I. Samuela 4 - Iaai Bible 1901 (New Caledonia)

¹ KE ame o thö hofuc ho Samuela ka at Isaraela hia. Me ame he at Isaraela he ka vat me at Filisiti, me adre me hunuma hnyi Eben-eza: ke ame hunuma at Filisiti hnyi Afeka.

² Me at Filisiti adre me tot metâ ka at Isaraela: ke adre me hwân vat, ke Isaraela ame ngâ ge at Filisiti: ke adre me hlingâ tavat vat a helâ me foa thauzan.

³ Ke ame o tavat ka hnyi hna hunuma, me haba wahingatiny at Isaraela ödrin e ha ka habe, Can ieû Iehova ame kuc ota hnyi hnyimakan at Filisiti hnyi bong ang? E so ate me hom ûheny Silo tangen ûhihinyköu, me me e bi unyita, me omeli ota ûnyi ge je iwahnaihmiony möta.

⁴ Me ame ûkhûnöng tavat Silo ai he ka hom ûheny e tangen ûhihinyköu anyi Iehova tuhan sabaoth, at ame laba wanben li kerubi: ke li laku Eli eling, jia Hofeni me Fineasa, unyin tangen ûhihinyköu anyin Khong.

⁵ Ke adre me hom tangen ûhihinyköu anyi Iehova ka hnyi hna hunuma me ame kuku gan hmâ at Isaraela hia me ame umet hnyei.

⁶ Ke a long ut at Filisiti medien kuku, me haingödra, ka habe, Ieû hwan kuku ae gan hnyi lap anyin at Heberu? Me adre me wâhmakhmetoâ a gʼ ame o thö tang tangö Iehova hnyi hna hunuma.

⁷ Ke haba at Filisiti adre me ot, ke adre me ha, ka habe, A o thö Khong ka hnyi hna hunuma. Ke haingödra, ka habe, Ekölö gata! E ba ûnyi a helâe ehac.

⁸ Ekölö gata! ia ame he ka hûgûnʼ ota ûnyi hnyi je hnyamen ta je khong eling ae hwege? wale ta je khong eji hnyat a kot at Aigupito ge ke je mok ae cap hnyi hnyebuba.

⁹ E, öbun at Filisiti lö, hwege thʼ öbun, hnyok baga thö, wâ adre nye thaluʼ öbun ge at Heberu, helâ me hnobun hna thaluʼ ödrin: hnyok bagâ thʼ öbun, me vat.

¹⁰ Me haba at Filisiti adre me vat bi, ke ame ngâ but at Isaraela, me adre me ve kec ka hnyi umödra je uma mano: ke ti gan hmâ hna hlingʼ ödra; anyin ame ta but thote thauzan at Isaraela tavat he hon kânâ.

¹¹ Ke adre hûgûnâ tang tangen Khong; ke adre hlingâ li laku Eli, jia Hofeni me Fineasa.

¹² Ke ame wadring ke at Beniamina ûheny hnyi hna vat, me o hnyi Silo hnyi bong eling, ke khekhe but anyin ûkhaû, ke e hu kânâ hon ban.

¹³ Ke e ame o but, me wâ bi Eli ame laba hon taben tap eû hnyi gethen ame selâdrâ: anyin ae öbubuny hnyekon can tang tangen Khong. Ke o but at hnyi taun, me ûthumetu, me ame ûtengiö taun hia.

¹⁴ Ke a long Eli hwan ûtengiö, me e ame hnö, ka habe, Ieû imedien ûmonumouny eling? Me ame ie he at, me thumetu Eli.

¹⁵ Ke nainte eit ut je hunai Eli; ke wadröu but li emakan, ke ca khana bwele.

¹⁶ Ke haingen at kö Eli, ka habe, Inyʼ at ûhek hnyi vat, ke oge kec eja jem ûnyi hnyi hna vat. Ke haingen, ka habe, Nokuk, ieû bongon?

¹⁷ Me ame thu at hom ûthumetu, ka habe, a kec dö at Isaraela ge at Filisiti, ke e gan hmâ hna hlingâ unyin tavat, ke a mok minya thö lakom, jia Hofeni me Fineasa, ke adre hia thö hûgûnâ tang tangen Khong.

¹⁸ Ke hnyi ûen e ame hâiâ tang tangen Khong, me e ame ta me hnyimen goranyai ûnyi hnyi taben tap hnyi baten homagöule, me ame hmetru but nyin me mokcu; anyin ae hingat ut me hmak. Ke e ame hia but owisa ka at Isaraela fâte je huna.

¹⁹ Ke haba ûngon a öiö Fineasa, e erkin ame ne ûen he ka o, ke e a long ut ûthumetu a gʼ adre hia thö hûgûnâ tang tangen Khong, ke a mokcu: ûngon me âiân, me e ame iyâû he ka hnokoâ, anyin ame o kâu vec hnyekon.

²⁰ Ke hnyi ûen anyin mok ame ha kâu je momo adre tha e mē, ka habe, Ca he ka ot, anyin a u je hia but hnokoâ da. Ke e ame ca thu bi, ke ame ca long minya bi.

²¹ Ke e ame hwenyi ien wanakat Ikaboda, haingen, ka habe, A hia but hmanenang unyin at Isaraela: anyin adre hûgûnâ thö tang tangen Khong, me ûnyi ge ûngon me âiân.

²² Ke e ame ha, ka habe, A hia thö hmanenang unyin at Isaraela; anyin adre hûgûnâ thö tang tangen Khong.