I. Samuela 30 - Iaai Bible 1901 (New Caledonia)

¹ KE ame o Davita me je aten hnyi Zikelag hnyi bong a kuniny, me ame hia but utut at Amaleka ka hnyi hon ke keihen hnyi Hwaiöu, me hon Zikelag minya, me kot Zikelag, me thoug ge meic:

² me hûgûnâ je momo me hnyat hia ûnyi hnyin, ame ne gan ame ne ûhnyûkong: ödrin e ca hlingâ ke at, ke adre hûgûnâ, me he but.

³ Ke ame o but Davita me je aten ka hnyi taun, me wâ bi, adre hia but thong ge meic; ke adre hia but hûgûnâ je laöiödrin, me je lakudrin obaga me wahlu.

⁴ Haba Davita me tavat unyin ödrin e tenge tot goranyai ke ca khanʼ ödrin hmetu he ka tenge.

⁵ Ke adre hûgûnâ minya thö laöiö Davita, jia Ahinoam at Jezerela, me Abigaila safaci Nabala at Karemela.

⁶ Ke gan hmâ hlöuhlöu anyi Davita; anyin ame ûhnenamö tavat he ka lûâ e, anyin ae vec hnyekon tavat hia thithö can je lakudrin obaga me wahlu: ke Davita ame siwhegiâ e bi ga Iehova Khongon.

⁷ Ke Davita ame ha kö Abiathara at bihut, nöku Abimelek, ka habe, Ö u hö jem könya iefoda. Me Abiathara ame hom iefoda kö Davita.

⁸ Ke Davita ame hnö ga Iehova, ka habe, Oge ne hnu hoton deö vat, hawa, oge me he ka hom tilödrin? Me ame ha kâu, ka habe, Hnu thö; me u me he ke khöu ödrin, me hûgûnâ hia hmetu.

⁹ Me Davita ame he me tavat a siks haded a tha odrin mē; ke ödrin e o but hnyi wagewe Besor, wale a ûlubahing hnyin tavat adre laba biju.

¹⁰ Ke Davita ame ûhnûhnû, a e me foa haded tavat: anyin a laba biju lo li haded tavat ae sënyin me ca khanʼ ödrin he ka hanyâûâ wagewe Besor:

¹¹ ke ödrin e wâ ke at Aigupito hnyi hnyei, me ödrin e hom e kö Davita, me bân ge falawa me habelen ge köiö;

¹² ke ödrin e han ge û ometâ, me li de wan vine adre hlec meleca; ke e ame han, me ame hmetu hanon: anyin a kun ta bong ke kun ta lit a ca han hnyin me ic.

¹³ Ke haingö Davita kâu, ka habe, U atö ia? ke ûhem ua? Haingen, ka habe, Iny hidröu Aigupito, a athnyabainy ke at Amaleka; ke a digic nya tuhok, anyin a o könya mok hnyi bong et eji.

¹⁴ Ke ohmun e utut ka hnyi hon ke keihen a hwaiöuiny at Kerethi, me ke keihen iny at Juda, me hwaiöuiny Kaleba; ke ohmun e thong Zikelag ge meic.

¹⁵ Ke Davita ame ha kâu, ka habe, Hawa, u me he ka su nya ka hnyi deö vat eling? Me haingen, ka habe, Khemanyin dö könya unyin Khong a u me ca he ka hlingö nya, me hnö nya hmetu ka tuhok, me oge me he ka hum u kâe ka hnyi deö vat.

¹⁶ Me e ame su e, me wâ bi, adre me laba me avâ kânâ hia, kʼ adre me han me ic me bijeûâ, anyin ae se hia je ûnyi adre me hûgûnâ ödrin e hom ûnyi hnyi hnyei iny at Filisiti, me hnyei Juda.

¹⁷ Ke haba Davita ame kuc ödrin hwân hnyi hauhaotreng ke ne o but nyi hnyi sahac: ke ba at ame kec möt, ke so thibi ta je hidröu a foa haded, a hnyat tabâ je kamela mʼ ödrin e kec.

¹⁸ Me Davita ame hûgûnâ hmetu ta je ûnyi hia waleji a hom at Ameleka: ke Davita ame hûgûnâ hmetu minya laâiân.

¹⁹ Ke ba ke ûnyi bi ae hia gadrin ame ne ûhnyûkong ame ne gan, me lakudrin obaga me wahlu, me ta je ûnyi adre sö, me ta je ûnyi hia ödrin e hom: me Davita ame hom hmetu hia.

²⁰ Ke Davita ame hom je hnahat mamoe me kau, wale ödrin e alen hnyi hnyimakan ke je meno eling, me haingen, ka habe, Anyi Davita but je ûnyi ang.

²¹ Ke ame o but Davita ka tavat a tu haded wale ae ti sënyin me me ca khanʼ ödrin he ka he hotu Davita, wale ödrin e hia but olabā hnyi wagewe Besor: ke ödrin e he me ûkhanö me Davita me tavat a tha e mē: ke e hakekeny dut Davita me tavat e ame iouny mödrin.

²² Me ame ha tavat ae kong hia me tavat Belial adre tha he me Davita, ka habe, Ca he otin ka khenâ ködrin ta je ûnyi adre sö wale otin e sö, anyin a ödrin e ca hnyi tha he mötin, ke so bi otin e he ka ve ham ka je baga je laöiödrin me je lakudrin mödrin e lili ödrin me he.

²³ Ke haingö Davita, ka habe, Hnyat me lakeiny mönya lö, öbun e ca he ka ânyâ helâe ge ta ja ûnyi wale a ham kötin Iehova, at ame hia but tuʼ otin, me hna ka hnyi hnyamötin deö vat ame utut kötin.

²⁴ Ke ie at ame he ka ling öbun hnyi ûnyi eang? anyin adre me he ka khenâ kâu at ame he ka hnyi vat helâ me hna khenâ kâu at ame laba me tuö ta je omjehen: adre me he ka khenâ oûco thibi.

²⁵ Ke hwân hnyi bong eling ke ne o but nyiele, e ame otilâ e hnân hnanyibu me owisa hnyi Isaraela ke ne o but hnyi bong ang.

²⁶ Ka o but Davita hnyi Zikelag, me e ame kunâ ke je ûnyi adre sö ka je hingatiny hnyei Juda, a je lahanen, me ha, ka habe, Walang bwihlany hobi köbun ûnyi hnyi je ûnyi adre sö ge je iwahnaihmiony me Iehova;

²⁷ ködrin hnyi Beth-ela, me Bamoth hnyi hwaiöu, me Jatira;

²⁸ me ködrin hnyi Aroera, me Sifemo, me Esetemoa;

²⁹ me ködrin hnyi Rakal, me ödrin hnyi je taun anyin at Jeramela, me ödrin hnyi je taun anyin at Keni;

³⁰ me ködrin hnyi Horema, me Kor-asan, me ködrin hnyi Atak;

³¹ me ködrin knyi Heberona, me ködrin hia thithö wale hnö Davita me anyin tavat hna labö he kâu.