I. Timoteo 2 - Iaai Bible 1901 (New Caledonia)

¹ ANYIN a wale, inya oge me nʼ öbun a bân, ka habe, adre me he ka sumâtâ, me hijö, me khöû, me ole, hobi kâu tavat hia thithö;

² hobi kâu je than, me tavat musi hia; mʼ ate me he ka laba wia me ûsoköu hnyi ta je hwakecin hia thithö ae ûcû ka Khong, me hwakecin ae wisa.

³ Wale ûnyi ae so me hnân osenyinâ hnyi hnyimakan Khong At a omeli öta;

⁴ wale at ame weny tavat hia thithö he ka möt, me he ka o ka hnyi hna wâhmakhmetoâ hnathu.

⁵ Anyin a khaca thibi Khong, ke khaca thibi at ame khöûâ tavat ka Khong, a ka at bi, wale Keriso Iesu,

⁶ waleji at ame ka hamen ham e bi hnân ûcû melen tavat hia thithö; mʼ adre me he ka ohnathoâ hnyi je ûen ae ûcû;

⁷ kʼ adre me ûco nya he ka khetâ e, ke hnân aposetolo (inya oge me ha hnathu oge me ca thoi), ke inya at ûne ka Aten ta je hnyei ka hnyi labageju me hnathu.

⁸ Anyin a wale inya oge me wek e me he obaga ka hic hnyi ta je dok hia, me ogöranyâ je hnyam ae ba hnyikongon, me ca û, me ca iwatretra.

⁹ Ke helâe minya ju omomo, e so adre me khavâ ûkhaû ae ûcû, tha e me bongon ot, me hnyok ae wisa; ca he ka ûla hobâ leûnen hodra, me gol, me penina, me ûkhaû ae gan hwaban;

¹⁰ ke so bi hnyi ta je huliwa ae so (wale ae ûcû ka omomo adre me haimemenâ a ödra tavat outen Khong.)

¹¹ Hamen momo he ka tevehlöng wia, me löng hoton.

¹² Ke oge me ca hna bi momo he ka ûnö, me muso baga, ke so bi he ka laba hnyibû.

¹³ Anyin adre bödra ka up Adamu ke bili Eva bi;

¹⁴ ke adre me ca iyawo Adamu, kʼ adre iyawâ momo, ke momo at eji ame hanyâûâ:

¹⁵ ke ame he ka möt momo hnyi hna hnokoâ, ödra ka tethmâ hnyi labageju me ibe-tengiö, me hwakecin ae kap me hnyok ae wisa.