Jeremia 1 - Iaai Bible 1901 (New Caledonia)

¹ HOFUC ho Jeremia nöku Hilekia, hanen tavat bihut waleji a ödra hnyi Anathoth, hnyi hnyei Beniamina:

² waleji ame o hofuc ho Iehova kâu hnyi bong bongu Josea, nöku Amona than Juda, hnyi huna a thötininy anyin musi.

³ Ke ame o minya hnyi bong bongu Jehoiakima nöku Josea, than Juda, ke ne o but hnyi obiny huna a eleveni Zedekia, nöku Josea than Juda; ke ne o but adre me hom hwenbâ at Jerusalema hnyi tehi a thabûnginy.

⁴ Ke ame o but könya hofuc ho Iehova, ame ha, ka habe,

⁵ Oge bok ka ö u, ke ödra tiga ca up u hnyi hnyok, ke oge bok ka okabi u, ke u tiga ca o bi ûhem hnyi hnyok; oge hia but ip u hnân peropeta ka ta je hnyei.

⁶ Me oge me ha, ka habe, Ekölö Than Iehova! wâ bi, e ca khanö nya he ka fuc: anyin a iny wanakat.

⁷ Haba Iehova ame ha könya, ka habe, Ca ha bi, ka habe, Iny wanakat: anyin a u me he ka he kodra hia thithö, wale oge me kunö u ka hnyin, ke u me he ka ha ta je hofuc hia thithö oge me he ka hûna köu.

⁸ Ca he bi ka ot gadra: anyin a tha inya möu be ka omeli u, haingö Iehova.

⁹ Me haba Iehova ame inâ hnyamen me kâlâ hnyimök; ke Iehova ame ha könya, ka habe, Wâ bi, oge hia but ip hok ta je hofuc hnyi hnyimâm:

¹⁰ wâ bi, oge hia but ötilö u hnyi bong ang hon ta je hnyei me hon ta je dokhu, he ka oc degecâ me hagutâ, ke he ka ohia, ke he ka öüo; he ka op goranyai, me tä.

¹¹ Ke ame o minya but könya hofuc ho Iehova ame ha, ka habe, Jeremia lö, ieû u me wâ? Me haingök, ka habe, Inya oge me wâ ong utö saked.

¹² Ke haba Iehova ame ha könya, ka habe, E so hnâm hna wâ: anyin oge me hmâkâ hok hofuc he ka ohwâdâ.

¹³ Ke ame olo o könya hofuc ho Iehova ame ha, ka habe, Ieû u me wâ? Me haingök, ka habe, Inya oge me wâ öt ame citröu; ke ame hwio hnyimen ûnyi hnyi hwadro.

¹⁴ Ke haba Iehova ame ha könya, ka habe, Ame he ka patrutrua ûnyi ae kong ûheny hnyi hwadro kodra hia thithö tavat adre me labā hnyei.

¹⁵ Anyin a wâ bi, inya oge me he ka hawâ ta je lap hia hnyi dokhu ûnyi hnyi hwadro, haingö Iehova: ke adre me he ka he jem, me ve otilâ anyidra je theron hnyi je homagouleny Jerusalema, me cicö hna up haginy hia igigilo, me cicö je tauniny Juda hia.

¹⁶ Ke oge me he ka ha hnok je hna owisa gadra, can anyidra ta je hulo hia; waleji hnyi hnödra hna digic nya, me leû utö ae bo so ka ke je khong, me hmi ka ta je huliwa anyin ta je hnyamödra bi.

¹⁷ Anyin a wale, u me ke ka hûkâlâ wen hnyekom, ke todrö, me ha kodra ta je ûnyi hia thithö oge me hûna köu: ca hlohlo gadra, wâ oge nye he ka ohlohloi u hnyi hnyimakodra.

¹⁸ Anyin a wâ bi, oge hia but wiö u hnyi bong ang me hnân taun adre up haginy, me hmolom fao, me hak bras, ûcon tavat hia, ûcon je than Juda, me je taben e, me anyin tavat bihut, me tavat aten hnyei.

¹⁹ Ke adre me he ka vat möu; ke adre me ca he ka hwege hom; anyin a tha inya möu he ka omeli u, haingö Iehova.