I. Samuela 9 - Iaai Bible 1901 (New Caledonia)

¹ HABA e hu ke at Beniamina, Kiso ien, nöku Abiela, nöku Zero, nöku Bekorath, nöku Afia, a nokon ke at Beniamina, at ae ûnyi hnathu hmonyin.

² Ke e hu nokon baga, Saulo ien, hidröu ae hmanenang; ke ba at unyin lakon Isaraela ae so hon: ke haba ûbeûen e hon tavat hia, me bongödra hnyi li abenyin.

³ Ke a hia je asina hale Kiso kamö Saulo. Me haba Kiso ame ha kö Saulo a nokon, ka habe, Bethe hawâ ke athnyaba me todrö me he thö ka elâm je asina.

⁴ Ke e ame vheno hnyei ae hut hnyi Eferaima, me vheno hnyei Salisa kʼ ame ca ö ʼdrin; ke ödru me vheno hnyei Salim, ke hia bala bi eling: ke ödru me vheno hnyei Beniamina, ke ödru me ca wâ bala bi.

⁵ Ke ödru me o but hnyi hnyei Zuf, me Saulo ame ha ka athnyaba unyin, ka habe, Ötu me he ka hmetu, wâ e nye ca ûnykûme hmetu bi cica ge asina, ke hmak biju hnyekon gatu.

⁶ Ke haingen kâu, ka habe, Wâ bi, e hu ke aten Khong hnyi taun eang, at ae lung so; ame hwâdâ hia hnen je hna ha: otu Le kâ e; ame ne he ka omanenâ kötu la ge hnötu hna vheno.

⁷ Ke haingö Saulo ka athnyabainy, ka habe, Ke wâ bi, öte ne he, me ötu me he ka hok ieû ka at? anyin a um dö anyitu je areto hnyi tangen, ke ba ke bwihlany he ka hom ka aten Khong: ieû honötu?

⁸ Me ame thu hmetu athnyaba kö Saulo, ka habe, Wâ bi, e hu gak ke keihen a vakiny sekel sileva: oge me he ka ham e ka aten Khong he ka omanenâ kötu detu.

⁹ (Haba ehac hnyi Isaraela, e ka he at ka hnö unyin Khong, e ame ha, ka habe, Otin e he ka he ka at ame wâ: anyin a haba perofeta walang ang, adre hwenyi ien ehac, ka habe, At ame Wâ.)

¹⁰ Me Saulo ame ha ka athnyabainy, ka habe, E so hofuc e; otu he. Me ödru me he ka hnyi taun wale a e aten Khong hnyin.

¹¹ Ödru me tiga öliâ hwatapkoluiny taun, me ödru me wâ je hlu ödrin e he ka seköiö, ke ödru me ha ködrin, ka habe, Hawa, e ang at ame wâ?

¹² Me ödrin e thu ködrin, ka habe, e, wâ bi hnyi hnyimâkâm: hele thʼ öbu, anyin a o thö eja hnyi taun; anyin ae hu hut anyin tavat eâu hnyi dok ae görany:

¹³ öbu ka o hnyi taun öbu me he ka wâ, ke tiga ca ölö bi ka hnyi dok ae görany ka han: anyin ame ca he tavat ka ban, kʼ ame tiga ca o, anyin a hamen he ka hmö hut; hwaban e, ame hnyi han tavat adre hawâ. Ke olo thʼ öbu walang ang; anyin öbu me he ka wâ hnyi ûen ang.

¹⁴ Me ödru me he ka hnyi taun; ke ödru me o hnyi hnyin taun, wâ bi Samuela ame he jem cici ödru, he ka öliâ dok ae görany.

¹⁵ Ke a hia but Iehova omanenâ kö Samuela et ke tiga ca o bi Saulo, ka habe,

¹⁶ haba nyi hnyi ûen helâng, oge me he ka kunâ köu ke at ûnyi hnyi hnyei Beniamina, ke u me he ka hû e, me me taben lakeik at Isaraela, me e ame he ka omelö lakeik ûnyi hnyi hnyamen at Filisiti: anyin a oge hia but wâ lakeik, kʼ ame o but könya anyidra mâng.

¹⁷ Ke Samuela ame ō Saulo me Iehova ame ha kâu, ka habe, Wâ bi at waleji oge ha köu! a at ame he ka muso lakeik.

¹⁸ Ke haba Saulo ame hakekeny Samuela hnyi homagöule, me ha, ka habe, Ö u kû thö könya uma umen at ame wâ.

¹⁹ Me Samuela ame thu kö Saulo, ka habe, Inya ang at ame wâ; böbu thö ka ölö ka hnyi dok ae görany, anyin a öbu me he ka tha han mönya eâu: ke oge me he nyi ka kunö u, me omanenâ hnyekom.

²⁰ Ke haba je asina wale a hia hnyi kun ta bong ca hmak bi hnyekom gadrin: anyin adre ō ʼdrin ju. Ke hobi kö ia ûnyi adre weny hia hnyi Isaraela? Hawa, ca hobi köu bi, me lap hia anyin kâmâm?

²¹ Me Saulo ame thu, ka habe, Hawa, ca at Beniamina bi nya, wale ae ûhnyûkong hnyi je tribu hia anyin at Isaraela? ke ûhnyûkong hmonyin anyik lap hnyi je lap hia hnyi tribu Beniamina? ieû gam u me ha helâe könya?

²² Ke Samuela ame hum Saulo me athnyabainy, me hum ödru ka hnyi hnyeule, me olabʼ ödru hnyi li tap ae beönua unyin tavat adre hawâ, helâke thote tavat.

²³ Ke Samuela ame ha ka at ame bi han, ka habe, Hom but jem uthmeno waleji oge ham köu me ha köu, ka habe, Ip ju e.

²⁴ Me haba at ame bi han ame hom but jevan, me ûnyi hon e, me ip hnyi hnyimakö Saulo. Ke haingö Samuela, ka habe, Wâ bi ûnyi adre ip! ip ju hnyi hnyimâkâm, âm; anyin adre tuö e hnân hobi köu hwân hnyi ûen adre thu, anyin oge me ha, ka habe, Oge me he ka hawâ tavat. Ke haba Saulo ame tha han me Samuela hnyi bong eling.

²⁵ Ke ödrin e utut ka hnyi taun ûnyi hnyi dok ae görany, me haba Samuela ame ûhnenamö me Saulo hon uma.

²⁶ Ke ödrin e vesâ kong: ke haba hnyi haolany, me Samuela ame hongot kö Saulo hon ban uma me ha, ka habe, Todrö, mʼ inye he ka kunö u. Me ame todrö Saulo, ke ödru me tha he hââng a e me Samuela.

²⁷ Ke ödrin e tiga utut ka hnyi obiny taun, me haba Samuela ame ba kö Saulo, ka habe, Ha thö ka athnyabaem he ka mē ban (me e ame he), ke mē todru u, mʼ inye he ka omanenâ köu hofuc hwan Khong.