I. Samuela 2 - Iaai Bible 1901 (New Caledonia)

¹ KE haba Hana ame hic me ha, ka habe, Ame senyin hnyekuk ga Iehova, Ame ogöranyâ anyik faoiny meno unyi Iehova: Adre ogânâ hnyimök hon je iwahnaihmiony mönya; Anyin a oge hobâ ûhomeli ûnyi gam.

² E ba at ae kap helâ me Iehova; Anyin ae ba at bi ke hake thibi u Ke ba kic helâ me Khonguta.

³ Ca he hmetu bi ka ha hofuc ae bi gan; Ke so ame ca gâ hofuc bi gan ûnyi hnyi je hnyimöbun; Anyin a Iehova, me e Khongon metâ, Ke e ame tuluto je hna ânyâ.

⁴ A hmetru thö je cafana anyin tavat ae hwege, Ke adre oweikâ tavat ame haû ge tang hwege.

⁵ Haba tavat ae sekon me ödrin e hnʼ ödrin bi he ka huliwa hnân jeû; Ke ame menâ but tavat ae mekihnânem; Ke ame hnokoâ seven hnen at ae tounyi; Ke ame sënyin dut at ae hu lakon, ae se.

⁶ Iehova ame hlingâ, ke e ame omelö: E ame hagutâ hedis ai me ogöranyâ hmeto.

⁷ Iehova ame otheduocâ, me otren om jeuâ: E ame kot hnyikânâi, me ogöranyâ.

⁸ E ame ogöranyâ at ae theduoc ûnyi hnyi sesâ, Me ogöranyâ at ae ba ta ûnyi hnyi hna digic thatûnyi, He ka tha olabʼ ödrin me je than, Me tabâ theron ae hmanenang: Anyin a e unyi Iehova je hmolominy hmeledrany, Ke e ame otilâ hmeledrany hon e.

⁹ E ame he ka tuö je li can tavat ae kap, Ke e ame he ka ohnyibö hnyat ae ca wisa hnyi menekholom; Anyin ame ca he at ka ton ûnyi ge tang hwegien.

¹⁰ Adre me he ka oamamâ tavat adre me vat me Iehova; E ame he ka kunâ hendreng kodra ûheny hnyi drany: Ame he Iehova ka owisa je can hmeledrany; Ke e ame he ka ham tang hwege ka than a aten, Me ogöranyâ faoiny meno anyin at e ame osûâ.

¹¹ Me haba Elekana ame he Rama ai ka hnyi hnyaban. Me wanakat ame bi athnyaba Iehova hnyi bnyimakö Eli at bihut.

¹² Ke haba li laku Eli me li laku Belial; ke ca khanʼ ödru Iehova.

¹³ Ke haba hwakecin tavat bihut ka tavat, hnyi ûen ame he at ka hudo hut, me haba athnyabainy at bihut ame o, kʼ ame tiga ölâ utiö, ke eû hnyi hnyamen bâlet a kun ta vheiny;

¹⁴ ke e ame seû hnyin öt, ame ne ketel, ame ne ot ae gan, ame ne kaia; me haba ûnyi hia ame kât at bihut ge bâlet me wale hnân hobi kâu. Ke ödrin e ânyâ helâe hnyi Silo ka at Isaraela hia adre me he kâ e.

¹⁵ Eke, ödrin e tiga ca le pipikhenya, me ame he athnyabainy at bihut me ha ka at ae tren hut, ka habe, Hö jem utiö mʼ adre me le hobi kâu at bihut; anyin a e ame ca he ka kap gam utiö ae mesök, ke so thibi ûnyi ae hât.

¹⁶ Ke ame ne thu kâu hnen at, ka habe, ödrin e he eâu ka le pipikhenya, me waleling e khanö u he ka hom hoton wem bi; awe, e ame he ka ha, ka habe, Ohe, ke u me he ka ham walang ang: kʼ ame ne ba me oge me he ka hûgûnâ e.

¹⁷ Ke e ti gan ûkonginy li hidröu hnyi hnyimakö Iehova; me haba tavat adre me hûkötiâ bwihlany kö Iehova.

¹⁸ Ke Samuela ame bi athnyaba hnyi hnyimakö Iehova, ke e tiga wanakat, kʼ ame weikâ iefoda lino.

¹⁹ Ka hinyen ame tibet ûkhaû ae ûhnyûkong hobi kâu me hom kâu hnyi ke huna me ke huna, hnyi ûen e ame tha he me âiân he ka bi hut hnyi je huna.

