I. Samuela 25 - Iaai Bible 1901 (New Caledonia)

¹ HABA Samuela ame mokcu; me ame ûkhacaköu Isaraela hia thithö, me tenge gan, me konâm e hnyi umen uma hnyi Rama. Ke Davita ame todrö me he ka hnyi hnyebuba Parana.

² Ke e hu ke at hnyi Maon, ae tren ta ûnyi hnyi Karemela; e bi at ae ûnyi hnathu, ke kun ta thauzan haleny je mamoe, ke khaca thauzan je got: ke e ame tiga subâ leûnen halen je mamoe hnyi Karemela.

³ Haba ien at Nabala; ke Abigaila ien âiân: ke haba momo at ae ti metâ, ke hmanenang hnyimakan: ke at ae wathethot baga, me kong hwakecin; ke e hanen lap anyi Kaleba.

⁴ Ke a long ut Davita hnyi hnyebuba a Nabala ame subâ leûnen haleny je mamoe.

⁵ Haba Davita ame kunâ je hidröu a ten, ke Davita ame ha ka je hidröu, ka habe, He thʼ öbun Karemela ai, me o unyi Nabala, me iouny mē hnyi iök:

⁶ ke öbun e he ka ha helâng kâu, wale at ame sot hnyi anyin möt, ka habe, Hnahic köu, me hnahic ka ânyâm lap, me hnahic ka ânyâm ta je ûnyi hia thithö.

⁷ Ke walang ang oge me long ae hu gam tavat subâ leûnen mamoe: ke haba tavat tuö halem mamoe ödrin e hia but tha e möhmun, ke öhmun e ca okongu ödrin, ke ca hia gadrin ke ûnyi hnyi ta je bong hia thithö, ke tiga ödrin bi hnyi Karemela.

⁸ Hnö thö ânyâm je hidröu, me ödrin e ho ka thumetu u: anyin a wale e so u me betenge ge je hidröu; anyin a öhmun e o but hnyi bong ae so: ö u ham dö je ûnyi ae hu gam ka athnyabaem me nokom a Davita.

⁹ Ke ame o but wahidröu anyi Davita, me ödrin e ha kö Nabala ta je hofuc hia eling hnyi iö Davita me ame um dö.

¹⁰ Ke haba Nabala ame thu ka lathnyabai Davita, ka habe, Ia Davita? ke ia nöku Jese? E se hia lathnyaba adre me ve hna degecâ latuhödra hnyi je bong ang.

¹¹ Hawa, oge me he ka hom anyik areto, me belik köiö, me meno oge hlingâ hobi kâu hnyat subâ leûnen halek mamoe, me ham ka tavat ae ca khanö nya dok adre mwi hnyin?

¹² Me ame hwio wahidröu anyi Davita, me hmetu, me o, me thumeto e ge je hofuc eling.

¹³ Me Davita ame ha ka lahien, ka habe, Ve hûkâlâ ju anyibun je hele vat. Me ödrin e ve hûkâlâ anyidrin je hele vat; ke Davita ame hûkâlâ minya anyin hele vat: ke ame he hotu Davita helâke foa haded tavat; ke lo biju li haded ame tuö ta je ûnyi.

¹⁴ Ke haba ke hidröu ame thumetu Abigaila öiö Nabala, me ha, ka habe, Wâ bi Davita ame kunâ tavat ûheny hnyi hnyebuba he ka iouny so me tuhötin; me e ame û ödrin.

¹⁵ Ke e ti so hwakecin tavat kohmun, ke adre ca okongu öhmun, ke ca hia bi unyihmun ke ûnyi hnyi ta je bong hia thithö öhmun e tha laba hnyin mödrin, ke tiga öhmun hnyi hnyei:

¹⁶ haba ödrin me helâ me hak veto kohmun hnyi lit me lany, hnyi ta je bong hia thithö öhmun e tha laba mödrin he ka tuö je mamoe.

¹⁷ Ke walang ang khanö u thö me ûnykûme wia ûnyi u me he ka ânyâ, anyin ödrin e ip hnân ka tuhötin me anyin lap hia: anyin a e atö Belial me ca khana ke at ka fuc kâu.

¹⁸ Me Abigaila ame ie hom je areto a tu haded, me li waina, me faiv ta mamoe adre hia but penapena, me faiv ta tulut hwit adre le, me khaca haded je de wan vine adre hlec meleca, me lo li haded u ometâ, me ip hon je asina.

¹⁹ Me ame ha momo ka wahidröu unyin, ka habe, Böbun do, ke wâ bi, ama bilik bi. Ke e ame ca thumetu Nabala a âiân.

²⁰ Ke haba momo ame tabâ asina, ke hnyi ûen e ame utut ka hnyi dok ae nedronginy bucen, me wâ bi haba Davita me tavat unyin ödrin e utut me o kâu; me momo ame ukhanö mödrin.

²¹ Ke a hia but ha Davita, ka habe, E hnathu, e ûnyi baû hnök hna tuö ta je ûnyi anyin khop ang hnyi hnyebuba, me me ca hia bi ke ong ûnyi hnyi ta je ûnyi hia gan: ke e ame hia but bi hwaban könya so ge kong.

²² E so Khong ame ânyâ helâe me bi hanen ka je iwahnaihmiony me Davita, oge me ne he ka bi kolon ke da a khaca hnyi ta je ûnyi hia thithö unyin e ka o thö lany hnyi hnyomakatu.

