I. Samuela 22 - Iaai Bible 1901 (New Caledonia)

¹ KE Davita ame he ûheny e, me kec ka hnyi op Adulama: ke a long ut je liamekeiny mē ke lap hia anyin kamen, me ödrin e he kâu eling.

² Ke ame ûkhacaköu unyin tavat hia ae hu hmak, me tavat hok gufa hia, me tavat hia ae hiny hnyekudrin; ke e bi taben ködrin: ke e unyin helâ me foa haded tavat.

³ Ke Davita ame he ûheny e Mizepa ai hnyi Moaba: Ke e ame ha ka thaniny Moaba, ka habe, E na he ju cica me bai jem, ka laba unyibun, me inye wâ thö ûnyi ame he Khong ka ânyâ hobi könya.

⁴ Ke e ame hum ödru ka than Moaba, ke ödru me tha laba mē hnyi ta je bong hia thithö ame laba Davita hnyi hnabâ.

⁵ Ke haba Gada perofeta ame ha kö Davita, ka habe, Ca laba bi hnyi hnabâ; he thö, me he ka hnyi hnyei Juda. Me Davita ame he me o hnyi hnyot hnyi Hareth.

⁶ Ke a long ut Saulo a gʼ adre ō Davita me tavat unyin: ke Saulo ame me laba hnyi Gibea, eû hmelen ûö hnyi Rama, ke e hnyi hnyamen dân ö, kʼ ame tot igigilo lathnyabainy.

⁷ Ke Saulo ame ha ka lathnyabainy ödrin e tot unyin, ka habe, Long ju Öbun walang ang hnyat Beniamina; hawa, ame he nöku Jese ka ham köbun je utkânâ, me je hnyei vine, me otilʼ öbun hia hnân taben je thauzan me taben je haded;

⁸ mʼ Öbun e ûsabö hnok, ke ba at ame thumetu nya a gʼ ame ûhihinyköu nokuk me noku Jese, ke ba at gabun ama betenge gak me omanenâ könya a gʼ ame huliwan athnyabaik hnen nokuk he ka bi hnök helâ me hnyi bong ang?

⁹ Me ame thu Doega at Edoma, kʼame tot unyin lathnyabai Saulo, me ha, ka habe, Oge wâ nöku Jese ame he nnyi hnyei Nob kö Ahimelek nöku Ahituba.

¹⁰ Ke at eling ame elâm unyi Iehova hobi kâu, ke e ame han, me ham kâu hele vat anyi Goliatha at Filisiti.

¹¹ Me haba than ame ûkhûnöng he ka hum Ahimelek at bihut a nöku Ahituba, me lap hia anyin kamen, a tavat bihut hnyi Nob: me ödrin e o hia thithö ka than.

¹² Ke haingö Saulo, ka habe, Nöku Ahituba lö, long ju walang ang. Me haingen, ka habe, Tuhok lö, inya ang.

¹³ Ke haingö Saulo kâu, ka habe, Can ieû obe ûsabö hnök, a u me nöku Jese, waleji hnyi hnâm hna han, me ham kâu hele vat, me elâm unyin Khong hobi kâu, me me tot könya, me ip hnök helâ me hnyi bong ang?

¹⁴ Me Ahimelek ame thu ka than, ka habe, Ke ie at ae hnathu unyin lathnyabaem hia helâ me Davita, a ûngon than, kʼ adre hom ka hnyi ânyâm ûhnenamö, me ogânâ hnyi hnyabam?

¹⁵ Hawa, oge me ibi hwân hnyi bong ang he ka elâm unyin Khong hobi kâu? Ohe, ca helâe: ca he than ka ûnykûmi nya a athnyabaem me lap biâ anyi cica: anyin ae ca khana athnyabaem ke ûnyi eling, ame ne ûhnyûkong, ame ne gan.

¹⁶ Ke haingen than, ka habe, Ahimelek, u me he ka mok, u me lap hia anyin kâmâm.

¹⁷ Me ame ha than ka tavat adre me labö tot unyin, ka habe, Hwio thʼ öbun, me hlingâ hnyat bihut kö Iehova; anyin ödrin e tha hien me Davita, ke e khanʼ ödrin a e ame kec, me ödrin e ca omanenâ könya. Ke lathnyabainy than ödrin höcö he ka inâ je hnyamödrin he ka kot hnyat bihut kö Iehova.

¹⁸ Me ame ha than kö Doega, ka habe, Hwio thö u me kot hnyat bihut. Me ame hwio Doega at Edoma me kot at bihut; me e ame hlingâ hnyi bong eling eite faiv tavat ödrin e khavâ iefoda lino.

¹⁹ Ke e ame kot Nob taun anyin tavat bihut ge hele vat, obaga me omomo, je wanakat me mendreng, me je bolok, me asina me mamoe, ge hele vat.

²⁰ Ke ame kec möt ke nöku Ahimelek nöku Ahituba, Abiathara ien, me kec kö Davita.

²¹ Ke Abiathara ame thumetu Davita ge hna kot tavat bihut kö Iehova ga Saulo.

²² Haba Davita ame ha kö Abiathara, ka habe, E khanö nya hnyi bong eji a eling Doega at Edoma, a gʼ ame he ka thumetu Saulo: oge hia but bi joniny tavat hia hnyi lap anyin kâmâm.

²³ Tha laba ju mönya, ca ot bi; anyin a haba at ama elâm he ka hlingö u, e ame elâm he ka hlingö nya: anyin a u me he ka laba so unyik.