I. Timoteo 6 - Iaai Bible 1901 (New Caledonia)

¹ E ÛCÛ ka ta je athnyaba hia, tavat adre me hije hok he ka ve ogânâ latuhödra, mʼ adre me ca he ka haikongoâ ien Khong me hnen hna ûne.

² Ke haba tavat ae hu latuhödra adre me labageju, ca he ödra ka öûnyibâûʼ ödra, anyin a ödra je liamekeiny; ke so bi he ka ti bi athnyaba so kodra, anyin a tavat labageju me tavat ibetengiö adre me kap huliwa ae so. Hamâm he ka nâ me ûnö ta je ûnyi e.

³ A ne ke at ame ûnö ke ûnyi bi, me ca hmehmela hofucin möt wale hofuc hwan Tuhöta Iesu Keriso, me hna ûne ae ûcû hoton hwakecin ot ka Khong;

⁴ awe, e ame bi gan, ke ca khana bi ke ûnyi, ke e ame moko hna ivinö me iwatretra ge ta je hofuc, wale at ame okûâ ihunyinköu, me iwatretra, me ûjao, me ûnykûme monoâ,

⁵ me ta je ûö hwege anyin tavat adre me hnyokâ hulo ke ca hu bi hnathu gadra, ke adre me ûnykûme, ka habe, haba hwakecin outen Khong me wale deny he ka hu kodra tang omjeû.

⁶ Ke haba hwakecin outen Khong tha e me hnahic, me wale thibi e omjeû ae gan hwaban:

⁷ anyin ate ca hom ke ûnyi ka hnyi hmeledrany, ke ca khanʼ öta bi he ka hom ke ûnyi ûnyi hnyin;

⁸ ke e ka hu köta jeû me ûkhaû, me ate me he ka osekuni öta ju e.

⁹ Ke haba tavat adre me wedra he ka tren omjeû adre me ta but ka hnyi ûcûbic me hnewe me ta je weny ae monu me hnân okongo, wale hnân odilâ tavat hnyi ûohia me hnaûhango.

¹⁰ Haba hnyok ka mone, me wale iwân ta je monu hia thithö ae ve bongon: waleji ame hnu hoton hnen keihen mʼ adre me osaûʼ ödra but ûnyi hnyi labageju, ke adre me ka hamödra bi dâ fineci ödra bi hnen ta je vec ae se hia.

¹¹ Ke haba u, aten Khong lö, kec dö ge ta je ûnyi e; me hnu hoton hwakecin ae wisa, me hwakecin ae ûcû me Khong, me labageju, me ibetengiö, me hok hnyok, me hwakecin ae menyik.

¹² Vâtâ thö vat ae so anyin labageju, kât hmâ ju möt ame ca ba balua, waleji adre me hawʼ u kâu, me hnâm hna haimemenâ so hnyi hnyimakan tavat ohnatho ae se.

¹³ Inya oge me hûna köu hnyi hnyimakan Khong at ame tuö möt anyin ta je ûnyi hia thithö, me Keriso Iesu, at ame haimemenâ so hnyi hnyimakö Ponetio Pilato;

¹⁴ ka habe, u me he ka tuö hnanyibu, me me ba hnyikongon, me ba hnân haikongoâ, ke ne o but ame manen dut Tuhöta Iesu Keriso:

¹⁵ ke e ame he ka omanenâ e hnyi anyin bi ta je ûen, a e thibi Than a khaca ae tren hnahic, a Tuhan ta je than, ke Taben ta je taben;

¹⁶ e thibi ame tren möt balua, at ame laba hnyi melam ae ca hnân ûhakekeny kâu; waleji ame ca wâ hnen at, ke ca khana minya wâ: e so he ka e unyin bi hna ogânâ me man nyiele balua. Amen.

¹⁷ Hûna thö ka tavat tren omjeû eang hmeledrany ka habe, Ca he ödra bi ka bi gan, me ca he ka gejon ta je omjeû wale ame ca tethmâ, ke so bi ka Khong ae möt at ame ham köta hia ta je ûnyi hnân osenyini öta;

¹⁸ mʼ adre me he ka ânyâ so, me tren omjeûiny ta je huliwa ae so, me khenen he ka kuia, me weny he ka betenge;

¹⁹ me he ka ip hobi kodra bi tang om jeû ae so hnân hobi kâu nyiele, mʼ adre me he ka kât möt wale möt ae hnathu.

²⁰ Timoteo lö, tuö wia ju ta je ûnyi adre me hna but köu, me ûsâkâûö me ta je hofuc ae bi gan, me ta je ivinö, wale adre me ha thoiâ, ka habe, bemetâ;

²¹ waleji ame kap keihen, mʼ adre me monu but ûnyi hnyi labageju. E so e unyibun ibetengiö baû.