²⁰ Ke haba Eli ame hahnahici Elekana me âiân, me e ame ha, ka habe, E so Iehova ame ham köu wan ûnyi ge momo eang, can bwihlany e ame me ham kö Iehova. Ke ödru me he hmetu ka hnyi hnyabadra.

²¹ Ke haba Iehova ame senö Hana, me e ame erkin, me hu lakon a kun ta da me lo li in. Ke ame gan tot wanakat jia Samuela hnyi hnyimakö Iehova.

²² Ke haba Eli, me, ti hingat ut; ke e ame long ta je ûnyi hia a ânyâ li lakon ka at Isaraela hia, me hnödru hna tha mokut me je momo adre hnyi huliwa hnyi hwanumen uma ûkhacaköu.

²³ Me e ame ha ködru, ka habe, Ieû gabu öbu me ânyâ je ûnyi helâe? anyin oge long ûnyi ge tavat hia eang hwakecibu ae kong.

²⁴ Ohe, lakuk; e ca so ûthûmetu oge long: öbu me omono tavat anyi Iehova.

²⁵ Ame ne kong ke at ka ke at, Khong ame he ka owisa kâu: ke ame ne kong at kö Iehova ie at ame he ka khöû hobi kâu? Ke so bi ödru me ca long hofuc hwan kamödru, anyin ae be he Iehova ka hlingʼ ödru.

²⁶ Ke ame gan tot wanakat Samuela, ke ame betenge gan Iehova, me tavat minya.

²⁷ Ke ame o ke aten Khong kö Eli, me ha kâu, ka habe, Walang hofuc ho Iehova, ka habe, Hawa, oge manen dut ka lap anyin lakâmâm, ke tiga ödrin bi Aigupito, hnyi hnyaba Farao?

²⁸ Me oge ûca e ûnyi hnyi je tribu hia anyin at Isaraela me me at bihut könya, he ka hudo hon taben hut könya, he ka leû uto ae bo so, he ka khavâ iefoda hnyi hnyimakök? ke hawa, oge ham ka lap anyin lakâmâm ta je hut a an hnen meic ûnyi ge lakon Isaraela?

²⁹ Anyin a wale can ieû öbun e uto hut me bwihlany könya, wale oge hûna ka hnyi hnyabak; me oganâ lakom huk he ka opipikenyai öbun ge je hut hia ae ûnyi hnathu anyin at Isaraela a lakeik?

³⁰ Anyin a wale ame ha Iehova Khongon at Isaraela, ka habe, Oge ha a gʼ ame he ânyâm lap me lap anyin lakâmâm ka he hnyi hnyimakök nyiele balua: ke walang ang haingö Iehova, Hûkötiânök; anyin oge me he ka ogânʼ ödrin hnyat ödrin e oganö nya, ke oge me he ka hmehma gadrin hnyat ödrin e hûkötiö nya.

³¹ Wâ bi, ame he ka o ta je bong, me oge me he ka subâ benyâm, me benyin lakâmâm, me me ba hingatiny ânyâm lap.

³² Ke u me he ka wâ hna okongoâ hnyi hnyabak, hnyi ta je omjeû hia Khong ame he ka ham ka at Isaraela: ke ame he ka ba hingatiny ânyâm lap nyiele balua.

³³ Ke haba atâm oge me ca he ka subâ degecâ ûnyi hnyi anyik taben hut, ame he ka hnân odilâ li emâkâm me otengiâ hnyekom: ke haba je wan hia thithö ânyâm lap, me adre me he ka mok kʼ ödra tiga hmai.

³⁴ Ke walang haten köu, a ûnyi ame he ka o ka li lakom, jia Hofeni me Fineasa; ödru me he ka tha mok hnyi bong a khaca.

³⁵ Ke oge me he ka oâ hobi könya ke at bihut ae hnathu, me e ame he ka ânyâ hoton hnyekuk me oûny-kûmânök: ke oge me he ka otilâ hobi kâu lap ae tethmâ: ke e ame he ka bi hanymen hnyi hnyimakan hnyat oge me hû nyiele balua.

³⁶ Ke haba je kolon hnyi ânyâm lap, me adre me he ka o kâu me nom kâu hnân ong sileva, me u jeû, me ha, ka habe, Ö u ha hanymök a hanymen at bihut, mʼinye hnyi han ong jeû.