I. Samuela 7 - Iaai Bible 1901 (New Caledonia)

¹ ME ame be at Kiriatha-jarim, me hom tang tangö Iehova, me hom e ka hnyi uma umo Abinadab hnyi dok ae hut, me okabi Eleazara a nokon he ka tuö tang tangö Iehova.

² Ke adre ip kuenyâ tang hnyi Kiriatha-jarim; wale tuente je huna: ke ame tenge hotu Iehova lap anyin at Isaraela hia.

³ Ke Samuela ame ha ka lap anyin at Isaraela hia, ka habe, Öbun e ne hmetu kö Iehova me hnyekubun a khaca, awe, degec ut je khong kanyua me Aseira unyibun, me penapena je hnyekubun kö Iehova, me bi athnyaba thibi kâu: ke e ame he ka omeli öbun ûnyi hnyi hnyamen at Filisiti.

⁴ Me haba lakon Isaraela ödrin e degec je Baala me Aseira, me bi athnyaba thibi kö Iehova.

⁵ Haba Samuela ame ha, ka habe, ûkha-caköuâ thö at Isaraela hia hnyi Mizepa, ke oge me he ka hic hobi köbun kö Iehova.

⁶ Me ödrin e ûkhacaköu hnyi Mizepa, me seköiö, me hingâlâ hnyi hnyimakö Iehova, me ca han hnyi bong eling, me ha eling, ka habe, Ohmun e hia but ânyâ hulö kö Iehova. Ke Samuela ame owisa ka lakon Isaraela hnyi Mizepa.

⁷ Ke a long ut at Filisiti a gʼ ame ûkhacaköu lakon Isaraela hnyi Mizepa, me ame he je thaniny at Filisiti ka tot ka at Isaraela. Ke a löng ut at Isaraela me ödrin e outen at Filisiti.

⁸ Ke haba lakon Isaraela adre me ha kö Samuela, ka habe, U me ca he ka menâ khöûʼ ohmun kö Iehova Khongutin, me me omeli ota ûnyi ge at Filisiti.

⁹ Haba Samuela ame hom ke nokon mamoe ame tiga i, me hudo hnân hudiny leû ae bekhöt kö Iehova: me Samuela ame tengiâ at Isaraela kö Iehova: me Iehova ame löng.

¹⁰ Ke Samuela ame hudo hudiny leû, me haba at Filisiti adre ma hakekenyâ he ka vat me at Isaraela: ke Iehova ame bi hwan than ae gan hnyi bong e hon at Filisiti me ohmöiöngi ödra; me Isaraela ame kuc ödra.

¹¹ Kʼ ame he at Isaraela ûheny Mizepa me hnu at Filisiti, me kuc ödra ke ne o but hmeli Bethe-ka.

¹² Ke Samuela ame hom ke veto, me otilâ wanben Mizepa me Seni, me hwenyi ien Eben-eza, haingen, ka habe, Iehova ame hadruʼ ota ke ne o but eang.

¹³ Ke adre me hom ûhnyûkongo at Filisiti, me adre me ca he hmetu bi ka hnyi hnyigöulen at Isaraela: ke iwahnaihmiony hnyamö Iehova ka at Filisiti hnyi ta je bong bongu Samuela.

¹⁴ Ke adre ham hmetu ka at Isaraela je taun waleji a hûgûnâ at Filisiti ûnyi ge at Isaraela, hwân hnyi Ekerona, ke ne o but Gatha; ke haba at Isaraela adre me hûgûnâ hmeto je hnyigöulen ge at Filisiti. Ke ûsoköu but at Isaraela me at Amora.

¹⁵ Ke Samuela ame owisa ka at Isaraela hnyi ta je bonginy anyin möt.

¹⁶ Ke e ame labö vheno gaga Beth-ela, me Gilegala, me Mizepa, hnyi ke huna me ke huna; me e ame owisa ka at Isaraela hnyi ta je dok hia eling.

¹⁷ Ke e ame labö hmetu Rama ai, anyin a waleling umen uma; ke e ame owisa eling ka at Isaraela: ke e ame otilâ eling ke taben hut kö Iehova.