I. Samuela 20 - Iaai Bible 1901 (New Caledonia)

¹ KE Davita ame kec ûheny Naioth hnyi Rama, me he me ha hnyi hnyimakö Jonathana, ka habe, Ieû oge me ânyâ? ke ieû anyik hulö? ke ieû kongik hnyi hnyimakan kâmâm, me me elâm he ka hlingö nya?

² Me haingen, ka habe, E so adre me thawâ: mʼ u me ca he ka mok: wâ bi, ama ca ânyâ ke ûnyi cica, ame ne gan ame ne ûhnyûkong, ke ame bân ka omanenâ könya: ke hnân ieû ame he cica ka ikhâlâ gak ûnyi eling? ame ca hnathu bi.

³ Me Davita ame khemanyin, me ha, ka habe, E khana wia kâmâm a u me betenge gak; me haingen, ka habe, E so Jonathana ame ca long e, wâ e nye vec ut: ke kia inya Iehova, ke kia inya u, a e okhaca biju okca me oge me he ka mok.

⁴ Ke Jonathana ame ha kö Davita, ka habe, haba ûnyi u me he ka ha, me oge me he ka ânyâ hobi köu.

⁵ Ke haingö Davita kö Jonathana, ka habe, Wâ bi, tehi ae teb ûnyi nyi, ke hanmök he ka tha laba me than he ka hnyi han: ke hnö nya but he ka lubaduöng hnyi utkânâ ke ne o but hnyi sahacin bong a kuniny.

⁶ Ame ne hnei nya kâmâm, u me he ka ha, ka habe, Ame sumat ûjongi nya Davita be ka wadring Bethe-leema ai wale anyin taun: anyin ae hu hudiny huna eling hobi kâu anyin lap hia.

⁷ Ame ne ha, ka habe, E so; me ame he ka hnahic athnyabaem: ke ame ne gan anyin hmonyin, awe, khanö u thö a ga hia but ip hnök.

⁸ Anyin a wale e so u me ânyâ betenge ka athnyabaem; anyin a u je hia but hum nya athnyabaem ka hnyi ûhihinyköu anyi Iehova: ke ame ne e unyik hulö, hamâm he ka hlingö nya; anyin a hnân eû he ka hum nya ka kâmâm?

⁹ Ke haingö Jonathana, ka habe, Ohe, e ba e: anyin a ne khanö nya a cica ame ip hnâm, hawa, oge me ca he ka ha köu?

¹⁰ Ke Davita ame ha kö Jonathana, ka habe, Hamö ia he ka ha könya ame ne thu hwegiâ kâmâm?

¹¹ Ke haingö Jonathana kö Davita, ka habe, Ötu he ka hnyi hnyei. Ke ödru me tha he ka hnyi hnyei.

¹² Ke Jonathana ame ha kö Davita, ka habe, Hamö Iehova Khongon at Isaraela he ka ohnathoâ; haba nyi hnyi ûen helâng ame ne we, iny ka hia but elâm unyi cica, me wâ bi, a ne so but kö Davita, hawa, oge me ca he ka ûkhûnöng köu me omanenâ köu?

¹³ Ke so Iehova ame ânyâ helâe kö Jonathana, me bi hanen minya, ame ne so kö cica he ka okongu u, me oge ne ca omanenâ köu, me kunö u, me u me he ka he hnyi hnahic: ö e tha Iehova mou helâ me hnen hna tha e me cica e hac.

¹⁴ Ke u me he ka omanenâ könya ibetengiö ûnyi ga Iehova inye tiga möt, me inye ca mok:

¹⁵ ke walang minya u me ca he ka subâ degecâ ânyâm ibetengiö ge anyik lap nyiele balua: wale e ka hia but subâ degecâ je iwahnaihmiöny me Davita hia ûnyi eang hmeledrany ga Iehova.

¹⁶ Me haba Jonathana ame ûhihinyköu me lap anyi Davita, me ha, ka habe, Ame e Iehova ka elâm e unyin je iwahnaihmiöny me Davita.

¹⁷ Ke Jonathana ame kunö Davita hmetu he ka khemanyin, can anyin ibetengiö gan: anyin a e ame betenge gan helâ me hing hanon bi.

¹⁸ Ke Jonathana ame ha kâu, ka habe, Nyi, me tehi ae teb ûnyi: ke adre me he ka hnei u, anyin ae ba at hnyi tabâm tap.

¹⁹ Ke kun biju bongom, me u me he ka ie he me o ka hnyi dok waleji u je ikhölö hnyin hnyi bong ae hu hwakecin, ke u me he ka laba hnyi veto Azela.

²⁰ Ke oge me he ka fana kun ta fana hnyi baten, helâke oge me vakha.

