I. Samuela 6 - Iaai Bible 1901 (New Caledonia)

¹ KE e bi tang tangö Iehova hnyi hnyei iny at Filisiti seven je tehi.

² Haba at Filisiti ödrin e hawâ tavat bihut me tavat bi khong, me ha ködrin, ka habe, Ohmun e he ka hawa ka tang tangö Iehova? bethe omanenâ thö kohmun dok ohmun e he ka kunâ e ka hnyin.

³ Me haingödrin, ka habe, Öbun e ne he ka kunâ tang tangen Khongon at Isaraela, ca kunâ bi ke ba ûnyi; ke so bi öbun e he ka hom kâu hudiny hulö: mʼ öbun e menyik ut, me ame he ka khanʼ öbun can hna ca hom hnyamen ûnyi gabun.

⁴ Ke haingödrin, ka habe, Ieû hudiny hulö ohmun e he ka hom kâu? Haingödrin, ka habe, Thabûng ta ohuc gol, me thabûng ta tep gol, oûco je thaniny at Filisiti: anyin a khaca thibi anyibun mok hia me je tuhöbun.

⁵ Anyin a wale öbtin e he ka theatâ anyibun je ohuc, me halebun je tep, hnyat okongoâ hnyei; ke öbun e he bi ka ogânâ Khongon at Isaraela; me ame ne he ka ohâhâ hnyamen hubun, me hon je khongubun me ibun hnyei.

⁶ Ke anyin a ieû öbun e ohwegiâ je hnyekubun, helâ me at Aigupito me Farao ödrin e ohwegiâ je hnyekudrin? ke e a hia but huliwa hnân lâiâ unyidrin, me hawa, ödrin e ca hna but tavat, me ödrin e he but?

⁷ Awe, e so öbun e hom me penapena ke kât ae teb ûnyi, me hom li kau a li sangadra, ke adre tiga ca ip hudru ûnyi hnân ûhûkâlâköuâ, me ohmâ li kau ka hnyi kât, me hom ûnyi gadru li nokon ka hnyi hnyaba:

⁸ ke hom dö tang tangö Iehova, me ip hon kât; ke hitangen ju je omjeû gol wale öbun e he ka hom kâu hnân hudiny hulö hnyi ong tang me tha ip mē; me kunâ e me me he but.

⁹ Ke wâhmakhmeto ju ame ne he ka gethen hnyi hing hnyigöulen, Bethe-semes ai, awe, e ame hia but ânyâ kötin ta je hna okongo eang ae gan: ke ame ne ca helâe, awe, ame he ka khanʼ ota a ga ca kuc otin ge hnyamen; ke ame ka o baû bi kötin.

¹⁰ Me ame ânyâ helâe tavat; me ödrin e hom li kau a li sangadra, me ohmʼ ödru ka hnyi kât, me hlöng hwanumödru hnyi hnyaba:

¹¹ ke ödrin e ip tang tangö Iehova hon kât, me ong tang me je tep gol me je hnatheatʼ anyidrin je ohuc.

¹² Ke ame he risa eû hnyi gethen li kau hnyi gethen ûheny Bethe-semes; kʼ ame vheno hna cit gethen, ke ame kuku tot, ke ame ca saû ka hnyi ke keihen metâ me me; ke haba je than Filisiti ödrin e he hotudru ke ne o but hnyi hnyigöulen Bethe-semes.

¹³ Ke haba at Bethe-semes, ödrin e subâ anyidrin hwit eû hnyi hnyigöulen bucen: ke ödrin e bwele me wâ tang, me ödrin e senyin he ka wâ.

¹⁴ Ke ame o thö kât hnyi utkânâ i Josua at Bethe-semes, me ame todru eling hnyi veto ae gan: me ödrin e kia ûtoiny kât me hudo li kau hnân hudiny leû kö Iehova.

¹⁵ Ke haba at Levi ödrin e hom tang tangö Iehova, me ong tang unyin, a tangen je omjeû gol, me ip hon veto ae gan: ke haba at Bethe-semes ödrin e hudo je hudiny kû me hudo je hut kö Iehova hnyi bong eling.

¹⁶ Ke a wâ e je than Filisiti a thabûng, me ödrin e hmetu Ekerona ai hnyi bong eling.

¹⁷ Ke walang je ohuc gol a ham at Filisiti hnân hudiny hulö kö Iehova; khaca ûnyi ge Asedoda, khaca ûnyi ge Gaza, khaca ûnyi ge Asekelona, khaca ûnyi ge Gatha, khaca ûnyi ge Ekerona;

¹⁸ me je tep gol oûco je tauniny at Filisiti hia anyin je than a thabûng, a je taun adre up haginy, me je taun ae ûhnyûkong hnyi ta hnyei: ke ne o fat hnyi veto ae gan wale ödrin e ip tang tangö Iehova hnyi hon, ka eling ke ne o but hnyi bong ang hnyi utkânâ i Josua at Bethe-semes.

¹⁹ Ke e ame kot tavat hnyi Bethe-semes, can ödrin e selâdrâ hnyin tang tangö Iehova, e ame kot tavat a sevente, me fifte thauzan tavat: me ame tenge tavat anyin a Iehova ame kot tavat, ke e gan hmâ hna hlingʼ ödrin.

²⁰ Me ame ha at Bethe-semes, ka habe, Ie at ae khana he ka töt hnyi hnyimakö Iehova, Khong ae kap eang? Ke e ame he ka ölö kö ia gatin?

²¹ Me ödrin e kunâ je ûthûmetu ka tavat adre me laba hnyi Kiriatha-jarim, ka habe, Haba at Filisiti ödrin e hia but hom hmetu jem tang tangö Iehova; ok ut öbun ka hom e köbun.