I. Samuela 23 - Iaai Bible 1901 (New Caledonia)

¹ KE adre me ha kö Davita, ka habe, Wâ bi, ame vat at Filisiti me Keila, ke ödrin e hûgûnâ je hna huje hwit.

² Anyin a wale Davita ame hnö ga Iehova, me ha, ka habe, Hawa, oge me he ka he me kot at Filisiti eling? Haba Iehova ame thu kö Davita, ka habe, He thö ka kot at Filisiti, me omelö Keila.

³ Ke haba je atö Davita ödrin e ha kâu, ka habe, Wâ bi, ötin ka ot eang Juda: hawa, ame ca he ka ti gan hnötin hna ot ötin ka he Keila ai ka je utbavat anyin at Filisiti?

⁴ Ke Davita ame hnö hmetu unyi Iehova. Ke Iehova ame thu kâu, me ha, ka habe, Todrö, he thö Keila ai; anyin oge me he ka hna at Filisiti ka hnyi hnyamâm.

⁵ Me Davita me lahien ödrin e he Keila ai, me vat me at Filisiti, me sö haledrin je meno, me kuc ödrin ge hna hlingâ ae gan. Me Davita ame omelö at Keila.

⁶ Ke haba hnyi ûen ame kec dö kö Davita hnyi Keila Abiathara nöku Ahimelek, me e ame o me iefoda hnyi hnyamen.

⁷ Ke adre me thumetu Saulo a gʼ ame o Davita hnyi Keila. Ke haingö Saulo, ka habe, A hia but Khong hna e ka hnyi hnyamok; anyin adre me hlöng hwanumen kâu, kʼ ame dit ka hnyi taun ae hu homagouleny me ohmâiny.

⁸ Me Saulo ame ok vat, a tavat hia, he ka he Keila ai me theling Davita me lahien.

⁹ Ke e khanö Davita but a Saulo ame elâm he ka okongoâ, me e ame ha kö Abiathara at bihut, ka habe, Hö jem iefoda.

¹⁰ Haba Davita ame ha, ka habe, Iehova lö, Khongu Isaraela, inya athnyabaem oge me long a gʼ ame be he jem Saulo, Keila ai he ka ohia taun cak.

¹¹ Hawa, ame he at Keila ka hnö nya ka hnyi hnyamen? ke ame he ka o Saulo, helâ me hna long gak a athnyabaem? Iehova lö, Khongu Isaraela, ö u thumetu nya thö a athnyabaem. Me Iehova ame ha ka habe, E ame he ka he jem.

¹² Me haingö Davita, ka habe, Hawa, ame he at Keila ka hnö nya me lahiök ka hnyi hnyamö Saulo? Me haingö Iehova, ka habe, Adre me he ka hnö u.

¹³ Me ame todrö Davita me lahien, ame ne siks haded ödrin, me didrut ûheny Keila, me he hnyi je gethen ae khanʼ ödrin he ka he hnyin. Ke adre me thumetu Saulo a gʼ ame kec ut Davita ûheny Keila; me e ame digic he.

¹⁴ Ke haba Davita ame laba hnyi hnyebuba hnyi je hnabâ, me laba hnyi hnyei ae hut hnyi hnyebuba Zif. Ke Saulo ame elâm e hnyi je bong, ke Khong ame ca hna e kâu.

¹⁵ Me a wâ but Davita a gʼ ame he but Saulo he ka elâm anyin möt: ke e bi Davita hnyi hnyebuba Zif hnyi hnyot.

¹⁶ Ke ame todrö Jonathana nöku Saulo, me he kö Davita hnyi hnyot, me sihwegiâ unyin Khong.

¹⁷ Me e ame ha kâu, ka habe, Ca ot anyin ame ca he cica Saulo ka ō u; ke u me he ka tuhan Isaraela, ke oge me he ka loiny hmelâm; ke haba hhaca, e khanö cica Saulo ling.

¹⁸ Ke ödru me ûhihinyköu hnyi hnyimakö Iehova. Ke Davita ame laba hnyi hnyot, ke Jonathana ame he ka hnyi umen uma.

¹⁹ Ke haba at Zif, ödrin e he Gibea ai kö Saulo, me ha, ka habe, Hawa, ame ca lubaduöng unyihmun Davita hnyi je hnabâ hnyi hnyot, hnyi hut Hakila, wale hnyi ke keihen ka hnyi hwaiöuiny Jesimon?

²⁰ Anyin a wale, than lö, u me he ka utut helâ me wem; ke haba ohmun e he ka hna e ka hnyi hnyamen than.

²¹ Me haba Saulo ame ha, ka habe, E so öbun e hnahic ûnyi ga Iehova; anyin a öbun e betenge gak.

²² Ö öbun he thö, ka me okhaca tuö, me wâhmakhmeto thö hnen hna lubaduöng hnyin, ke ia a wâ eling: anyin adre ha könya, ka habe, e ame ti metâ.

²³ Anyin a wale wâ eâu, me khana wia je dok hia wale e ame lubaduöng hnyin, ke hmetu thö könya me hnathu, ke oge me he ka tha he möbun: ke wâ bi, ame ne e bi hnyi hnyei oge me he ka elâm e wanben je thauzan anyin at Juda hia thithö.

²⁴ Me ödrin e tot me bodrin Zif ai, ke a bili Saulo: ke e bi Davita me lahien hnyi hnyebuba Maon, hnyi dok ae tha hon ke keihen ka hnyi hwaiöuiny Jesimon.

²⁵ Ke ame he Saulo me je aten he ka elâm. Ke adre me thumetu Davita: me e ame utut ka hnyi kic, me laba hnyi hnyebuba Maon. Ke Saulo ame löng, me e ame elöm Davita hnyi hnyebuba Maon.

²⁶ Ke Saulo ame he hnyi ke keihen e jem bucen, ke Davita me lahien hnyi ke ke keihen: ke Davita ame logot he ka kec kʼ ame outö Saulo; anyin a Saulo me lahien ödrin e igigili Davita me lahien he ka kot ödrin.

²⁷ Ke ame o kö Saulo ûthumetu, me ha, ka habe, Logotö, me he jem; anyin a utut at Filisiti ka hnyi hon hnyei.

²⁸ Me Saulo ame hmetu ûheny hnyi hna hnu Davita, me he ka at Filisiti: anyin a wale adre me hwenyi ien hnyei eling me Sela-hamalekoth.

²⁹ Ke Davita ame he ûheny e, me laba hnyi je hnabâ hnyi Eni-gedi.