²³ Ke a ö Davita hnö Abigaila, me e ame ie utut ûheny hon asina, me nom ju hnyi hnyimakö Davita, me khudrung hnyikânâi.

²⁴ Me e ame ta ju hnyi li can, me ha, ka habe, Tuhok, e so e ta huk hulö: ö u me hna athnyabaem he ka fuc hnyi hnyikönyâm ke long ju hofuc hwan athnyabaem.

²⁵ Ö u ca he tuhok ka ti ûnykûme ge at e, a atö Belial, jia Nabala: e ûcû ien mē; Nabala ien bi, ke monu ame laba unyin: ke inya athnyabaem oge ca wâ ânyâm je hidröu, wale u je kunâ.

²⁶ Ke walang ang tuhok, kia inya Iehova, me kia inya u, anyin a Iehova ame thawo u, me u me ca he ka hingâlâ monoâ dra, me bi hwaban hobi köu ge hing hnyamâm, ke walang e so e helâ Nabala je iwahnaihmiöny mou, me tavat ödrin e elâm ûnyi ae kong hobi kâu tuhok.

²⁷ Ke walang ang haba bwihlany eû wale a hom athnyabaem ka tuhok, ham dö ka je hidröu, tavat ödrin e he hoton tuhok.

²⁸ Ö u hna but monu anyin athnyabaem: anyin ame he Iehova ka ânyâ hobi kâû tuhok lap ae tethmâ, anyin ame vâtâ tuhok je vat anyi Iehova; ke adre me ca he ka wâ hulö unyâm hnyi ânyâm je bong hia.

²⁹ Eja ke ne a ne hia but tot at he ka hnu u, me elâm he ka hlingö u, ke so bi adre me he ka tha lan hanom hnyi bwiny möt unyi Iehova Khongom; ke haba hanon je iwahnaihmiöny mou e ame he ka kûlûâ degecâ, helâ ke ûheny hnyi hnyimen koloû.

³⁰ Ke e ka hia but Iehova ânyâ ka tuhok, helâ me ta je ûnyi hia thithö ae so e ame ha gam, me otilö u hnân taben Isaraela;

³¹ ca hnân otengiö u, me ovecâ hnyekon tuhok, wale ge hnen hna hingâlâ dra ke ba can, me bi hwaban hobi kâu bi hnen tuhok: ke e ka hia but ânyâ Iehova so ka tuhok, u me be ka ûnykûme ka athnyabaem.

³² Ke Davita ame ha kö Abigaila, ka habe, Ole kö Iehova Khongu Isaraela at ame kunö u he ka ûkhanö mönya hnyi bong ang:

³³ ke oleâ ânyâm metâ, me oleâ köu bi, at ame thawo nya hnyi bong ang he ka ca hingâlâ dra, me bi hwaban hobi könya bi ge hing hnyamok.

³⁴ Ke kia inya Iehova, Khongu Isaraela, at ame thawo nya he ka ca okongu u, ke e hnathu a u je ne ca logot me he jem he ka ûkhanö mönya, me, ame ne ba kolon kö Nabala da a khaca e ka o thö lany hnyomakatu.

³⁵ Ke Davita ame kap ge momo ûnyi e ame hom kâu: me e ame ha, ka habe, He thö me hnahic ka hnyi umâm uma; wâ bi, oge me long hwâm hofuc, me köb u bi.

³⁶ Ke Abigaila ame o kö Nabala, ke wâ bi, e ame ânyâ bijeû hnyi umen uma, helâ me bijeû anyin than; ke Nabala ame senyin hnyi hnyekon, ke ti monu a ga ic: anyin a wale momo ame ca thumeto e ge ke ûnyi ame ne ûhnyûkong ame ne gan ke ne o but hnyi lany hnyomakatu.

³⁷ Kʼ ame hia but waina unyi Nabala hnyi hnyomakatu, me haba âiân ame thumeto e ge ta je ûnyi eling, me e ame gâ on, ke haba e, me helâ thibut ta veto.

³⁸ Ke hwaban dö e, helâ me ten ta bong, haba Iehova ame kuc Nabala, me me mokcu.

³⁹ Ke a long ut Davita a ga mokcu Nabala, me e ame ha, ka habe, Ole kö Iehova at ame ivinoâ hna ohmehmö nya ga Nabala me thawâ athnyabainy ge hulö: ke Iehova ame hia but ohmetoâ hulö anyi Nabala ka i hnyi hon ban bi. Ke Davita ame ûkhûnöng he ka ûhnenamö me Abigaila he ka hom me âiân.

⁴⁰ Ke ame o lathnyabai Davita kö Abigaila hnyi Karemela, me ödrin e ha kâu, ka habe, A kunʼ öhmun Davita köu he ka hum u me âiân.

⁴¹ Me e ame tot me nom hnyikânâi, me ha, ka habe, Walö nya ang athnyabaem he ka bi athnyaba me hneû je can lathnyabainy tuhok.

⁴² Me Abigaila ame logot, me tot, me tabâ asina, a the me anyin je hlu baû a faiv ödrin e he hoton; kʼ ame he hoton je ûthumetu anyi Davita, ke âiân dö e.

⁴³ Ke Davita ame hom Ahinoam minya ûheny Jezerela; ke tha âiân hia thʼ ödru.

⁴⁴ Ke a hia but Saulo ham Mikala a nokon öiö Davita kö Paleti nöku Laisi, at ûheny Galim.