I. Samuela 5 - Iaai Bible 1901 (New Caledonia)

¹ WALELING a hom tang tangen Khong hnen at Filisiti, ke adre me hom e Asedoda ai ûheny Eben-eza.

² Ke at Filisiti adre me hom tang tangen Khong me vadren ka hnyi uma umo Dagona, me ip e unyi Dagona.

³ Ke a todrö at Asedoda hnyi hnyomakatu, me wâ bi, ame ta but Dagona hnyikânâi cicö tang tangö Iehova. Me ödrin e kop Dagona me otilâ hmetu hnyi hnen.

⁴ Ke ödrin e tot hmetu nyi hnyomakatu, me wâ bi, a ta but hnyikânâi Dagona cicö tang tangö Iehova; ke haba bö Dagona, me li hnyamen ame mokut hnyi hwanuma a mou but, ke e bi unyi Dagona thiju.

⁵ Anyin a wale adre me ca uto hwanumen umö Dagona e Asedoda ke ne o but hnyi bong at, wale ge tavat bihut kö Dagona, me tavat minya adre me dit ka hnyi umö Dagona.

⁶ Ke hmak ut hnyamö Iehova hon at Asedoda, me e ame ohiʼ ödrin me kuc ödrin ge je okuc, wale hnyi Asedoda me je hnyigöulen.

⁷ Ke a wâ but e at Asedoda, me ödrin e ha, ka habe, Ame ca he bi tang tangen Khongon at Isaraela ka hnen unyitin, anyin ae hwege hnyamen hutin, me hon khongutin a Dagona.

⁸ Me ödrin e ûkhûnöng he ka ûkhacaköuâ mödrin je thaniny at Filisiti hia, me ödrin e ha, ka habe, Otin e he ka hawa ka tang tangen Khongon at Isaraela? Me ödrin e thu, ka habe, E so adre me hom tilâ tang tangen Khongon at Isaraela Gatha ai. Me ödrin e hom tilâ tang tagen Khongon at Isaraela.

⁹ Ke ödrin e hia but hom tilâ e, me haba hnyamö Iehova ame iwahnaihmiony me taun kʼ ame ti okongoâ: me ame kot obagainy taun a tavat ae ûhnyûkong me tavat ae gan, kʼ ame tabʼ ödrin ohuc.

¹⁰ Me ödrin e ûkhûnöng me tang tangen Khong Ekerona ai. Ke ame o but tang tangen Khong hnyi Ekerona, me haba at Ekerona ödrin e kuku me ha, ka habe, Ödrin e hom kötin tang tangen Khongon at Isaraela, me me hlingʼ otin me itin hnyei.

¹¹ Me ödrin e ûkhûnöng he ka ûkhacaköuâ je thaniny hia at Filisiti, me ha, ka habe, Kunâ but tang tangen Khongon at Isaraela me me hmetu ka hnyi hnen, me me ca hlingʼ ohmun me ihmun hnyei: anyin ae gan hmâ hna okongoâ hnân mekiny hnyi taun hia; e hmak gan hmâ eling hnyamen Khong.

¹² Ke haba tavat a ca mokcu, a tabʼ ödra ohuc: ke ame he thö hnyi dranyai hwan utengien taun.