I. Timoteo 5 - Iaai Bible 1901 (New Caledonia)

¹ CA he ka oû je hingat, ke so bi nâ e helâ me kamen; me ta je hidröu helâ me je liamekeiny:

² ke haba wasohmaca helâ me je hinyen, me wahlu helâ me je lahaniny, hnyi hwakecin ae kalaöt hia.

³ Ogânâ ju wasafac a ta je hing wasafac.

⁴ Ke a ne ke safac ae hu lakon, ke ame ne laöbiny, me so ödrin e mö nâ he ka ânyâ hwakecin ae so hnyi hnyabadrin bi, me bi troban ka lakamödrin me lahinyödra: anyin a wale ûnyi ae so hnyi hnyimakan Khong.

⁵ Ke haba momo a hing safac kʼ ame hake laba, me ame geju ka Khong, me tethmâ hnyi hic me khöû hnyi lit me lany.

⁶ Ke haba momo ame elâm senyin hnyi unyin, me a mokcu bi, ke tiga möt unyin.

⁷ U ma hûna ta je ûnyi e minya, mʼ adre me ca he ka haikongu ödra.

⁸ Ke a ne ke at ame ca tuö wia lahanen, kʼ ame ne ti helâe ka anyin lap, me e ame ivinoâ labageju, ke gan anyin hulo hon at ame ca labageju.

⁹ Ca he ka sihnalimen ien safac e ka tiga ca sikste bi je hunainy, ke khaca thibi âiân ehac,

¹⁰ ke momo adre me haisoâ hnyi ta je huliwa ae so; ka habe, ame hia but hat lakon, me betenge ge ta je atkanyua, me osûâ je li can wakap, me hadruâ tavat adre me vec, me ânyâ bala ta je huliwa hia ae so.

¹¹ Ke ca kap bi wasafac hmai, anyin a ödrin e ka hwân bekec ge Keriso adre me befaipoipo;

¹² me adre me hnaûhango but, ûnyi hnyi hnödra hna hna degecâ anyidra labageju a bân.

¹³ Ke haba khaca adre me nâ he ka höcö huliwa, me he monu ka hnyi ta je uma, he ca hake höcö thibi huliwa, ke adre me ûsabû baû minya, me hngele ka wâ huliwa anyin keihen, me ha ta je hofuc ae ca ûcû ködra.

¹⁴ Anyin a wale inya oge me wek e me he wasafac hmai ka faipaipo, me hnokoâ lakudrin, me tuö hnyabadrin, me me ba can he ka haikongoâ hnen iwahnaihmiony:

¹⁵ anyin a hia but keihen saû ka he hotu Satana.

¹⁶ A ne ke momo ame labageju kʼ ame hu je safac unyin, me so e me he ka hadruʼ ödra, ke ca he ka ohmâkâ ekalesia; me me he ka hadruâ ta je hing safac.

¹⁷ E so he ka ti ogânâ wahingat tavat adre me musi so, ke e nua ka tavat adre me huliwa hnyi hofuc me ûne.

¹⁸ Anyin a haingen hna sihnalimen, ka habe, Ca he ka ca hnyimen bolok ame ututo hwit. Ke, E ûcû hwaban ka at ame huliwa.

¹⁹ Ca kap bi hna hâiâ ke hingat e ka ba li at a lo, ame ne kun he ka ohnatho.

²⁰ E so he ka nâ hnyi hnyimakan tavat hia thithö adre me ânyâ hulo, me me ot ju keihen.

²¹ Inya oge me hûna wia köu hnyi hnyimakan Khong, me Keriso Iesu, me ta je angela adre ûca, ka habe, u me he ka tuö ta je ûnyi eang, ke ca he ka wâhmakhmeto, me bi hien ke at bi.

²² Ca he ka ie ip li hnyamâm hnyi hon ke at, ke ca hnyi hanen monu anyin keihen: tuö wia hwakecâm me me alai.

²³ Ca he hmetu ka ijem köiö ke bi waina thibi ae ûhnyûkong hobi kâu hnyekom, me ânyâm ta je mok waleji ame ibi ose o but köu.

²⁴ Ame manen dut hulo anyin keihen, me ame bödra ka hnyi hna owisa; ke ame hnu hotudrin ta je hulo anyin keihen.

²⁵ Ke helâe minya e hu ke ta je huliwa ae so ke manen dut; ke haba keihen ta je huliwa ae ke bongon bi, e pason he ka ikhâlâ.