²¹ Ke wâ bi, oge me he ka kunâ da, me ha, ka habe, He thö he ka elâm je fana. Ke oge ne ha ka da, ka habe, Wâ bi ke keihâm e jem je fana: awe, u ma hom dö me he jem; anyin ae hu hnahic köu, ke ba kong, ke kia inya Iehova.

²² Ke oge ne ha ka da, ka habe, Wâ bi, hnyi ke keihâm hââng je fana: awe, u me he but, anyin a Iehova ame kunö u.

²³ Ke haba hofuc ötu me ûhnenamö, wâ bi, e bi Iehova hnyi wanbötu nyiele balua.

²⁴ Me Davita ame ikhölö hnyi utkânâ: ke ame laba thö tehi, me ame laba ju je than he ka tha han.

²⁵ Ke ame laba than hon taben tap, helâji me hnyi je ûen, wale hon tap hnyi hnyeige uma: ke ame todrö Jonathana, ke Abinera ame laba ûtangköu me Saulo: ke ba at hnyi tap tabö Davita.

²⁶ Ke so bi e ba hofuc ho Saulo hnyi bong eling: anyin a haingen, ka habe, Ame ne o kâu ke ûnyi, ame ne ca bo so; eke, e ca bo so.

²⁷ Ke haba nyi, wale bong a loiny tehi, me ba bala at hnyi tap tabö Davita: me haba Saulo ame ha kö Jonathana a nokon, ka habe, Anyin a ieû ame ca he jem ka hnyi han nöku Jese, et me hnyi bong ang?

²⁸ Ke Jonathana ame thu kö Saulo, ka habe, Davita ame sumâtâ ûjongi nya me me he Bethe-leema ai:

²⁹ haingen, ka habe, Ö u hnö nya but, anyin ame he anyihmun lap hnyi taun he ka bi hut; ke haba tuhok ame hia but hûna könya he ka hnyi hanen: ke walang ang u je ne betenge gak, ö u me hnö nya but he ka iouny me je liamekeiny mönya. Can e, me me ca he jem ka hnyi laulau anyin than.

³⁰ Me ame ubâhlâ hmonyin anyi Saulo ko Jonathana, me e ame ha kâu, ka habe, Nokon momo hwege hnyimen me at ûkhin fuc, hawa, e ca khanö nya a u je ûca nöku Jese he ka ohmehma u bi, me ohmehma hinyâm e ka he thu?

³¹ Ke hnyi ta je ûen hia thithö e ka tiga möt bala bi eang hmeledrany nöku Jese, u me ca he ka tethmâ me dokhom dökhu. Ke ûkhûnöng dö walang ang me hom e könya, anyin e hnathu e ame he ka mok.

³² Ke Jonathana ame thu kö Saulo a kamen, me ha kâu, ka habe, Can ieû e ame he ka mok? ieû hnen hna ânyâ?

³³ Ke Saulo ame khûâ dân ö kâu he ka dâ e: anyin a wale ame wâhmakhmeto Jonathana a kamen ame ip hmâ hnân, he ka hlingö Davita.

³⁴ Ke haba Jonathana ame todrö ûheny hnyi laulau, ke ame ubâhlâ anyin hmonyin, me e ame ca hnyi han hnyi bong a loiny tehi: anyin a e ame tenge ga Davita, anyin a ohmehma e kamen.

³⁵ Ke nyi Jonathana ame dit ka hnyi hnyei waleji hnyi ûen a ha kö Davita, ke tha e mē ke da ae ûhnyûkong.

³⁶ Ke e ame ha ka da unyin, ka habe, Wadring dö walang ang he ka elâm je fana oge me he ka fana. Ke ame tiga wadring da, me a ame fana ke fana ka hnyi hnyimakan.

³⁷ Ke ame o thö da ka hnyi dok a e hnyin fana, wale a fana Jonathana, me haba Jonathana ame ha ka da, ka habe, Hawa, e ca, e fana hnyi hnyimâkâm?

³⁸ Ke Jonathana ame hongot ka da, ka habe, Logotö, hele thö, ca bec bi. Ke da anyi Jonathana ame hlo je fana, me hom ka tuhan.

³⁹ Ke ca khana da a ke ûnyi bi: ke Jonathana thibi me Davita ödru me wâhmakhmeto.

⁴⁰ Ke Jonathana ame ham anyin je ûnyi vat ka da unyin, me ha kâu, ka habe, Hom dö ka hnyi taun.

⁴¹ Ke a he but da, me Davita ame o ûheny hnyi hwaiöu, me ta hnyikânâi, me okun nom: ke ödru me ûcimhnyimak, me ûtengiö, ke beönua tenge a Davita.

⁴² Ke Jonathana ame ha kö Davita, ka habe, He thö me hnahic, anyin öte hia but khemanyin hnyi iö Iehova, ka habe, Ame he ka e wanbötu Iehova, me mâtrânitu nyiele balua. Me e ame tot me he: ke Jonathana ame hmetu ka hnyi taun.