Jeremia 10 - Iaai Bible 1901 (New Caledonia)

¹ LAP anyi Isaraela lö, long ju hofuc ame ha Iehova köbun:

² walang hna ha hnö Iehova, ka habe, Ca he öbun ka nâ hwakecin je hnyei, ke ca outen je haten drany; anyin ame outen e hnen ta je hnyei.

³ Anyin ae ûnyi baû bi hwakecin ta je hnyei: anyin a ke at ame sö ûö hnyi hnyot, huliwa anyin li hnyamen at huliwa ge gö.

⁴ Adre me theibâ e ge sileva me gol, ke adre me ohmâ e ge fao me hama, me me ca bwebwet bi.

⁵ Ödra ûcû me pama adre kave, ke ca khana bi fuc: adre me labö vadren, anyin ae ca khana he. Ca he bi ka outʼ ödra; anyin ae ca khanʼ ödra he ka okongo, ke haba khaca, me ca khanʼ ödra bi he ka ânyâ so.

⁶ E ba ju ke at ae ûcû möu Iehova: u gan hmâ, ke gan hmâ iâm hnyi man.

⁷ Ie at ame ca he ka outö u, Tuhan ta je hnyei? anyin ae ûcû u: ke haba khaca, me ba ju ke at ae ûcû möu unyin tavat ae metâ hia hnyi ta je hnyei me hnyi ta je dökhudra hia.

⁸ Ke ödra tavat a hwakecin meno me monu hia: haba hna ûnö hnen je hnatheat wale thibi e a hnyiban utö.

⁹ Adre me hom sileva adre kot halelöûâ ûnyi Tasesa, me gol ûnyi Ufaz, huliwa anyin at ame khavi, ke hnen hnyamen at huliwan gol: haba je khaûödra ae udrudrâ me udrudrâ hlit: huliwa hia anyin tavat a ödra metâ huliwa.

¹⁰ Ke Iehova Khong ae hnathu, e thibi Khong ae mot, me Than nyiele balua: ame öbubuny hmeledrany hnyi anyin hmonyin, ke ca khana ta je hnyei ka tot hmâ hnyi anyin wathethot.

¹¹ Walang hnobun hna he ka ha kodra, ka habe, Haba ta je khong wale adre ca op drany me hmeledrany, ame he ka hiʼ ödra eang hon kânâ hia; me hnyi hmeledrany.

¹² E thibi at a op kânâ ge maniny man, e ame otilâ hmâ hmeledrany ge anyin metâ, me ulolo drany ge anyin wâhmakhmeto:

¹³ e ame fuc kʼ ame bwebwelâ ta je köiö ethö hnyi drany, ke ame öliâ hai ûnyi hnyi can hmeledrany; e ame ânyâ hucuce hobi kâu we, me hom ang ûnyi hnyi tang omjehen.

¹⁴ Ame ve hwakecin meno bi tavat hia, me ba wâhmakhmeto unyidra: a ve hmehma but tavat huliwan gol hia ge anyidra bi hnatheat: anyin ae thoi but anyin idola adre okoiâ, ke ba homenâ eû hnyidrin.

¹⁵ Odrin bi a ûnyi baû me hnân iyawo: hnyi ûen bi hwabodrin, ame he ka hiʼ ödrin.

¹⁶ E ca helâe jekhoû Jekob: anyin a e at ame op hia; ke Isaraela tribuiny jekhon: Iehova tuhan sabaoth ien.

¹⁷ Ûkhacaköuâ thö je tang omjehem ûnyi hnyi hnyei, u at ame labā hnabâ.

¹⁸ Anyin a walang hna ha hnö Iehova, ka habe, Wâ bi, oge me he ka kûlûâ helâke me veto, tavat adre me labā hnyei walang ang, me hom ûhnyûkongu ödra, me me khanʼ ödra thö.

¹⁹ Ekölö ge hnok aat! ame han gan hmâ: ke haingök, ka habe, E hnathu wale anyik bi vec, ke oge me he ka hokhnyokâ.

²⁰ E kong ut umök uma mano, ke mou but anyik je tö hia thithö: a he but lakuk, ke ba but, e ba hmetu at he ka ulolo umök uma mano, me otilâ anyik hak mano.

²¹ Anyin a hwakecin dut meno tavat tuö mamoe, me ca elâm bi unyi Iehova; anyin a wale, e ba sot gadra, ke ame vese hia haledra je hna hat mamoe.

²² Hwan ûthumetu, wâ bi, e but ang, ke gan hmâ imonumonuny ûheny hnyi hnyei hnyi hwadro, he ka wia je tauniny Juda me me ba wan, me hnen je luko.

²³ Iehova lö, e khanö nya but a ca hanymen bi at deny gethen: e ca hanymen at ame he ka owisa hnen je hna okca.

²⁴ Iehova lö, nö nya thö, ke ânyâ thö hnyi ûen ae ûcû: ca hnyi ânyâm hmonyin wâ e nye hia but.

²⁵ Hingâlâ but ânyâm hmonyin hon je hnyei ae ca khanʼ ödra u, me hon je lap adre me ca hawâ bi iâm: anyin adre hia but öaûö Jekob, eke, adre hia but utâ e, me ohia e, me öba wan hnyaban.