I. Samuela 24 - Iaai Bible 1901 (New Caledonia)

¹ KE a hmetu Saulo ûheny hnyi hna hnu at Filisiti, me adre thumeto e, ka habe, Wâ bi, e but Davita hnyi hnyebuba Eni-gedi.

² Me Saulo ame hom kun ta thauzan tavat adre ûca unyin at Isaraela hia, me he he ka elâm Davita me lahien hon je kic hnyeuten je got ae hiny.

³ Ke e ame o but hnyi je haginy mamoe eû hnyi gethen, wale ae hu op; ke Saulo ame didro he ka tube li can. Ke Davita me lahien ödrin e laba hnyi je ouben op.

⁴ Ke haba je atö Davita ödrin e ha kâu, ka habe, Wâ bi, bong a ha Iehova köu, ka habe, Wâ bi, oge me he ka hna je iwahnaihmiony mou ka hnyi hnyamâm, ke u me he ka ânyâ kâu ûnyi ae so köu. Ke Davita ame todrö me subâ bigö but obiny ûkhaû Saulo.

⁵ Ke hwaban e, me ame dâ hnyeku Davita can e ame subâ obiny ûkhaû Saulo.

⁶ Me e ame ha ka lahien, ka habe, E so Iehova ame thawo nya he ka ânyâ ûnyi ang ka tuhok, at Iehova ame hû, he ka inâ hnyamok kâu, anyin a e bi at a hû hnö Iehova.

⁷ Ke Davita ame thawâ lahien ge je hofuc eling, kʼ ame ca hnʼ ödrin he ka tot kö Saulo. Ke Saulo ame todrö me he ûheny hnyi op hnyi deny gethen.

⁸ Ke Davita ame tot hwaban e me didrut ûheny hnyi op, me hongot hotu Saulo, ka habe, Tuhok, than lö. Ke Saulo ame hwio, me Davita ame nom me hnyimakan hnyikânâi, me ogânâ,

⁹ Ke Davita ame ha kö Saulo, ka habe, anyin a ieû u me löng ta je hofuc hwan tavat, ka habe, Wâ bi, Davita ame elâm he ka okongu u?

¹⁰ Me wâ, haba hnyi bong ang a wâ but li emâkâm a Iehova ame hia but hnö u eja ka hnyi hnyamok hnyi op: ke a ha könya ke je hnyat he ka hlingö u: ke so bi oge me betenge gam, me oge me ha, ka habe, oge me ca he ka inâ hnyamok ka tukök; anyin a e at Iehova ame hû.

¹¹ Ke haba khaca, wâ bi, cica lö, me wâ bi obiny ânyâm ûkhaû eang hnyi hnyamok: ke oge me subâ obiny ânyâm ûkhaû me ca hlingö u, anyin a wale khanö u thö me wâ a e ba ûnyi ae kong me hulö unyik, ke ca kong hwakecik köu, eja ke ne u je ne elâm melik he ka ohia.

¹² Hamö Iehova he ka owisa kötu, ke hamö Iehova he ka bi hwaban köu gak: ke so bi ame ca he hnyamok ka mokut hom.

¹³ Helâji me vejec ehac anyin wahingat, ka habe, Ame o ûnyi ae kong ûnyi ge at ae kong: kʼ ame ca he hnyamok bi ka mokut hom.

¹⁴ A o but tuhan Isaraela kö ia? ie at u me hnu hoton? ame ne kuli ae mok, ame ne outo ame fifica.

¹⁵ Ke hamö Iehova he ka ûhnö me owisa kötu, me wâ, me ivinö hobi könya, me hnö nya ûnyi hnyi hnyamâm.

¹⁶ Ke a hia but Davita ha ta je hofuc eling kö Saulo, me haba Saulo ame ha, ka habe, Hawa ifucâm e Davita, nokuk? Me Saulo ame tenge goranyai.

¹⁷ Me e ame ha kö Davita, ka habe, U at ae wisa kʼ iny monu: anyin a u je bi hwaban könya ge so, ke oge me bi hwaban köu ge kong.

¹⁸ Ke u je omanenâ hnyi bong ang a u je ânyâ so könya: anyin a u je ca hlingö nya, hnyi ûen Khong ame hnö nya ka hnyi hnyamâm.

¹⁹ Anyin a ne ke at ame wâ iwahnaihmiony mē, hawa, e ame he ka hna soâ e? anyin a wale e so ame he Iehova ka bi hwaban köu ge so hwaban hnâm hna ânyâ könya hnyi bong ang.

²⁰ Ke walang ang, wâ bi, e khanö nya a u me he ka than, ke adre me he ka ohmâ dökhu Isaraela hnyi hnyamâm.

²¹ Ke walang ang, khemanyin dö könya ga Iehova a u me ca he ka subâ degecâ je mâtrânik hwabök, me ca he ka ohia iök ûnyi hnyi lap anyi cica.

²² Ke Davita ame khemanyin kö Saulo. Ke Saulo ame he ka hnyi hnyaban, ke haba Davita me lahien ödrin e ölö hmetu ka hnyi hnabâ.