I. Samuela 31 - Iaai Bible 1901 (New Caledonia)

¹ KE haba at Filisiti adre me vat me Isaraela: me ame kec bi at Isaraela ge at Filisiti, me ta mok hnyi bucen Gileboa.

² Ke haba at Filisiti adre me hnu hwegiö Saulo me lakon; me at Filisiti ödrin e hlingö Jonathana, me Abinadab, me Malekisua a laku Saulo.

³ Ke hwege vat kö Saulo, ke ame khâu e ge tavat fana; kʼ ame ohmakâ gan hmâ e ge tavat fana.

⁴ Me Saulo ame ba ka at ame hom tilâ anyin ta je ûnyi vat, ka habe, Oc ut ânyâm hele vat me dâoi nya kâu; wâ e nye o but tavat adre ca peritomonâ me dâoi nya, me okongu nya. Ke ame höcö at ame hom tilâ anyin je ûnyi vat; anyin ae gan hmâ anyin ot. Me haba Saulo ame hom hele vat me hamen ta takoû e.

⁵ Ke a wâ but at ame hom tilâ anyin je unyi vat, a ga mokcu Saulo, me e ame ka ta takoû minya anyin bi hele vat, me tha mok me.

⁶ Me a tha mokcu Saulo me ta lakon a kun, me at ame hom tilâ je omjehen vat, me aten hia thithö hnyi bong eling.

⁷ Ke a wâ but at Isaraela hnyi ke keihen hnyigöulen bucen, me tavat hnyi hoton Joridano, a ga kec dö at Isaraela, ke a mokcu Saulo me ta lakon a kun, me ödrin e hna je taun, me kec; kʼ ame o but at Filisiti me labā.

⁸ Ke haba nyi ame he at Filisiti he ka uny je ûkhaû anyin je komok, me adre me ō Saulo me ta lakon a kun, odrin e ta hnyi bucen Gileboa.

⁹ Me adre me subâ degecâ ban me uny dut je omjehen vat, me ûkhûnöng ka hnyi hnyei iny at Filisiti hia he ka thumeto hnyi uma umen anyidrin je hnatheat, me ka tavat.

¹⁰ Ke adre me ip omjehen vat hnyi uma umo Aseira: ke haba unyin bi, me adre me uhno hnyi hna up hak veto hnyi Bethe-san.

¹¹ Ke a long ut at Jabesi-gileada ûnyi a ânyâ at Filisiti kö Saulo,

¹² me ame todrö tavat hwege hia, me he hnyi lit, me hom unyi Saulo, me unyin ta lakon a kun ûnyi hnyi hna up hak veto hnyi Bethe-san; me ödrin e o hnyi Jabesi, me thong degecâ je unyin eling.

¹³ Ke ödrin e hom je jei-ödrin me konâm hmelen ûö hnyi Jabesi, me ca han bi hnyi seven ta bong.