I. Samuela 28 - Iaai Bible 1901 (New Caledonia)

¹ HABA hnyi ûen eling me at Filisiti adre me ûkhacaköuâ anyidra je utbavat he ka vat me at Isaraela. Me haba Akisa ame ha kö Davita, ka habe, Khanö u wia thö a u me he ka tha he mönya hnyi je utbavat, a u me je atâm.

² Me haingö Davita kö Akisa, ka habe, Awe u me he ka wâ ûnyi ame he ka ânyâ athnyabaem. Ke Akisa ame ha kö Davita, ka habe, Awe, oge me he ka otilö u he ka tuö bök nyiele balua.

³ Ke ame mokcu Samuela me a hia but tenge gan Isaraela hia thithö, me konâm e hnyi Rama wale anyin taun. Ke a hia but Saulo ohia hnyi hnyei tavat ae tren biobotkong me je at bihihwakecin.

⁴ Ke haba, at Filisiti ödrin e ûkhacaköu me he me hunuma hnyi Sunema: ke Saulo ame ukhacaköuâ at Isaraela hia me hunuma hnyi Gileboa.

⁵ Ke a wâ but Saulo je utbavat anyin at Filisiti, me ame ot, kʼ ame öbubuny gan hmâ hnyekon.

⁶ Ke Saulo ame hnö ga Iehova, ke Iehova ame ca thu kâu, ca deny je bwi, ke ca deny Urim, ke ca deny je perofeta.

⁷ Me Saulo ame ha ka lathnyabainy, ka habe, He thö ka elâm hobi könya ke momo ae tren biobotkong, me inye he kâu he ka elâm unyin. Me ame ha kâu lathnyabainy, ka habe, Wâ bi, e hnyi Eni-dora momo ae tren biobotkong.

⁸ Ke Saulo ame ka kebongonâ e bi, me khavâ bi ke je ûkhaû me he, a e me li at a tha he mē, me ödrin e o but unyin momo hnyinghet: me e ame ha, ka habe, Ö u elâm dö hobi könya a deny biobotkong, me oâ könya at oge me beka ha köu.

⁹ Me ame ha kâu momo, ka habe, Wâ bi, e khanö u hna ânyâ hnö Saulo, wale e ame subâ degecâ tavat ae tren biobotkong me je at bihihwakecin hnyi hnyei: ke ieû gam u me he ka lau hnewe hobi könya, me hnân hlingö nya?

¹⁰ Ke Saulo ame khemanyin kâu ga Iehova, ka habe, Kia inya Iehova ae ba ûnyi ae kong ame he ka o köu can ûnyi ang.

¹¹ Ke haingen momo, ka habe, O ge me he ka o ia köu? Haingen, ka habe, U me he ka oi Samuela könya.

¹² Ke momo ame ō Samuela, me a ame hongot goranyai: ke haingen momo kö Saulo, ka habe, Can ieû u je iyawö nya î anyin a u Saulo.

¹³ Ke ame ha kâu than, ka habe, U ma ca ot: ke ieû ke ûnyi u je wâ? ke haingen momo kö Saulo, ka habe, Oge wâ ke khong ame o ûheny hnyi kânâ.

¹⁴ Ke haingen kâu, ka habe, Ieû imaneniny e? Haingen, ka habe, Ame o hingat; ke adre tube e ge ûkhaû. Me ame khanö Saulo a Samuela ling, ke e ame nom me khudrung hnyikânâi.

¹⁵ Haba Samuela ame ha kö Saulo, ka habe, Anyin a ieû u je bwebweli nya, he ka oi nya? Haingö Saulo, ka habe, Iny hlohlo gan hmâ; anyin ame he at Filisiti ka vat mönya, ke hia but Khong unyik ke ame ca thu hmetu bi könya, a ca deny je perofeta, ke ca deny je bwi: wale me inye hawo u thö, me u me omanenâ könya ûnyi oge me he ka ânyâ.

¹⁶ Haba Samuela ame ha, ka habe, Ke hnân eû u je hnei nya anyin ae hiö Iehova but unyâm ke ame hwân he ka iwahnaihmiony dut möu?

¹⁷ Ke Iehova ame hia but ânyâ hobi kâu helâ me hnen hna ha a deny inya: ke Iehova ame hia but kia dökhu ûheny unyâm, me ham e ka at a hânâm, jia Davita.

¹⁸ Anyin a u je ca long hofuc ho Iehova, me ca ohwâdâ anyin hmonyin ame ubâhlâ kö Amaleka, anyin a wale Iehova ame ânyâ köu ûnyi eling hnyi bong ang.

¹⁹ Ke haba khaca ame he Iehova ka tha hna at Isaraela möu ka hnyi hnyamen at Filisiti: ke nyi u me he me lakom ka tha e mönya: ke ame he Iehova ka hna je utbavat anyi Isaraela ka hnyi hnyamen at Filisiti.

²⁰ Haba Saulo ame ie ta ulili hon kânâ, me ot gan hmâ, can hofuc ho Samuela: ke ba hmetu hwegien; anyin a ca han eja hnyi lany ke ne o but hnyinghet.

²¹ Ke ame o but momo kö Saulo me wâ ae gan anyin hlohloʼ me ha kâu, ka habe, Wâ bi, inya athnyabaem oge me long hwâm hofuc, ke oge me ip anyik möt hnyi hnyamok, me long hofuc u je ha könya.

²² Ke walang any ö u long minya ju könya a athnyabaem, me oge me he ka ip ong jeû hnyi hnyimâkâm: ke me han dö, me u me he ka hwege u ka he.

²³ Ke e ame höcö me ha, ka habe, Oge me ca he ka han. Me ame ûjengö e li lathnyabainy me momo; me e ame ling ödrin. Me e ame tot ûheny hnyi kânâ me laba hon hnamokut.

²⁴ Ke e hu ge momo nokon kau ae pipikhenya hnyi hnyaba; ke e ame ie hlingâ, me hok falawa, me op, me le je areto adre ca levenâ:

²⁵ me e ame hom kö Saulo me li lathnyabainy; ke ödrin e han. Me ödrin e tot me he but hnyi lit eling.