I. Samuela 27 - Iaai Bible 1901 (New Caledonia)

¹ KE haingö Davita hnyi hnyekon, ka habe, Oge me he ka mok hnyi ke bong ge hnyamö Saulo: khaca thibi ûnyi ae so könya oge me he ka ie kec ka hnyi hnyei iny at Filisiti; me ame he ka hia hna gejon hnö Saulo he ka elöm nya hmetu hnyi je hnyigöulen Isaraela: me oge me he ka kec möt helâe ge hnyamen.

² Haba Davita ame todrö, me he hanyâûâ me je aten a siks haded a tha e mê, kö Akisa, nöku Maoka, thaniny Gatha.

³ Ke Davita ame tha laba me Akisa hnyi Gatha, e me je aten, ödrin e ve laba hnyi je hnyabadrin, me Davita me laâiân, jia Abinoam at Jezerela, me Abigaila safaci Nabala, mome Karemela.

⁴ Ke adre thumetu Saulo, ka habe, a kec ut Davita, Gatha ai, me e ame ca elâm hmetu.

⁵ Ke Davita ame ha kö Akisa, ka habe, U je ne betenge gak, ö u ham dö könya ke dok hnyi ke taun hnyi hulup, me inye he ka laba eling: anyin a ieû oge me he a athnyabeam ka tha laba mou hnyi tauniny than?

⁶ Haba Akisa ame ham kâu hnyi bong eling Zikelag: anyin a wale iny je than Juda Zikelag ke ne o but hnyi bong ang.

⁷ Ke haba ûseiny je bong ame laba Davita hnyi hnyei iny at Filisiti, me khaca huna ae bekhöt ke vak ta tehi.

⁸ Ke haba Davita me lahien ödrin e he me tot ka at Gerusi, me Girizi, me Amaleka: anyin a ödrin tavat a aten hnyei hwân ehac, wale hnyi gethen ame he Sura ai ke ne o but hnyi hnyei Aigupito.

⁹ Ke Davita ame kot hnyei ke e ame ca omelö ke baga me momo, ke e ame hom je mamoe, me bolok, me asina me kamela, me ûkhaû; ke e ame hmetu me he kö Akisa.

¹⁰ Haba Akisa ame ha, ka habe, Ie hnyei öbun e kot hnyi bong ang? Me ame thu Davita, ka habe, Ûhehmun hnyi ke keihen Juda ka hnyi hwaiöu, me Jeramela ka hnyi hwaiöu, me Keni ka hnyi hwaiöu.

¹¹ Ke Davita ame ca omelö ke baga me momo, he ka hom Gatha ai, haingen, ka habe, Wâ ödrin e nye haiöhmun, ka habe, A ânyâ helâe Davita, ke helâe bala hwakecin hnyi ta je bong hia thibut hnyi hnyei iny at Filisiti.

¹² Me Akisa ame kap hofuc ho Davita, me ba, ka habe, E ame ti oikikiâ e bi ka je lawaeny a at Isaraela; me waleling e ame he ka bi athnyaba könya nyiele balua.