I. Timoteo 4 - Iaai Bible 1901 (New Caledonia)

¹ KE ame ha manenâ hnen Hanu, ka habe, ame he keihen ka hna degecâ labageju, hnyi je ûen a biliny, adre me he ka löng ta je hanu adre me omono me ta je hna ûnö anyin je demoni,

² hnen iyawo anyin tavat thoi, tavat ame le oûnykûmidra ge fao ae ōû;

³ adre me thawâ he ka faipoipo, me ca han ke je jeû, wale a op Khong, he ka kap oleâ hnen tavat adre me labageju me wâhmakhmetoâ hnathu.

⁴ Anyin a haba ta je ûnyi hia thithö a op Khong, me ba ke ûnyi hnân degec, adre me ne kap e me ole:

⁵ anyin ame osoâ hnen hofuc hwan Khong, me hic.

⁶ U je ne he ka öûnykûmeâ je liamekeiny ge ta je hofuc, me u me he ka at huliwa ae so anyin Keriso Iesu, adre hat hnyi hofucin labageju, me ûne ae so, waleji u je hia but hnu hoton;

⁷ e so u ma ca kap ta je vekhet ae monu anyin wasomaca. Ke u ma khenen he ka helâ me hwakecin Khong:

⁸ anyin ae ûhnyûkong troban huliwa hnyi unyin; ke so bi, haba hwakecin helâ me Khong, me bu troban hnyi ta je ûnyi hia thithö, e hu hna ha bânâ hobi kâu möt walang ang, me möt minya bi nyiele.

⁹ Wale hofuc ae hnathu, ke ûcû he ka ti kap.

¹⁰ Anyin a wale ate me huliwa me hwege, anyin ate me geju ka Khong ae möt, wale At ame omelö tavat hia thithö, ke beönua ka tavat labageju.

¹¹ E so u me he ka hûna me ûnö ta je ûnyi e.

¹² E so ame ca he ke at ka hmiân ânyâm hidröu; ke u me he ka bi tulut ka tavat labageju, ge hwâm hofuc, me hwaʼ kecâm, me ibetengiö, me labageju, me hwaʼ kecin ae kalaöt.

¹³ E so u ma hwege aû tusi, me khetâ hofuc, me ûne, ke ne o but oge me o.

¹⁴ Ca he ka oûnyibâûâ hnödra hna ham köu, waleji adre ham köu ge hna perofeta me hna ip hnyam hnen wahingat.

¹⁵ Ûnykûme wia ta je ûnyi eang; khenen dö ka hnyin; me me manen dut troban ânyâm huliwa ka tavat hia,

¹⁶ ö u eâu bi, me hnâm hna ûne. Tethmâ ju hnyi ta je ûnyi e; anyin a u je ne ânyâ e, me u me he ka omeli u bi, inʼ ödra minya adre me ling u.