I. Samuela 29 - Iaai Bible 1901 (New Caledonia)

¹ KE haba at Filisiti ödrin e ûkhacaköuâ anyidra je utbavat hnyi Afeka: ke at Isaraela adre me hunuma hnyi an ame pupua hnyi Jezerela.

² Ke ame he je than anyin at Filisiti, a je ve deo haded me deo thauzan: ke Davita me je hnyat unyin ödrin e tha bilidrin bi me Akisa.

³ Me haba je tuhan at Filisiti ödrin e ha, ka habe, Ie hnyat Heberu ang? Ke Akisa ame ha ka latuhan at Filisiti, ka habe, Hawa, e ca khanʼ öbun a Davita ang, athnyabai Saulo tuhan Isaraela, kʼ ame tha e mönya hnyi ta je bong ame ne je huna, ke ba ke ûnyi oge me wâ unyin, hwân hnyi bong eji e ame kec hnyin, ke ne o but hnyi bong ang?

⁴ Me ame hmonyin kâu latuhan at Filisiti; me haingen kâu latuhan at Filisiti, ka habe, Kunâ hmetu ju, me me he ka hnyi gan, wale dok u je ip hnyin, ke e ame ca he ka tha he mötin ka hnyi vat, wâ e nye hwio thö me kuc ötin hnyi vat: ke ieû ame he ka ûsoköu kâu me tuhan? hawa ca ge je ban tavat eang?

⁵ Ca Davita ang, waleji adre me sitwhanân hnyi bibiâ, ka habe, Saulo ame hia but kot haniny je thauzan, Ke Davita bi, haniny je ten thauzan?

⁶ Haba Akisa ame hawo Davita me ha kâu, ka habe, Kia inya Iehova, a u wisa, ke so könya ûdilâm dö me ûdilâm but unyik hnyi utbavat: anyin a oge ca wâ gam ke ûnyi ae kong, hwân hnyi bong eji u je he jem hnyin könya ke ne o but hnyi bong ang: ke so bi u ca o ka je taben.

⁷ Anyin a wale hmetu ju u, ke he thö me hnahic, me u me ca kong ka je tuhan at Filisiti.

⁸ Ke haingö Davita kö Akisa, ka habe, Ieû hnok hna ânyâ? ke ieû u je wâ unyin athnyabaem hwân hnyi bong eji oge tha e hnyin möu ke ne o but hnyi bong ang; me inye ca he ka hnyi vat me je iwahnaihmiöny me than a tuhok?

⁹ Haba Akisa ame thu me ha kö Davita, ka habe. E khanö nya a u so könya helâ me angela anyin Khong: ke so bi je tuhan at Filisiti ödrin e ha, ka habe, E ame ca he ka tha he mötin ka hnyi vat.

¹⁰ Awe, tha vesâkong ut me lathnyabainy tuhâm adre tha I he jem möu: ke öbun ka todrö hnyi hnyomakatu, ke lany dö, ie he thö.

¹¹ Me Davita me je aten ödrin e vesâ hnyi hnyomakatu, he ka hmetu ka hnyi hnyei iny at Filisiti. Ke at Filisiti adre me he Jezerela ai.