I. Samuela 3 - Iaai Bible 1901 (New Caledonia)

¹ KE haba Samuela a da ame athnyabai Iehova hnyi hnyimakö Eli. Ke ca khenen hofuc ho Iehova hnyi je ûen eling; ke ba hna omanenâ ame o.

² Ke hnyi ûen eling kʼ ame mokut Eli hnyi hnen, (ke hadedak ut li emakan, ke ca khana bi bwele,)

³ ke tiga ca mok lamepa anyin Khong, ke Samuela ame mokut hnyi uma umo Iehova wale hnen tangen Khong;

⁴ me waleling haba Iehova ame hawo Samuela: ke haingen, ka habe, Inya ang.

⁵ Me e ame wadring kö Eli, me ha, ka habe, Inya ang; anyin a u je hawo nya. Me haingen, ka habe, Oge ca hawo u; he hmetu thö ka mokut. Me e ame he me mokut.

⁶ Ke haba Iehova ame hongot hmetu, ka habe, Samuela lö. Me Samuela ame todrö me he kö Eli, me ha, ka habe, Inya ang; anyin a u je hawo nya. Me haingen, ka habe, Oge ca hawo u nokuk; he hmetu thö ka mokut.

⁷ Ke tiga ca khanö Iehova bi ga Samuela, kʼ adre tiga ca hia but omanenâ kâu hofuc ho Iehova.

⁸ Ke haba Iehova ame okun hmetu hawo Samuela. Me e ame todrö me he kö Eli, me ha, ka habe, Inya ang; anyin a u je hawo nya. Me Eli ame wâhmakhmeto a Iehova ame hawâ wanakat.

⁹ Anyin a wale ame ha Eli kö Samuela, ka habe, He thö ka mokut, ke ame ne he ka hawo u, me u me he ka ha, ka habe, Iehova lö, ha thö, anyin a long ut athnyabaem. Haba Samuela ame he me mokut hnyi hnen.

¹⁰ Ke ame o but Iehova, me tot, me hongot helâ me eja, ka habe, Samuela, Samuela lö. Ke haingö Samuela, ka habe, Ha thö, anyin a long ut athnyabaem.

¹¹ Haba Iehova ame ha kö Samuela, ka habe, Wâ bi, oge me he ka ânyâ ke ûnyi hnyi Isaraela, ke ame he ka mea hnyi li hnyikonyen tavat hia adre me long.

¹² Hnyi bong eling oge me he ka ânyâ kö Eli ta je ûnyi hia wale oge hia but ha ge anyin lap, hwân hnyi can, ke ne o but obiny.

¹³ Ke oge hia but ha kâu a oge me he ka owisa anyin lap nyiele balua, can monu e ame wâ, anyin a lakon ödru me oâ hnaûhango ködru bi, ke e ame ca thaw ödru.

¹⁴ Anyin a wale oge hia but khemanyin ka lap anyi Eli, a oge me ca he ka ohia hulöiny lap anyi Eli ge hut me bwihlany nyiele balua.

¹⁵ Ke Samuela ame mokut ke ne o but ame lany, me khong ut je hwanumen uma umo Iehova. Ke Samuela ame ot he ka thumetu Eli ge hna omanenâ.

¹⁶ Ke haba Eli ame hawo Samuela, me ha, ka habe, Samuela, nokuk. Haingen, ka habe, Inya ang.

¹⁷ Ke haingen, ka habe, Ieû ûnyi adre hia but ha köu? Ö u ca he ka ikhâlâ gak: e so ame be khong ka ânyâ helâe köu, me bi hanen u je ne ikhâlâ ke ûnyi wale a ha köu.

¹⁸ Ke Samuela ame thumeto ge ta je ûnyi hia, ke ame ca ikhâlâ gan khaca. Ke haingen, ka habe, E bi Iehova, hamen he ka ânyâ ûnyi ae so hnyi hnyimakan.

¹⁹ Ke ame gan tot Samuela, ke tha Iehova mê, ke e ame ca hna he ka kolu ka hnyi kânâ khaca hnyi hwan je hofuc.

²⁰ Ke e khana but at Isaraela hia thithö hwân Dana ke ne o but Bere-seba a gʼ adre otilö Samuela thö me perofeta anyi Iehova.

²¹ Ke Iehova ame manen hmetu hnyi Silo: anyin a Iehova ame omanenâ e bi kö Samuela hnyi Silo ûnyi hnyi hofuc ho Iehova.