I. Samuela 26 - Iaai Bible 1901 (New Caledonia)

¹ KE ame o but hnyat Zif kö Saulo hnyi Gibea, me ha, ka habe, Hawa, ame ca lubaduöng Davita hnyi hut Hakila, cicö Jesimon?

² Ke haba Saulo ame todrö me utut ka hnyi hnyebuba Zif, ke tha e mē kun ta thauzan at Isaraela adre ûca, he ka elöm Davita hnyi hnyebuba Zif.

³ Ke Saulo ame hunuma hnyi hut Hakila, cicö Jesimon, hnyi gethen. Ke Davita ame laba hnyi hnyebuba, ke e ame wâ a ga o but Saulo he ka elâm e hnyi hnyebuba.

⁴ Haba Davita ame kunâ je hnyat ecmak, me me khana ae hnathu a ga o but Saulo.

⁵ Ke Davita ame todrö me be ka hnyi dok ame hunuma hnyin Saulo: ke Davita ame wâhmakhmetoâ hna mokut hnö Saulo, me Abinera nöku Neri, taben anyin utbavat: ke Saulo ame mokut hnyi dok hnân tot hnyin je kât, ke ame hunuma igigilo e tavat.

⁶ Ke Davita ame ha kö Abimelek at Heth, me Abisai nöku Zeruia, liamekeiny me Joab, ka habe, Ie at ame he ka tha utut mönya kö Saulo ka hnyi hna hunuma? Haingö Abisai, ka habe, Ötu he.

⁷ Me ame o but Davita me Abisai ka tavat hnyi hnyinghet: ke wâ bi Saulo ame mokut hnying hnyi dok ame tot hnyin je kât, ke adre otilâ anyin ö hnyi kânâ hnyi hunen: ke Abinera me tavat, ödrin e mokut igigilo e.

⁸ Haba Abisai ame ha kö Davita, ka habe, A hia but Khong hna ka hnyi hnyamâm iwahnaihmiony mou hnyi bong ang: awe, ö iny he ka dâoâ e ka hnyi kânâ ge ö adre ma okhaca thibi dâ, ke ame ca he ka olo.

⁹ Haingö Davita kö Abisai, ka habe, Ca he ka hlingâ e: anyin a ie at ae khana he ka inâ hnyamen ka hna hu hnö Iehova, ke ba ju hulö gan?

¹⁰ Ke haingö Davita, ka habe, Kia inya Iehova, ke hamö Iehova ne ka kot e; ame ne he ka o ûen ame he ka mokcu hnyin; ke ame ne he ka mekiny vat.

¹¹ Iehova ame thawo nya, me inye ca he ka inâ hnyamok ka at a hû Iehova: ke ö u hom dö ö hnyi hunen me kaia ae lup, me ötu me he.

¹² Me Davita ame hom ö me kaia ae lup ûnyi hnyi huno Saulo; me ödru me he, ke ba at ame wâ, ke ba at ae khana, ke ba at ame hmak dö: anyin a ödra hia adre me mokut; anyin a o but kodra mokut hnying ae gan ûnyi ga Iehova.

¹³ Me haba Davita ame he ka hnyi ke keihen, me tot hon ban bucen ae sâkâû; ke hu dok ae lau hnyi wanbödrin:

¹⁴ ke Davita ame kuku ka tavat, me Abinera nöku Neri, me ha, ka habe, E, u me ca thu thö Abinera? Me Abinera ame thu, ka habe, U ia ame kuku ka than?

¹⁵ Haba Davita ame ha kö Abinera, ka habe, Hawa, u ca at ae hwege? ke ie at ae ûcû mou hnyi Isaraela? ieû gam u je ca tuö tuhâm a than? anyin a o ke at eja ka kot than a tuhâm.

¹⁶ E ca so ûnyi e u je ânyâ. Kia inya Iehova, ke e ûcû öbun he ka mok can öbun e ca tuö tuhöbun wale at a hû Iehova. Ke walang, wâ ju, ewa ö dân than, me kaia ae lup adre ip hnyi hunen?

¹⁷ Me haba Saulo ame lönghmakhmeto ifuci Davita, me e ame ha, ka habe, Hwâm e, nokuk Davita? Me haingö Davita, ka habe, Hok ang than lö a tuhok.

¹⁸ Ke e ame ha, ka habe, Ieû gam tuhok u me hnu athnyabaem? ke ieû oge ânyâ? ke ieû hulö unyik.

¹⁹ Anyin a wale, e na he than a tuhok ka long hofuc hwan athnyabaem. Ame ne ûnyi ga Iehova hnâm hna tot könya, me so e ame be ka kap hut: ke ame ne ûnyi ge tavat, me ödra ka hnaûhango hnyi hnyimakö Iehova: anyin a ödrin e hia but obö nya hnyi bong ang me me ca tha inya me jekhoû Iehova, me ha, ka habe, He thö ka athnyaba ke je khong bi.

²⁰ Ke walang ang ca he ka hingâlâ drök ka hnyi kânâ hnyi hnyimakö Iehova: anyin ame he jem tuhan Isaraela he ka elâm outo ame fifica, helâ me hwakecin hnu meno ame gâ hon bucen.

²¹ Me haba Saulo ame ha, ka habe, E kong hwakecik: hmetu ju u, Davita nokuk: anyin oge me ca he hmetu ka okongu u bi, anyin a haba anyik möt me e ûnyi hnathu hnyi li emakâm hnyi bong ang: wâ bi, oge hia but ânyâ monu, me ti monu gan hmâ.

²² Me Davita ame thu, ka habe, Than lö, wâ bi ö! kunâ thö jem ke hidröu he ka hom.

²³ Ke ame he bi Iehova ka ve bi hwaban ka tavat anyidrin hwakecin ae wisa, me anyidrin hwakecin ae hnathu: anyin a haba Iehova ame hnö u eja ka hnyi hnyamok, ke oge me ca wek bi nya he ka inâ hnyamok ka at a hû Iehova.

²⁴ Ke wâ bi, adre me oûnyihnathoâ ânyâm möt eja ûnyi gak, anyin a wale e so ame he Iehova ka oûnyihnathoâ anyik möt, me so e ame omeli nya ûnyi hnyi ta je vec hia thithö.

²⁵ Ke haba Saulo ame ha kö Davita, ka habe, E so u me hnahic ut, Davita nokuk u me he ka ânyâ ûnyi ae beönua, me he bala ka hwege. Ke Davita ame vheno deny gethen, ke Saulo ame hmetu ka hnyi hnyaban.