I. Samuela 8 - Iaai Bible 1901 (New Caledonia)

¹ KE hingat ut Samuela me e ame otilâ li lakon he ka owisa ka at Isaraela.

² Joela ien nokon a atö, ke Abia ien loiny, li at owisa hnyi Bere-seba.

³ Ke haba li lakon ödru me ca vheno deny gethen, ke ödru me saû ka omjeû me khöp hwaban, me ohwalö hna owisa.

⁴ Ke ame ûkhacaköu je hingatiny at Isaraela hia me o kö Samuela hnyi Rama:

⁵ me ödrin e ha kâu, ka habe, Wâ bi, u hingat ut, ke ame ca vheno dem gethen li lakom: ke walang ang u me he ka otilö thanihmun he ka owisa kohmun helâ me je hnyei hia.

⁶ Ke e kong kö Samuela, hnödrin hna ha, ka habe, Ham dö kohmun than he ka owisa kohmun. Ke Samuela ame hic dö kö Iehova.

⁷ Ke Iehova ame ha kö Samuela, ka habe, Long ju hofuc hwan tavat, wale adre me ha hia köu: anyin a ödrin e ca hna degeci u, ke ödrin e hna degeci nya bi, me inye ca thanidrin.

⁸ Helâ me hnödra hna ânyâ hia, hwân hnyi bong waleji oge hum ödra hnyin ûheny Aigupito ke ne o but hnyi bong ang, ke adre me digic nya me bi athnyaba ka ke je khong, me ödrin e ânyâ minya e köu,

⁹ Ke long ju walang ang hwodrin: ke so bi, u me he ka ha hwegiâ kodra me thumetu ödra ge bongon than ame he ka musi ödra.

¹⁰ Ke Samuela ame ha ta je hofuc ho Iehova hia ka tavat ödrin e sumatö than unyin.

¹¹ Ke e ame ha, ka habe, Walang bongon than ame he ka musi öbun: e ame he ka hom lakubun obaga, me otilʼ ödrin hobi kâu anyin je kariota, me anyin tavat tabö hors; ke ödrin e he ka wadring hnyi hnyimakan anyin je kariota;

¹² ke e ame he ka otilʼ ödrin hobi kâu je taben thauzan, me je taben je fifte; me he ka wia kânâin kânâ, me subâ anyin hwit, me he ka tibet anyin je ûnyi hnân vat, me je ûnyi hobi kâu anyin je kariota.

¹³ Ke e ame he ka hom lakubun je hlu hnân ûhaniken ta je ûnyi ae hnebwia, me bi han, me beka.

¹⁴ Ke e ame he ka hom je ibun, me je hnyei vine, me je hnyei elaio ûnyi gabun me ham ka lathnyabainy.

¹⁵ Ke e ame he ka hom ke keihen a libenyitainy hatungu-bun je hatong, me ibun je hnyei vine, me ham bi ka je taben unyin me lathnyabainy.

¹⁶ Ke e ame he ka hom lathnyabaibun obaga, me omomo, me je hidröu gabun ae so, me halebun je asina, me kunʼ ödrin bi ka hnyi anyin huliwa.

¹⁷ E ame he ka hom ke keihen a libenyitainy halebun je mamoe: ke öbun e he ka bi athnyabainy.

¹⁸ Ke öbun e he ka tenge hnyi bong eling can tuhöbun at öbun e he ka ûca; kʼ ame ca he bi Iehova ka thu köbun hnyi bong eling.

¹⁹ Ke so bi haba tavat adre me höcö long hofuc ho Samuela; ke haingödra, ka habe, Ohe, ohmun e he ka hu tuhöhmun;

²⁰ mʼ ohmun e he ka helâ me je hnyei hia; kʼ ame he tuhöhmun ka owisa kohmun, me hnyimakan anyihmun bunyen, me vat hobi kohmun.

²¹ Haba Samuela ame long ta je hofuc hia hwan tavat, me e ame ha ko Iehova.

²² Ke haba Iehova ame ha kö Samuela, ka habe, Long ju hodra, me otilâ tuhödra. Me Samuela ame ha ka at Isaraela, ka habe, Vese but öbun ka hnyi anyibun je taun.