ûseiny ânyâm je khong Juda me ânyâm je taun; ke öbun e hia but otilâ je taben hut ka ûnyi ae ikiki, a je tap hnân leû utö ae bo so kö Baala, hoton ûseiny je getheniny Jerusalema.

¹⁴ Anyin a wale, u me ca he ka hijö tavat ang, ke u me ca he ka tenge me hic hobi kodra: anyin oge me ca he ka löng kodra hnyi ûen adre me he ka hawo nya hnyin hnyi anyidra vec.

¹⁵ Ieû ame ânyâ oûnykûmik eang hnyi umök uma, anyin a e ame hia but bi ûnyi monu me tavat ae se, ke a he but gam utiö ae kap? hnyi ûen u je ânyâ ûnyi ae kong u me senyin bi.

¹⁶ Haba Iehova ame hwenyi iâm, ka habe, Elaio ae hât, ae hmanenang, ke so wan: ke e ame hû meic hon e me gan hmâ hwan hwalung, ke hmetru but je anginy e.

¹⁷ Anyin a haba Iehova tuhan sabaoth at ame te u, ame ha ûnyi ae kong köu, can hulo anyin lapanyi Isaraela, me lap anyi Juda, waleji adre me ânyâ hobi kodra bi me ohmönyini nya, adre me leû utö ae bo so kö Baala.

¹⁸ Ke haba Iehova ame owâhmakhmeto nya gan, me me khanö nya thö: me u je omanenâ könya anyidra ta je huliwa.

¹⁹ Ke iny ûcû me nokon mamoe ae hnam adre me lelö he ka hlingâ; ke ca khanö nya bi, a gʼ adre me ip je hna ûnykûme könya me ha, ka habe, Ate me he ka tha ohia ûo me wan, ke ate me he ka subâ degecâ e hnyi hnyei iny tavat ae mot, mʼ adre me ca he hmetu ka ûnykûme ien.

²⁰ Ke Iehova tuhan sabaoth lö, at ame owisa wia, at ame cubec je ûnykûme me hnyok, e so oge me wâ hna bi hwaban kodra gam: anyin oge hia but omanenâ hok hofuc köu.

²¹ Anyin a wale, walang hna ha hnö Iehova ge aten Anathoth, tavat adre me elâm he ka hlingö u, ka habe, U me ca he ka perofeta hnyi iö Iehova, wâ u nye mok ut gahmun:

²² Anyin a wale walang hna ha hnö Iehova tuhan sabaoth, ka habe, Wâ bi, oge me he ka bi hwaban kodra: ame he wahidröu ka mok ge hele vat; ame he lakudra obaga me wahlu ka mok ge hmiâ;

²³ ke ame he ka ba koluidra: anyin oge me he ka oâ ûnyi ae kong ka tavat aten Anathoth, wale hnyi hunainy hna senʼ ödra hnyin.