I. Timoteo 3 - Iaai Bible 1901 (New Caledonia)

¹ WALANG uthofuc ae hnathu, ka habe, A ne weny ke at hanymen pisop, e ame weny huliwa ae so.

² E ûcû ka pisop he ka ba hnyikongon, me khaca âiân, me at hokhnyok, me at hnyokâ wisa, me at ame ânyâ hwakecin ae so, me at ame betenge ge atkanyua, me at ae khana ûne;

³ ca at ame beijem gânâ waina, ke at ame ca ûkûc; e so e menyik, me ca at bi ame iwatretra, ke ca at hnyokâ mone:

⁴ at ame muso soâ anyin lap, ke haba lakon, me ödrin e löng hoton me hnyokâ wisa hia;

⁵ (anyin a ne ca khana at he ka muso anyin lap, me ame he ka hawa ka tuö ekalesia anyin Khong?)

⁶ ca at ame ibi hni, wâ e nye began me ame kolu but ka hnyi hnaûhango anyin diabolo.

⁷ E so minya e lung so kodra eû hnyou; wâ adre nye haikongoâ e, me e ame ta but ka hnyi hnewe anyin diabolo.

⁸ Ke helâe minya ta je dikona, hamödra he ka hnyokâ wisa, ca tavat lo ifucidra, ca tavat ijem gânâ waina, ca tavat behu omjeû;

⁹ kʼ adre me kât hmâ ûnyi ae iyong hnyi labageju, me oûnykûm ae kalaöt.

¹⁰ Ke so ka me cubic ödra; ke e ka ba hnyikongudrin, awe, adre me he ka ânyâ hanymen dikona.

¹¹ Helâe minya omomo he ka hnyokâ wisa, ca tavat ûhaiö, ke so he ka hok hnyok, me hnathu hnyi ta je ûnyi hia thithö.

¹² E so ka ta je dikona he ka ûsa khaca laöiödra, me muso soâ lakudra, me anyidra je lap.

¹³ Anyin a haba tavat adre me hia but ânyâ soâ hanymen dikona, ame he ka hu kodra lung so, me hwege ae gan hnyi labageju unyin Keriso Iesu.

¹⁴ Inya oge me sihnalimen ta je ûnyi e köu, ke inya oge me ûnykûme he ka ie o köu;

¹⁵ ke iny ka bec, mʼ u me he ka wâhmakhmetoâ hwakecin ae ûcû ka tavat hnyi uma umen Khong, wale ekalesia anyin Khong ae möt, me hmolom me taben hnathu.

¹⁶ Ke ca hnân ivinoâ, ka habe, e gan hmâ ûiyonginy hwakecin ae ûcû me Khong, ka habe, E ame manen dut hnyi unyin, ame haiwisa hnyi hanu, ame wâ hnen ta je angela, adre me khetâ hnyi ta je hnyei, adre me labageju kâu hnyi hmeledrany, adre me kap goranyai ka hnyi hmanenang.