I. Samuela 21 - Iaai Bible 1901 (New Caledonia)

¹ ME ame o but Davita hnyi Nob kö Ahimelek at bihut: ke Abimelek ame he he ka ûkhanö me Davita hnyi öbubuny, me ha kâu ka habe, Ieû ang a hake u thibi, ke ba at a tha he mou?

² Ke haingö Davita ko Ahimelek at bihut, ka habe, A kunö nya than ka ke ûnyi, haingen könya, ka habe, Ca he ke at ka löng ûnyi oge me he ka kunö u kâu, me ûnyi oge me hûna köu: ke oge hia but kunâ wahidröu ka hnyi ke dok me ke dok.

³ Ke ieû ûnyi eang unyâm? ö u ham könya je areto a thabûng, ame ne ke ûnyi bi ae hu.

⁴ Ke ame thu kö Davita at bihut, ka habe, E ba areto ae baû unyik, ke hu areto ae kap; wale thibi ame ne ca kâlâ omomo hnen wahidröu.

⁵ Ke Davita ame thu ka at bihut, me ha kâu, ka habe, E hnathu öhmun e ca kâlâ omomo helâ me kun ta bong; hwân hnyi hnök hna he jem me kap ta je unyi anyin je hidröu, ke so bi ûnyi baû hnömun hna he; hawa, ame ca bo so hnyi bong ang anyidrin ta je ûnyi?

⁶ Me haba at bihut ame ham kâu ûnyi ae kap; anyin ae ba minya ju ke areto eling, ke so thibi areto hnân omanenâ, wale adre me hom ûnyi hnyi hnyimakö Iehova, mʼ adre ip bi areto ae kahwa hnyi bonginy hna hom e.

⁷ Ke wale ke athnyabai Saulo hnyi bong eling, adre me tuö hnyi hnyimakö Iehova, Doega ien, at Edoma, a taben tavat tuö omeno hale Saulo.

⁸ Ke Davita ame ha kö Ahimelek, ka habe, Hawa, e ba Ö, ame ne hele vat eang unyâm? anyin oge me ca hom anyik hele vat me anyik je ûnyi vat, anyin a haba huliwa anyin than, me, hnân ânyâ logotâ.

⁹ Ke haingen at bihut, ka habe, Haba hele vat anyi Goliatha at Filisiti, at u je kot hnyi hnyigöulen bucen Ela, wale but ang adre lan ge ecmano, ame mokut hoton iefoda: u je ne wem he ka hom e, hom do: anyin ae ba hanen eang, ke hake e thibi. Me haingö Davita, ka habe. Ho jem; anyin ae ba khaca a helâe.

¹⁰ Ke Davita ame tot me kec hnyi bong eling can hna outö Saulo, me he kö Akisa thaniny Gatha.

¹¹ Ke haba lathnyabai Akisa ödrin e ha kâu, ka habe, Hawa, ca Davita ang, tuhan hnyei? hawa, ödrin e ca sitwhanân hnyi je bibiâ, ka habe Saulo ame hia but kot haniny je thauzan, Ke Davita bi, haniny je ten thauzan?

¹² Ke Davita ame ip hmâ hnyi hnyekon ta je hofuc eling, ke gan hmâ hna outö Akisa thaniny Gatha.

¹³ Ke e ame okebongonâ hwakecin hnyi hnyimaködrin, me monu thoi unyidrin, me sisit hon li hlinginy homagöule, me ânyâ hangöc ka hnyi wainy.

¹⁴ Ke Akisa ame ha ka lathnyabainy, ka habe, Wâ bi, öbun e wâ a ga monu but at: ieû gabun öbun e hia but hom e könya?

¹⁵ Hawa e ba but je at ae monu unyik, me öbun e hom khop ang he ka monu hnyi hnyimakök? hawa, ame he ka dit khop ang ka hnyi umök uma?